Inissaaleqineq qanoq qaangissavarput?
![](/sites/default/files/styles/image_934x467/public/article_images/inuilibyggeri_630_1.jpg?itok=j6gxeksn)
Qaammatit arlaqanngitsut matuma siorna Naalakkersuisut inissiaateqarneq pillugu nalunaarusiaanni erserpoq inissiat 6.400-ut akornanni inissiat pingasuugaangata marluk ima aserfallassimatisisartut iluarsaannerat imminut akilersinnaajunnaareersimalluni.
Inissiat pisoqalisut ussiittullu kisimik ajornartorsiutaanngillat, tassami oquk annertoorujussuarmik ajornartorsiutaalersimavoq.
Oqullu akiorniarlugu aningaasaqarnermut akileraartarnermullu ataatsimiititaliaq marsip naanerani akuersivoq 16 millioner koruunini aningaasaliisoqassasoq.
UANI ATUARUK: http://knr.gl/kl/nutaarsiassat/namminersorlutik-oqartussat-oquk-akiornia...
Tamannali imaani kuseriarnerinnartut isigisariaqarpoq.
Tassami naatsorsuinerit takutippaat oquk akiorneqassappat ukiut 15-20-it tulliuttut ingerlaneranni aningaasat 3,5 milliarder aamma 5,5 milliarder koruunit missaat atorneqartariaqassasut, ineqarnermut naalakkersuisoq Jens B. Frederiksen oqarpoq
Inissiaatileqatigiiffik A/S Ini aamma nalunaarpoq ajornartorsiut qaangerneqassappat ineqarnermut akiliut qaffariangaatsiartariaqartoq.
Qqummillu eqqorneqartut tassapput pissakinnerit pigissaartullu. Tassami inatsisartut siulittaasuata Josef Motzfeldtip illua aamma Naalakkersuisuni ilaasortat arlallit illui oqoqartut paasineqarput
Taakkuli ingerlaannaq inissarsineqarput allat oqoqanngitsumik angerlarsimaffeqarnissartik suli utaqqigallartariaqaraat.
Inissaaleqineq nunatsinni ima annertutigaaq ineqarneq pillugu nalunaarut maanna inatsisartuni oqaluuserineqartoq eqqumaffigineqaqqissaartussaassalluni.
Ineqarneq pillugu nalunaarut naapertorlugu siunnerfigineqarpoq sapinngisamik amerlasuut inigisaminnik nammineq piginnittuuleriartortinneqassasut. Jens B. Frederiksen isumaqarpoq taamaasiornikkut ineqartut najukkaminnik paarsilluarnerulissapput.
Taassuma ilanngullugu siunnerfigaa illoqarfiit siuariartortut pingaarnertut inissialiorfigineqassasut illoqarfinnut nunaqarfinnullu inukilliartortunut aningaasaliissutit ikilillugit.