Pineqaatissinneqarsimasut singernequteqartalissanganngitsut
![](/sites/default/files/styles/image_934x467/public/article_images/soren_pape-fotograf_steen_brogaard.jpg?itok=oGE7ZqTs)
Pinerluuteqarsimasunik isumaginnittoqarfiup oqaaseqaataa aallaavigalugu Enhedslisten sinnerlugu Folketingimut ilaasortat Rune Lund apeqquteqaataanut, Inatsisinik Atuutsitsinermut ministeri Søren Pape Poulsen taama akissuteqarpoq.
Pinerluuteqarsimasut singernermikkut nalunaarsuuteqarlutik Nunatsinniissinnaanissaat, teknikkikkut periarfissat killeqarnerat pissutaalluni nunatsinni taama aaqqissuussisoqarsinnaanissaa ajornakusuussaaq. Taassuma saniatigut aamma akisussaaq, ministeri oqarpoq:
- Kalaallit Nunaanni nunap immikkoortuisa ilaanni assersuutigalugu oqarasuaatit angallattakkat killeqartumik taamaallaat atorneqarsinnaapput, nunallu isorartunerujussua ilaatigut pissutaalluni singernermikkut nalunaarsuuteqartitsinerup Pinerluuteqarsimasunut Isumaginnittoqarfiup naammaginartumik nakkutigisinnaassanngilaa, Pinerluuteqarsimasunut Isumaginnittoqarfiup aqutsisoqarfia oqarpoq.
Kalaallit pinerluuteqarsimallutik pineqaatissinneqarsimasut singernermikkut nalunaarsuuteqarsinnaanissaat, Eqqartuussissuserisut Danmarkimi Siunnersuisoqatigiivisa 2016-imi aamma siunnersuutigaat.
AAMMA ATUARUK Singernermi kalunniusat Nunatsinni atulissappat?
Taama singernequteqartitsisarneq Danmarkimi 2005-imili atorneqalerpoq. Naallu attaveqaatitigut periarfissat Kalaallit Nunaanni pitsaanerulersimagaluartut, pinerluuteqarsimallutik singernermikkut nalunaarsuuteqalersinneqarsimasut nunap immikkoortuisa ilaanni angerlarsimaffimminniillutik pineqaatissinneqarsinnaassanngillat.
Taamaappat pineqaatissinneqarsimasunik assigiinngisitsisoqalissasoq, Pinerluuteqarsimasunut Isumaginnittoqarfik isumaqarpoq. Pinerluuteqarsimasut singernermikkut Kalaallit Nunaanni nalunaarsuuteqalersinnaanissaat Isumaginnittoqarfiup innersuussutiginngilaa. Inatsisinik Atuutsitsinermut ministereqarfik taama inerniliivoq.))
Pinerluuteqarsimasut singernermikkut nalunaarsuuteqarlutik angerlarsimaffimminni pineqaatissinneqartalernissaat Siumup 2013-imi siunnersuutigaa, teknikkikkulli periarfissat nunatsinni killeqarnerat pissutaalluni Pinerluuteqarsimasunut Isumaginnittoqarfiup siunnersuutip itigartitsissutigineqarnissaa tusarniaanermi innersuussutigaa.
AAMMA ATUARUK Dansk succes med fodlænker
AAMMA ATUARUK Grønland uegnet til fodlænker