Singernermi kalunniusat Nunatsinni atulissappat?

Ilisimasat misilittakkallu nunani allani takutippaat, pinerluuteqarsimasut singernermikkut nalunaarsuuteqarlutik angerlarsimaffimminni pineqaatissinneqarsimagaangamik pinerloqqinnissaminnut ungasinnerusartut. Taamaammat Doris Jakobsen Kristian Jeremiassenilu isumaqarput periuseq taanna Nunatsinni atorneqalertariaqartoq.

- Una misilittagaasoq pitsaasutut nalilerneqarmat Kristian Jeremiassenilu Inatsiseqarnermut ataatsimiisitaliami ilaasortatut isumaqarpugut aamma nunatsinni misilinneqartariaqartoq, Siumut sinnerlugu inatsisartuni ilaasortaq Doris Jakobsen taama oqarpoq.

Nunamut Namminermut Naalakkersuisoq Anthon Frederiksen, Siumukkut siunnersuutaannut soqutinnippoq.

- Nalunaarsuissutit singernermut ikkuttakkat nunani amerlasuuni pillaatip angerlarsimaffinni naammassiniarneqarneranut atasumik atorneqarput, taakkulu assinganik Kalaallit Nunatsinni atorneqarnissaanut akornutaasinnaasunik peqarsorinanngilaq, Anthon Frederiksen akissuteqaammini taama allappoq.

Ilanngullugu aamma oqaatigaa, soorumi pinerlunneq qanoq annertussuseqassanersoq aamma apeqqutaatinneqarumaartoq singernermikkut nalunaarsorneqarlutik pineqaatissinneqartartussanut.

Doris Jakobsenip aamma Kristian Jeremiassenip siunnersuumminni takorlooreersimavaat, singernermikkut nalunaarsuuteqarlutik pineqaatissinneqartartussat kikkuusinnaanersut.

- Tillinniartartuusapput, immaqalu aamma ikiaroornartulerisut taamatut pineqaatissinneqartassapput, siunnersuuteqartoq Doris Jakobsen, taama oqarpoq.

Pinerluuteqarsimasut singernermikkut nalunaarsuuteqarlutik angerlarsimaffimminni pineqaatissinneqarsinnaalernissaanut siunnersuut, ullumikkut siullermeerneqassaaq.