Arnat angutinit isertitakinneroqaat

Arnat agguaqatigiisillugit 198.000-init amerlanerulaartunik siorna isertitaqarput, angutillu agguaqatigiisillugit 277.000 koruuningajannik isertitaqarlutik.

Arnat qanorluunniit ukioqaraluarunik, qanoq sivisutigisumik ilinniarsimagaluarunik sumiluunniit najugaqarunik isertitaat agguaqatigiisillugit ikinnerupput.

Naatsorsueqqissaartarfiup ataasiakkaat isertitaannik misissuinngillat, angutilli nukersornartunik suliffeqarajuttarnerat arnat angutillu isertitaasa assigiinnginnerannut pissutaaqataasinnaasoq, Naatsorsueqqissaartarfimmi allaffimmi pisortaq, Lars Geraae isumaqarpoq.

Suliffiimmi taakku ilinniagaqarnermut naleqqiullugu amerlasuunik isertitaqarfiupput.

- Soorlu umiarsuarni aqumiuusinnaapput, imaluunniit sanaartornermi suliaqartuusinnaapput. Taakkulu immaqa tiimerpassuit sulisarputik taamaalillunilu agguaqatigiisillugu aningaasarsiaqarnerusarlutik. Taakkuninnga aallaaveqarsinnaavoq.

Lars Geraae taama oqarpoq.

Aamma angutit inuussutissarsiorsinnaasutut ukiulinni amerlanerupput, tamannalu isertitaasa agguaqatigiissinnerannut qaffaavoq. Arnallu sivisunerusumik inuusarput nunatsinnilu ukioqqortunerpaani amerlanerullutik. Taakkulu ikinnerusunik isertitaqartarput.

AAMMA ATUARUK Miliuunit sinnerlugit isertitallit amerleriartut

Arnalli inuussutissarsiorsinnaasutut ukiullit amerlasuut isertitaqarfiuallaanngitsuni sulinissartik toqqartaraat, Lars Genaae oqarpoq, ilanngullugulu oqarluni arnat qitornaminnik paarsinerusartut.

- Qitornartaarneq pissutigalugu kingusinnerusukkut suliffeqalersarput. Soorlu angutinit agguaqatigiisillugu ukioqarneruleraangamik aatsaat atorfinittartut, Naatsorsueqqissaartarfiup allaffiani pisortaq, Lars Geraae oqarpoq.

Arnat angutillu siorna ukiumut isertitaat Kommuneqarfik Sermersuumi nikingassuteqarnerpaajupput, Qaasuitsup Kommunianilu arnat isertitakinnerpaajullutik.

AAMMA ATUARUK Vi har fået flere penge i lommerne