Martha Abelsen: Innarluutilinnut ikiuisarneq pitsaanerulissaaq

Innarluutilinnut tunngassuteqartut isornartorsiorneqangaatsiarput. Innarluutillit atugaat naammaginanngillat, atugassarititaasulli pitsaanerulernissaat anguniarlugu sulineq aallartereersoq Isumaginninnermut Naalakkersuisoq Martha Abelsen uppernarsaavoq.
Assi © : KNR
Allattoq Andreas Wille, Aviâja Kilime , Anton Gundersen Lihn
februaarip 21-at 2019 20:44

Kalaalerpassuit innarluutillit Nunatsinni pisariaqartitaminnik pisarialinnik ikiorneqarsinnaannginnertik pissutigalugu nunanut allanut nuuttariaqartarput.

Tamanna Inuttut pisinnaatitaaffiit pillugit instituttip isornartorsiorpaa, isornartorsiuinerlu Isumaginninnermut Naalakkersuisup ajuusaarnartippaa.

- Ajuusaarnartorujussuuvoq taamannak inissisimassagaani, taamallu oqariartuuteqartoqassappat. Kisianni isumaqarpunga isigisariaqarigut Nunatsinni neqeroorutit assigiinngitsut innarluutilinnut neqeroorutigineqartartut qanoq massakkut isikkoqarnersut, Martha Abelsen oqarpoq.

Kommunet Isumaginninnermullu Naalakkersuisoqarfiup Inuttut pisinnaatitaaffiit pillugit instituttip isornartorsiutai piffissami aggersumi suliarissavaat.

AAMMA ATUARUK Hjælp til grønlændere med handicap er ikke god nok

Isornartorsiutinut ilaapput innarluutilinnut ilisimasaqarluartunik ilinniarsimasunik sulisukippallaarneq aammalu angallannerup innarluutilinnut tulluannginnera.

Innarluutillilli illersuisuannik pilersitsinikuuneq, aamma innarluutillit pillugit inatsisissap Inatsisartut upernaamut ataatsimiinnissaanni saqqummiunneqarnissaa, Martha Abelsenip ilanngullugu oqaatigaa. Suliniutigineqarsimasorli aamma alla eqqaavaa.

- Soorlu eqqaasinnaavarput Sisimiuni Pissassarfik Kommunet tapersersorniarlugit sulineranni innarluutillit ataasiakkaat qanoq pilersaarusiuunneqarsinnaanerannut tunngasunik ammarneqarnikuuvoq, Martha Abelsen oqarpoq.

AAMMA ATUARUK Vi flyttede til Danmark for at få ordentlig hjælp

Nunattali innuttaasukillunilu isorartunera unammillernarsinnaasartoq Naalakkersuisup isertuutinngilaa. Tamannalu nunanut allanut periarfissatigut sanillersuussinissamut mianersuuttariaqartoq unnerlugu.

- Soorunami Danmarkimi periarfissat amerlanerujuaannassapput inunnut 5 millioninut innuttaasunut 5 millioninut taakkua sanasussaavaat neqeroorutitillu taakkununnga tulluarsartuartussaallugit, Martha Abelsen oqarpoq.

Annertuumik innarluutillit kommunimit ikiorserneqarlutik Danmarkimut nuussimasut 132-usut 2017-imi februaarimi nalunaarsorneqarsimapput. 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk