India Issittumi ukiuunerani misissuinissaminik siullermik aallarniisoq
Indiamiut nunalerinermik ilisimatusarnermut ministeriata Indiap Issittumi ukiuunerani ilisimasassarsiornissaa siulleq ataasinngornermi aallartippaa.
Indiami issittumi imaanilu ilisimatusarnermut ingerlatsivimmit (NCPOR) ilisimatusartut ilisimatuutut misissuiffeqarfimminnut, Norgemi Svalbardimut Ny-Ålesundimukassapput. Ilisimatuutut misissuiffik ukiup affaani aasaanerani kisimi misissuiffiusarsimagaluarpoq, ilisiamtusartulli qaammatini ukiuunerani aatsaat siullermeerlutik misissuisussanngorput.
Tusagassiuutit The Times of India naapertorlugit ilisimatusartut ilaatigut silaannaq pillugu paasissutissanik katersissapput, immap sikuata allanngoriartorneranik nakkutiginnissapput kiisalu silap pissusiata allanngoriartornerata sunniutai misissussallugit.
Silammi pissusiata allanngoriartornera immallu kissassusaata qaffakkiartornera kiattuni siallernerulerneranik ilaatigullu silapilunnissaata aarlerinarnerulerneranik kinguneqarsinnaapput.
- Issittup issittullu imartaata sikuata ilisimatusarfiginerat Indiami sivisuumik anoraasartunut kiattullu silaannaanut qanoq sunniuteqarneranik paasisaqarnissamut pingaaruteqarput. Tassannga Issittumut Indiamilu siallertarneranut tunngatillugu paasisimasaqarnerulissaagut, NCPOR-imi pisortaq, Thamban Meloth The Time of Indiamut oqarpoq.
Indiami naalakkersuisut Indiap issittumi ilisimatusarneranik annertusaanissamik toraagaqartumik, issittumut tunngatillugu aalajangersimalluinnartumik siorna politikkimik atuutsitsilerput.
Indiap Issittumi imaanilu ilisimatusarnermut ingerlatsiviani pisortap ilisimatusarnerup Kalaallit Nunaannut aappaagu annertusineqarnissaa pilersaarutigineqalereersoq The Times of Indiamut oqaatigaa.
