- Isumaginninnermut siunnersortinngorniarfik maani periarfissaasimanngitsuuppat alla toqqarsimassagaluarpara, naak kissaatigivallaanngikkaluarlugu, Aviaaja Tróndheim oaqarpoqAssi: KNR

Ingerlaqqiffisumik ilinniartut amerleriangaatsiarneranni akuusoq: Nunatsinni ilinniarusuppunga

Isumaginninnermut siunnersortinngorniarfik maani periarfissaasimanngitsuuppat kissaatigivallaanngikkaluarlugu alla toqqarsimassagaluarini, Aviaaja Tróndheim oqarpoq.

- Iluaqaaq qanigisakka ilaquttakka kammakkalu qaninnerullugit ilinniarsinnaagama, aamma kajumissuseqarnarneruvoq, ilinniakkama naammassinissaanut tapersersorteqarlunga, Nuummi Ilisimatusarfimmi isumaginninnermut siunnersortinngorniaq, Aviaaja Tróndheim oqarpoq.

AAMMA ATUARUK Nunatsinni ingerlaqqiffiusumik ilinniarlutik naammassisut ukiut 16-it ingerlaneranni amerleriangaatsiarput

Inatsisilerituunngorniaq tamatumunnga aamma isumaqataavoq.

- Iluarisorujussuuara soorlu angerlarsimaannarluni ilinniarsinnaaneq avatangiisit ilaquttallu ilagiinnarlugit, Ane Louise Geråe Knudsen oqarpoq.

Nunatsinni ingerlaqqiffiusumik ilinniarlutik naammassisut ukiut 16-it ingerlaneranni amerlingaatsiarsimasut, Nunatta Naatsorsueqqissaartarfianit kisitsisini erserpoq.

Nunatsinni ilinniakkamik ingerlaqqiffiusumik naammassinnittut 2005-imiit 2021-mut 101%-mik amerleriarsimapput. 271-it ilinniakkamik ingerlaqqiffiusumik siorna naammassinnissimapput.

Amerlanerusunik periarfissaqarnera ammaassisoq

Taakkunannga 69 procentii nunatsinni ilinniakkamik naammassinnipput. Naammassinnittullu taama amerleriartiginerannut ilinniarfiit ilaasa qaffanneqarlutik Ilisimatusarfimmiilersinneqarnerat, ilinniarfiillu ingerlaqqiffiusut amerlineqarnerannik peqquteqartoq, rektor Gitte Adler Reimer oqarpoq.

- Arlalinnik peqquteqarpoq. Immaqa pingaarnertut oqaatigisinnaavarput 2005-imit ulloq manna tikillugu ilinniakkanik nutaanik aallartitsisimavugut. Ukua sualummik nutserisunngorniat, inatsisilerisutut ilinniarneq, taavalu aningaasaqarnermut inuussutissarsiornermullu ilinniakkat taakkua aamma aallartissimapput. Ilisimatusarfimmi rektori Gitte Adler Reimer taama oqarpoq.

Nunatsinni ingerlaqqiffiusumik ilinniarfiit 2008-mi sisamaannaapput. Ullumikkullu amerlarnerusunik periarfissaqarnera, Aviaaja Tróndheimip qujamasuutigaa:

- Isumaginninnermut siunnersortinngorniarfik maani periarfissaasimanngitsuuppat alla toqqarsimassagaluarpara, naak kissaatigivallaanngikkaluarlugu, taanna oqarpoq.

- Nunatsinnilu ilinniagaqarneq aamma allatigut iluaqutissaqartaqarpoq, soorlu ilinniarneq akeqanngilaq, ilinniagaqarnersiuteqarpugut kollegianillu ineqartinneqarluta.

Ane Louise Geråe Knudsen tamatumunnga isumaqataavoq.

- Pitsaaqutigivaa avatangiisit ilisarisimasat avatangiiseralugit toqqissilluni ilinniarsinnaaneq. Nunatsinni inatsisilerituunngorniarfeqanngikkaluarpat taanna ilinniassallugu toqqarsimanavianngikkaluarpara.

Nunatsinni ilinniakkaminnik naammassinnittartut amerleriangaatsiartut

Ingerlaqqiffiusumik nunatta avataani ilinniakkamik naammassinnissimasut suli amerlapput, siornalu taamaattumik naammassinnittut 84-iupput.

Taamaakkaluartoq amerlanerujartuinnartut nunatsinni ilinnakkamik naammassinnipput.

- Ilimagivara inuusuttuaqqat nunatsinni ilinniaannarnissartik soqutigisimagaat. Gitte Adler Reimer oqarpoq.

Nunatsinni ilinnialernissamik toqqaasut amerlingaatsiarsimanerinut ilinniartut nunartik, kulturertik, ileqqutillu qimannagit ilinniagaqarsinnaanertik pingaartillugulu aamma toqqartarsimassagaat, Ilisimatusarfimmeersup Gitte Adler Reimerip ilimagivaa.

Ilinniakkaminnik taamaatitsiinnartartut ikilisinniarlugit Ilisimatusarfik iliuuseqartoq

Ilinniakkamik taamaatitsiinnartartut ikilisinniarlugit iliuutsit Ilisimatusarfiullu avammut nittarsaattarnera naammassinnittartut amerleriarnerannut aamma pissutaaqataasimassasut, Gitte Adler Reimer tunngavilersuivoq.

- Avammut nittarsaattarparput, ilisimatusarnitsigut nittarsaassisarnerput annertuvoq. Gitte Adler Reimerilu ima nangippoq:

- Ilinniakkamik taamaatsitsiinnartarneq aamma annertuumik iliuuseqarfiginikuuarput ukiuni kingullerni. Ilisimatusarfimmi rektor Gitte Adler Reimer naggasiivoq.

2005-imit ingerlaqqiffiusumik ilinniarfinni naammassinnissimasut 135-usimasut 2021-mi 271-inut qaffassimasut, Naatsorsueqqissaartarfiup nittartagaani uani takuneqarsinnaapput www.stat.gl.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl