Namminersorlutik oqartussat oquk akiornialerpaat
Inissiani Namminersorlutik Oqartussani pigineqartuni oqoqarnera immikkut akiorniarlugu Naalakkersuisut Nunatta Karsianit 16 millionit koruuninik atuisinnaasut Inatsisartut Aningaasaqarnermut- Akileraartarnermullu ataatsimiititaliaata akuersissutigaa.
![](/sites/default/files/styles/image_934x467/public/article_images/svamp630.jpg?itok=F0hQAxOh)
Allattoq Carla Davidsen
Oquup tuaviornerpaamik akiorniarneqarnissaanut Naalakkersuisut oqarnerat ataatsimiititaliap akuersineranut pissutaavoq. Inissiartaarniarluni utaqqinerup sivitsortoornissaa aamma pinngitsoorniarneqarpoq.
Ajornartorsiutilli assigiinngitsorpassuit qaangerniarlugit 16 millionit koruunit amerlagisassaanngillat.
Oqummik Nunatsinni ajornartorsiuteqarneq ukiuni 15/20-ni qaangerniassagutsigu 3,5 - 5,5 milliardit koruunit atorfissaqartippavut, Ineqarnermut Naalakkersuisoq, Jens B. Frederiksen, Aningaasaqarnermut Akileraartarnermullu ataatsimiititaliamut qinnuteqaammini ilaatigut allappoq. Ajornartorsiut Inatsisartut upernaakkut ataatsimiinneranni oqaluuserineqassasoq aamma oqarpoq.