Inoqatinut attaveqaatit qineqqusaarnermi atorneqarluartut
Qineqqusaartut partiillu qineqqusaarnerup nalaani inoqatinut attaveqaatit atorlugit imminnut saqqummiuttarnerat qineqqusaarnerit siulianit akulikinnerusutut nalilerpiuk?
Taamaappaat kukkusimanngilatit. Ilisimatusarfimmimi ilisimatusartup tamanna qarasaasiamini atortorissaarutit atorlugit misissorpaa.
- Takusinnaasakka malillugit imminut assilineq videonillu ilioraaneq periuserineqartorujussuupput. Facebookkip tulleriiaarisarneranut tamanna tulluarpoq. Taakkumi inuit siulliunissaat tulleriiaarisarnerminni ileqqoraat. Takusinnaavara partiit arlallit video-t pingaartumik toqqaannartumik aallakaatitsinerit pikkoriffigigaat, Naimah Hussain KNR-imut oqarpoq.
Taassuma Naleraq Qarsoq Høegh-Dam-ilu qineqqusaarnerit sioqqullugilli inoqatinut attaveqaatit atorluartaraat paasissutissanik katersinermini malugisimavaa.
Meeraanermi assit kalaalimerngillu
Tusagassiuutitoqqat soorlu KNR Sermitsiarlu politikkikkut apeqqutinik apererusunnerupput. Ilisimatusartorli naapertorlugu qinikkat inoqatinut attaveqaatinik annermik Facebookkimik atuinerat taakkununnga pitsaaquteqarpoq tassalu kinaassusertik takutissinnaaneruaat ajornannginnerusumillu oqariartuutiminnik anngussisinnaallutik.
Taamaaliornikkut ilaquttatik nerisatilluunniit saqqummiussinnaavaat. Naimah Hussainili naapertorlugu qinikkat oqariartuutit "pikkunaannerusut" sammivaat aamma sooq qinersisartunit qinerneqarnissartik.
- Ilaasa kinaassutsitik takutippaat. Meeraanerminni assit kalaaliminertortullu. Assersuutigalugu Nivi Olsenip meeqqani qipillutik issiaqatigalugit ikkussivoq, Naimah Hussain oqarpoq, nunarsuarmilu ilisimatusarnernut innersuussilluni.
- Tassani atuisut inuinnarpalaartumik ikkussisut nuannarinerujussuugaat erserpoq. Nuannaralugit qisuariarfiginerusarpaat tamannalu naggataatigut inuit qinikkanut ilisarisimanninnerulernerannik isumaqartarpoq.
Ajornartorsiutaasariaqanngitsoq
Qinikkat inoqatinut attaveqaatinik atuinerujussuat ajornartorsiutaalernissaasutut ilisimatusartup nalilerpaa.
- Apersorneqarniarnernut naaggaartalerpata inoqatinullu attaveqaatit kisiisa atorusulissappatigit taava ajornartorsiutaalissaaq. Taamaaliornikkummi apeqqutit isornartorsiuisut pinngitsoorsinnaavaat, taamaaliortunilli suli naammattoorsinngilanga, ilisimatusartoq oqarpoq.
Taassuma inoqatinut attaveqaatit tusagassiuutitoqqanit killilersuuteqarnerunerarpai, taamaattumik qinikkat tusagassiuutitoqqat pinngitsoorsinnaanngikkaat taanna isumaqarpoq.
- Malinnaasuinnarminnut oqaluttarput, taakkua tassaareersinnaapput qinersisaat. Tusagassiiutilli atuartartunut, naalaartartunut isiginnaartartunullu oqaluttuanik oqariartuutinillu saqqummiussisarput. Taamaattumik qinikkat siaruarteriffiit tamaasa atortussaavaat, Naimah Hussain oqarpoq.
