Inatsit tunngaviusussaq assortuussutaaqisoq ullumi oqallisigineqaqqissasoq
Apriilimili inaarneqarpoq. Tassa nunatta namminersulivinnissaanut inatsit tunngaviusussatut siunnersuut siulleq matumani pineqarpoq.
Siunnersuutip taassuma ukiuni arfinlinni qaammatinilu arfinilinni inaarsarniarneqarnera 30 millionit koruuninik akeqarpoq.
Tassa ukioq manna tallimanngornermi apriilip 29-ani inaarneqareeramili sussakkeerneqarpoq. Inaarneqarnera oqalugiarluni erinarsoqatigiillunilu persuarsiutigineqarpoq – tamatumali kingorna qanoq suliarineqarnissaanik pilersaartoqarsimagunanngivippoq.
Naalakkersuisut siulittaasuata, Múte B. Egede (IA), Inatsisartut siunnersuutip qanoq suliarineqarnissaanik taamani aalajangiisussanngortippai. Inatsisartulli tamatumunnga akisussaasuunngitsut, Inatsisartut siulittaasorisimasaat Kim Kielsen (S) taamani naliliivoq.
Taamatuttaaq innuttaasut inatsit tunngaviusussatut siunnersuutip ukiuni arfinilinni qaammatinilu arfinilinni inaarsarniarneqarnerani peqataatinneqanngillat, taakkunanngalu siunnersuummik 278-inik quppernilimmik atuarusunnittut Inatsit googlekkut iserasuaqqaarlutik Inatsit Tunngaviusussaq pillugu Isumalioqatigiissitap nittartagaani nammineq ujartortariaqartarpaat.
Inatsit tunngavissatut siunnersuut aasarput uani atuarsinnaavat
Naalakkersuisoqatigiit partiivi taamaattoqarneranik isornartorsiuisunut ilaapput. Suliarmi taanna akileraarutinit 30 millionit koruuninik akilik ilumut sussakkeerneqaannassava?
Tamannalu tassa Inatsisartuni ullumi oqallisigineqaqqissaaq.
Innuttaasut peqataatinneqarlik... maannangaaq
Partiit amerlanerussuteqartut tamatumani siuttuupput. Tassa Inuit Ataqatigiit aamma Siumut aalajangiiffigisassatut siunnersuuteqarput, nunatsinni inatsit tunngaviusussatut siunnersuutip sussakkeernagu qanorpiaq suliarineqarnissaanik oqallisigineqaqqullugu.
Innuttaasut maannangaaq peqataatinneqalissasut, Inuit Ataqatigiit piumasaraat.
"Inatsisartut isumalioqatigiissitap isumaliutissiissutaa Inatsisartuni suliarineqassanersoq qanorluunniit suliarineqassanersoq isumalioqatigiissitap pilersinneqarnerani ajoraluartumik isummerfiginngilaat. Inuit Ataqatigiit aamma isumaqarput, innuttaasunik, ilinniarfeqarfinnik soqutigisaqaqatigiillu kattuffiinik oqaloqateqarluni ataatsimeeqateqarnerit, innuttaasunut paasissutissiineq ilanngullugu, sulinermi ilanngunneqarnissaat pingaaruteqarpoq". IA siunnersuummini ilaatigut taama allappoq.
Innuttaasut taasisinneqarlik
Siumut ingerlariaqqikkusuppoq, innuttaasunik taasisitserusukkami.
Inatsit tunngaviusussatut siunnersuutip ukiut arfineq-marlungajanni inaarsaaniarnerani nunatsinni angalanikkut innuttaasunik peqataatitsisimannginnini, Inatsit Tunngaviusussaq pillugu Isumalioqatigiissitap isornartorsiorneqaatigaa. Tamanna ilaatigut coronap nunarsuarmi tuniluunneranik peqquteqarpoq. Tassa nunatsinni inatsit tunngaviusussatut siunnersuut matoqqasumik suliaavoq.
"Inatsit Tunngaviusussaq pillugu Isumalioqatigiissitap isumaliutissiissutaa inoqutigiinnut tamanut atuaruminartunngorlugu nassiussuunneqassaaq. Suliaq tunngaveqarluartumik peqataatitsilluarnikkullu naammasssineqarpat, innuttaasut amerlanerussuteqarluartut inatsimmut tunngaviusussamut tunuliaqutsiiumaartut qularinngilarput”. Siumut siunnersuummi ilaatigut taama allappoq.
"Naammassinissaa inuiaqatigiinnilu oqaloqatigiissutigereerutsigu aamma innuttaasut tamatta apeqqummut taasitinneqarnissarput tikinneqassaaq", Siumut ilaatigut taama aamma alllappoq.