Innuttaasut akiuussuserneqarnissamut atatillugu assigiinngitsunik isumaqartut

65-ileereersimagaanni napparsimarululernissamullu aarlerinartorsiortuugaanni coronamut nualluummullu akiuussutissamik kapitittoqaqqissava?

Apeqqut taanna juullingajalernerani aamma coronap nualluutillu Europami tunillaassuunnerata nalaani saqqumivoq.

Danmarkimit nunatsinnut juullisioriartunik tunillatsissimasunik tikittoqarneratigut ilaatigut nunatsinni tuniluuteqqingajalersinnaasoq, Nakorsaaneq, Henrik L. Hansen isumaqarpoq.

Taamaammat 65-ileereersimasut napparsimanissamut akiuussuserneqarneqarnissaat nalilerpaa. 65-ileereersimasulli utoqqaallu covid-19-imut ukiap ingerlanerani akiuussuserneqartut 44,4 procentiinnaapput.

Mina Olesen uialu Qaqortumeersut akiuussuserneqartut ilagaat.

- Napparsimarujussuarusunnginnermik, utoqqasaanngoratta aamma tunillatsiasuugunaratta utoqqasaanngorluni, taamaammat kapitikkusunnikuuvunga, Mina Olesen oqarpoq.

Aappariit coronamik tunillatsereernikuusimapput, naallu sakkortunaarsimanngikkaluarlugu kapitinniarlutik aalajangersimapput.

Aappariittulli aalajangersimasut ikippallaartut Nakorsaaneq naliliivoq, tamannalu ernumanartuusoraa.

- Coronamik tunillanneqarneq peruluutaalersinnaasoq eqqaamasariaqarpoq, taanna oqarpoq.

Akiuussuserneqarnianngitsoq

Taamaakkaluartorli ilaat akiuussuserneqarniaratik aalajangertarput. Kristine Broberg Lund taakku ilagaat, taassuma akiuussuserneqaqqinniarnani aalajangersimavaa.

- Uanga tassa kapiteqqikkusukkunnaarpunga tassanngaaniit, taamak avaanngunartigisoq.

- Siullermik  kapueqqaarmata kingunerlutsitsinarpoq, soorlu tuilunnarluni, alliutissinnaanagu , kisianni massakkut maluginngilaraluunniit. Kingunerluuteqartinngilara, ajunngilaq, taanna oqarpoq.

Tamannalu Nakorsaanerup ernumanartippaa.

- Nunani allani aamma Danmarkimi tunillaasungaatsialereersimasoq nalunngilarput. Danmarkimiit juullisiorianik sapaatit akunnerini aggersuni tikerartoqangaatsiartussaassaaq, taakkulu coronavirusimik nappaatinilluunniit allanik aamma tunillannartunik siornatulli qularnanngitsumik tunillanneqarsimasortaqassapput.

- Tamannalu pissutigalugu inuttaasut utoqqaat eqimattat coronamik qaammatini aggersuni napparsimarululernissaat aarlerinartorsiungaatsiassapput, Henrik L. Hansen oqarpoq.

Nunatsinni sumiiffimmi 65-ileereersimasunik kapuineq misissoraanni aamma assigiinngitsoqangaatsiartoq takuneqarsinnaavoq. Paamiuni 36,5 procentiinnai akiuussuserneqarsimapput, maniitsumilu utoqqaat 73 procentii akiuussuserneqaqqinniarlutik aalajangersimapput.