- Isumakilliornerujussuuvoq! Inatsit tunngaviusussaq pillugu paatsiveerusimaarnermut isummersuutit
Ukiut arfinillit ingerlaneranni 30 mio koruuninillu nalilimmik Inatsit tunngaviusussaq pillugu isumalioqatigiissitaq sulereerluni missingiummik saqqummiussivoq, taannalu maanna nerriviup qaani pujorallerporlusooq.
Taannami apriilip 29-ianili persuarsiutaasumik saqqummiunneqaraluartoq Naalakkersuisut siulittaasuata Múte B. Egedep (IA) Inatsisartulluunniit siulittaasuata Kim Kielsenip (S) missingiutip qanoq pineqarnissaa pillugu arlaannaataluunniit aalajangersinnaanngilaa.
Tassunga tunngasumik isornartorsiuinerit illuatungiliuttuniiginnanngillat aammali Naalakkersuisut namminneerlutik parteeqataanniit isornartorsiorneqarpoq, ilaatigut oqartoqarluni isumalioqatigiissitaq matoqqavallaartoq aammalu innuttaasut akuutinneqanngippallaartut.
Kingullertigut Siumumiit oqaaseqartartup Doris J Jensenip siunnersuutigaa innuttaasut akuunerulernissaat pillugu paasissutissiinernut siunissamilu inatsimmut tunngaviusussamut atatillugu innuttaasunik taasititseqqinnissamut aningaasanik 4 mio koruuninik aningaasaliisoqaqqittariaqartoq.
Taamatut ingerlasoqarnera pillugu Nuummi aqqusinermi inuit namminneq qanoq isumaqarnersut KNR-miit apersorpagut.
Aningaasat allanut atorlik
Ruth Kristensen ulluinnarni Dronning Ingridip Napparsimaviani sulisuusoq isumaqarpoq inatsimmut tunngaviusussamut sulineq equngavallaartumik ingerlanneqartoq.
- Politikerit namminneq 30 mio koruuninik taamatut atugassiipput, taamaattumik aamma missingiut ingerlaqqinniassammat suliap ingerlaqqinnissaa isumagisussaavaat, taanna oqarpoq.
Ruth Kristensenittaaq innuttaasut paasissutissinneqarnissaannut qaavatigut 4 mio koruuninik aningaasaleeqqittoqarnialersaarnera isornarluinnartoq.
- Isumakilliornerujussuuvoq, inuiaqatigiinni ajornartorsiutinik ulikkaarpugut, napparsimaveqarfimmi suliaritinniartunik ukiuni arlalinni utaqqisorpassuaqarpoq, meerartagut atugarissaanngillat, inunnillu isumaginnittoqarfipput ingerlalluanngilaq, sumi tamaani aaqqitassanik ulikkaarpoq, taamaattumik tulleriiaareriaasiat paasisinnaanngilara, taanna oqarpoq.
Malîna Johnsen ulluinnarni inunnik sullissivimmi sulisuuvoq, taanna isumaqarpoq 30 mio koruunit Inatsimmut tunngaviusussamut atorneqassappata ajunngitsoq, politikerilli ersarinnerusariaqarsorai:
- Poltikerit ersarinngippallaaqaat, namminiilivinnissaq nipitunerusumik eqqartortariaqarpaat, taanna oqarpoq.
Nuunu Rasmussen namminiilivinnissaq pillugu isumaliuteqartarpoq, aammali Ruth Kristensenitulli isumaqarpoq, tassa aningaasat allamut atortariaqarsorai.
- Ernutara meeqqerivimmut ullaaq tunniukkakku sulisunik amigaateqartut takuara, meeqqat taakkuupput nunatta siunissaanik taaneqartartut, nunatsinnni kivinneqartussat amerlavallaarput taanna oqarpoq nangipporlu:
- Isumaqarpunga naqqaniit aaqqeqqaagassat ukkatareqqaartariaqarigut, namminiilivinnissatsinnullu piareersimanngippallaartugut.
