Inger Støjberg naalakkersuinermi akisussaasumut eqqartuussivimmut sassartussanngortoq
Støjbergip naalakkersuinermut akisussaasumut eqqartussivimmut sassarnissaa tapersersorlugu, partiiata Venstrep Socialdemokratillu sisamanngornermi nalunaarutigaat. Folketingimi amerlanerussuteqartut siunnersuut taamaammat tapersersulerpaat.
Inger Støjberg nunanit allaneersunut ilanngutitaanermullu ministeriugallarami Danmarkimi nunassiniartut aappaariit inuusuttut, aappaa 18-it inorlugit ukioqarpat tikereernerminni pinngitsoornatik avissaartinneqartarnissaat Støjbergip 2016-imi piumasarisimavaa.
Inuussuttuaraatilluni katittoqartannginnissaa taamaalinikkut pinngitsoortinniarini Støjbergip taamanikkut tunngavilersuutigaa.
Taamatulli piumasaqaateqarnissaq inatsisinik unioqqutitsinerusoq, Folketingip Ombudsmandiata, eqqartuussissuserisullu arlallit misissuinerisa takutippaat.
AAMMA ATUARUK Demokratit Donald Trump uppiseriaqqinniaraat
Taamaattorli Støjbergip ministereqarfiata piumasaqaat taanna avammut nalunaarutigisarsimavaa, naak ministereqarfimmi atorfilittat piumasaqaatip inatsisinik unioqqutitsisuunera ilisimatitsissutigisarsimagaluaraat.
Inger Støjbergilli tamanna paasisinnaannginnerarpaa.
- Folketingimi suleqatigisamut tatiginnninnginnermik takutitsiniaraanni naalakkersuinermut akisussaasumut eqqartuussivimmut sassaqqqusisoqarsinnaavoq. Taamaammat partiimi siulittaasunnit tatiginninnginnertut tamanna isigaara, Inger Støjberg DR-imut oqarpoq.
Inger Støjbergip naalakkersuinermut akisussaasumut eqqartuussivimmi sassarnissaanut Socialdemokratit Venstrellu tapersersuinerisa saniatigut partiit Enhedslisten, SF, De Radikale Venstre, De Konservative, Liberal Alliance, De Frie Grønne attaviitsorlu Simon Emil Ammitzbøll tapersersuipput.