Inuit 271-it ilinniakkamik ingerlaqqiffiusumik 2021-mi naammassinnissimapput. Taakkua 69 procentii nunatsinni ilinniakkamik naammassinnittuupput.Assi: Ilisimatusarfik

Nunatsinni ingerlaqqiffiusumik ilinniarlutik naammassisut ukiut 16-it ingerlaneranni amerleriangaatsiarput

Ilinniarfiit ilaasa qaffanneqarlutik Ilisimatusarfimmiilersinneqarnerat, ilinniarfiillu ingerlaqqiffiusut amerlineqarnerat ilinniartut naammassinnittartut amerleriarnerannut peqqutaaqataalluinnarput

Nunatsinni ingerlaqqiffiusumik ilinniarlutik naammassisut ukiut 16-it ingerlaneranni amerleriangaatsiartut, Nunatsinni Naatsorsueqqissaartarfik taama nalunaarpoq.

Nunattalu avataani ilinniakkaminnik naammassinnittut ikileriaratik amerlerialaarsimammata, piffissami tassani ilinniakkamik naammassinnittut marloriaatinngorput.

- Ukiut ingerlanerini kisitsisaataatitsinni takutissinnaasatsinni naammassinnissimasut takussagaanni 2005-iminngaanniit 2021-p tungaanut qaffakkiartorlutik pisimapput. Taava naammassinnissimasut 2005-mi 2021-lu sanilliullugit 101%-imik qaffassimapput. Naatsorsueqqissaartarfimmi ilinniagartuutut atorfilik Samo Nielsen taama oqarpoq.

Ilinniarfiit ilaasa qaffanneqarnerisa ilinniarfiillu amerlineqarnerisa ilinniakkaminnik naammassinnittartut amerlisikkai

Tassalu inuit 271-it ilinniakkamik ingerlaqqiffiusumik 2021-mi naammassinnissimapput. Taakkua 69 procentii nunatsinni ilinniakkamik naammassinnittuupput. Naammassinnittullu taama amerleriartiginerannut ilinniarfiit ilaasa qaffanneqarlutik Ilisimatusarfimmiilersinneqarnerat, ilinniarfiillu ingerlaqqiffiusut amerlineqarnerannik peqquteqartoq, rektor Gitte Adler Reimer oqarpoq.

- Arlalinnik peqquteqarpoq. Immaqa pingaarnertut oqaatigisinnaavarput 2005-imit ulloq manna tikillugu ilinniakkanik nutaanik aallartitsisimavugut. Ukua sualummik nutserisunngorniat, inatsisilerisutut ilinniarneq, taavalu aningaasaqarnermut inuussutissarsiornermullu ilinniakkat taakkua aamma aallartissimapput. Ilisimatusarfimmi rektori Gitte Adler Reimer taama oqarpoq.

Ilisimatusarfimmi ilinniarfigineqarsinnaasut sisamaannaanikuugaluartut 2008-mi ilinniarfiit ilaat qaffanneqarmata arfineq pingasuulertut, taassuma aamma erseqqissarpaa.

- Ilisimatusarfimmut inatsisip nutaap eqqunneqarnerata kingunerisaanik 2008-mi katersuunnikuugamik ilinniagarpassuit ataatsimoortillugit, socialrådgiverinngorniat, tusagassiortunngorniat, ilinniartitsisunngorniat, sygeplejerskinngorniartullu. Gitte Adler Reimer taama oqarpoq.

Nunatsinni ilinniakkaminnik naammassinnittartut amerleriangaatsiartut

Ingerlaqqiffiusumik nunatta avataani ilinniakkamik naammassinnittut suli amerlapput, siornalu taamaattumik naammassinnittut 84-iupput.

Taamaakkaluartoq amerlanerujartuinnartut nunatsinni ilinnakkamik naammassinnipput.

- Ilimagivara inuusuttuaqqat nunatsinni ilinniaannarnissartik soqutigisimagaat. Gitte Adler Reimer taama oqarpoq.

Nunatsinni ilinnialernissamik toqqaasut amerlingaatsiarsimanerinut ilinniartut nunartik, kulturertik, ileqqutillu qimannagit ilinniagaqarsinnaanertik pingaartillugulu aamma toqqartarsimassagaat, Ilisimatusarfimmeersup Gitte Adler Reimerip ilimagivaa.

Ilinniakkaminnik taamaatitsiinnartartut ikilisinniarlugit Ilisimatusarfik iliuuseqartoq

Ilinniakkamik taamaatitsiinnartartut ikilisinniarlugit iliuutsit Ilisimatusarfiullu avammut nittarsaattarnera naammassinnittartut amerleriarnerannut aamma pissutaaqataasimassasut, Gitte Adler Reimer tunngavilersuivoq.

- Avammut nittarsaattarparput, ilisimatusarnitsigut nittarsaassisarnerput annertuvoq. Gitte Adler Reimerilu ima nangippoq:

- Ilinniakkamik taamaatsitsiinnartarneq aamma annertuumik iliuuseqarfiginikuuarput ukiuni kingullerni. Ilisimatusarfimmi rektor Gitte Adler Reimer taama naggasiivoq.

2005-imit ingerlaqqiffiusumik ilinniarfinni naammassinnissimasut 135-usimasut 2021-mi 271-inut qaffassimasut, Naatsorsueqqissaartarfiup nittartagaani uani takuneqarsinnaapput www.stat.gl.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl