A/S INI: Anisitaasoqassatillugu politiit ornigukkaangata akiliinermik kinguneqartarpoq
Partii Naleraq sinnerlugu Inatsisartunut ilaasortap, Anthon Frederiksenip, paragraf 37 naapertorlugu apeqquteqareernerani, Naalakkersuisut akissutaanni tamanna erserpoq.
Inissianik attartut anisitaasussat nuna tamakkerlugu 400 missaanniittunit 89-it Narsami, ullumikkut 1.500-it missaannik inoqartumi, inissianik attartortut anisitaanissartik naatsorsuutigisinnaagaat aamma akissummi erserpoq.
Narsami anisitaasussatut naatsorsuutigineqartut taama amerlatigut pillugit, Inissiaatileqatigiiffimmit A/S INI-mit oqaatigineqarpoq, misilittakkat naapertorlugit, Narsami inissianik attartortut 89-it tamarmik anisitaanavianngitsut.
Politiit akuliutsinneqarneri iluaqutaasarpoq
- Assersuutitut taasinnaavarput, 2013-mi inissianik attartortut 162-it allagarsitinneqarsimammata anisitaasussatut. Kisiannili politiit anisitsisoqarnissaanik saaffiginnimmata 162-it tamarluinnarmik erngerlutik akiliipput, taamaalillutillu anisitaanissaraluartik pinngitsoortillugu, Inissiaatileqatigiiffimmi A/S INI-mi Attaveqatigiinnermut pisortaq, Else Løvstrøm KNR-imut oqarpoq imalu nangilluni.
- 2014-mi Narsarmi inissianik attartortut 67-it anisitaanissartik pillugu politiinit orninneqarput. Taakkunannga 55-it erngerlutik akiliipput kisiannili tassa aqqaneq-marluk ukioq taanna anisitaapput, Else Løvstrøm oqaluttuarpoq.
AAMMA ATUARUK Narsami 2015-imi anisitaasussat 89-upput
Taamaattumik taassuma naatsorsuutiginngilaa, Narsami inissianik attartortut ukioq manna 89-it anisitaanissaminnik allagarsisimasut tamarmik anisitaassasut.
- Naqissuserneqartariaqarpoq misilittakkavut aallaavigalugit paasinarmat, anisitaanissartik pillugu politiinit saaffigineqartut tamarluinnangajammik erngerlutik akiliisarmata, A/S INI-p Attaveqatigiinnermut pisortaa, Else Løvstrøm, KNR-imut taama oqarpoq.
