Nuummi sapaatip akunnerata naanerani innaallagiaarunneq: Innaallagiaqannginneq oqarasuaatillu akunnerit arfinilinni attaveeruteqqasut
Nunatsinni illoqarfiit pingaarnersaat arfininngornermi unnukkut nalunaaqutaq 22.30 missaani innaallagiaaruppoq, taamaattumik unnuk nalinginnaasumit nipaannerulerpoq.
Innaallagiaarunneq imermik pilersuinermut oqarasuaatikkullu attaveqaatinut sumiiffinni arlalinniittunut aamma sunniuteqarpoq.
Utoqqarmiut Kangerluarsunnguanit innaallagiamik pilersuisoqarunnaarnera pissutaasoq, Nukissiorfiit nittartakkaminni allapput.
- Utoqqarmiut Kangerluarsunnguani anorlingaatsianera pissutaalluni innaallagissamik pilersuineq unikkallarpoq.
Politiit innuttaasut Facebookikkut kajumissaarpaat ikiorneqarnissamik pisariaqartitsisut oqarasuaatikkut normumut allamut sianeqqullugit imaluunniit politeeqarfimmut orniguteqqullugit.
Nuup innaallagiamik, imermik tamakkiisumik pilersorneqaleqqillunilu kiassarneqaleqqittoq Nukissiorfiit akunnerit arfinillit missaanni qaangiummata, nalunaaqutaq 04.35, nalunaarutigaat.
Innuttaasut kajumissaarneqareersullu innaallagiaarunneq pisoq
Naalakkersuisut ajornartoornissamut piareersarnissaq innuttaasunut sapaatip akunnera taannarpiaq kajumissaarutigereeraallu innaallagiaarunneq pivoq.
Aallaamik piniutaasinaasumik, imassanik, aalisariutinik, raatiumik, batterinik inaallagissiutissamaammillu piareersimasuuteqarnissap saniatigut, inoqutigiit minnerpaamik ullunut tallimanut naammattunik nerisassaateqarnissaat, imiuteqarnissaat nakorsaateqarnissaallu kaammattuutigineqarpoq.
Naalakkersuisut inoqutigiinnut tamanut siunnersuutaasa allattorsimaffiat uani takusinnaavat.
Nuuk decembari 2021-mi aamma innaallagiaaruppoq, aallaqqaammut nalunaaquttap akunnerini 18-ini sivisussuseqartumik. Tamatuma kingorna sivikitsukkaartumik arlaleriarluni innaallagiaaruppoq. Utoqqarmiut Kangerluarsunnguani erngup nukinganik nukissiorfiup kabeliinik ajoquteqartoqarnera pissutaalluni illoqarfiit pingaarnersaanni immikkut ittumik taamanikkut pisoqarpoq. Illoqarfiit pingaarnersaat decembari 2024-mi aamma innaallagiaaruppoq.
