Inatsit Tunngaviusussaq pillugu sammiveqannginneq: Siumut maanna innuttaasunut taasititsissutigerusukkaat
Nunatta tunngaviusumik inatsisissaanut siunnersuummut siullermut, ukiuni arfinilinni suliarineqarsimasumut akileraarutiniillu 30 millionit koruuninik akeqarsimasumut, kina akisussaasuua? Alloriarnissallu tullissaa suussava?
Ulloq manna tikillugu missingiummut akisussaaffimmik suli tigusisoqarsimanngilaq. Missingiut Inatsisartut suliassareqqissagaat, Naalakkersuisut Siulittaasuata Inuit Ataqatigiinneersup, Múte B. Egedep, siusinnerusukkut oqaatigaa. Inatsisartulli siulittaasuata Siumumeersup, Kim Kielsenip, akisussaaffik partiinut ingerlateqqippaa.
Nunattalu tunngaviusumik inatsisissaa siullerpaaq maanna unittooqqallunilu pujoralannik katersiinnalerpoq. Tunngaviusumillu inatsisissatut siunnersuut Nuummi apriilip 29-ianni persuarsiortumik Inatsisartunut Naalakkersuisunullu tunniunneqareerneraniilli uninngasimavoq.
Tunngaviusumilli inatsisissaanut siunnersuummut atatillugu immaqa politikkikkut allannguisoqalerpoq. Siumummi suliaq akisusimaqisoq siunissamilu oqaluttuarisaanikkut sunniuteqartussaq pillugu innuttaasunut taasititsissutigerusuppaat.
- Siumut isumaqarpoq, qinikkatut pisussaaffigigipput suliarujussuaq uatsinnut tunniunneqartoq inuiaqatigiinnut ingerlateqqissallugu naggataatigullu inuiaqatigiinnit taasissutigineqarnissaa naammassissallugu, partiip politikkikkut oqaaseqartartua, Doris J. Jensen, tusagassiorfinnut nalunaarummi taama ilisimatitsivoq.
Inatsit Tunngaviusussaq pillugu Isumalioqatigiissitaq pillugu isornartorsiutit ilaat tassaavoq Isumalioqatigiissitap ukiuni arfinilinnik sivisutigisumik suliaqarnerani Isumalioqatigiissitap nunatsinni angalasimannginnera. Inatsit Tunngaviusussaq taanna illoqarfiit pingaarnersaanni allaffimmi matoqqasumi suliarineqarsimavoq.
Missingiullu naammassineqartoq innuttaasunut saqqummersinneqarnikuunngilaq - inuit nammineerlutik nassaareqqaanngippassuk atuarsinnaanngilaat.
KNR-ip missingiut tamakkerlugu uunga ikkussimavaa.
- Suliassanuttaaq ilaavoq Inatsit Tunngaviusussaq pillugu Isumalioqatigiissitat isumaliutissiissutaat naqitanngorlugu inoqutigiinnut tamanut siammarterneqarnissaata naammassinissaa, Doris J. Jensen oqarpoq.
- Inuiaqatigiinnilu oqaloqatigiissutigereerutsigu aamma innuttaasut tamatta apeqqummut taasitinneqarnissarput tikinneqartussaassammat.
- Taamaattumik Siumup Inatsisartuutitai ataatsimoortut siunnersuuteqarput, tunngaviusumik inatsisissap inuiaqatigiinni oqaloqatigiissutigineqarnissaa siunertaralugu Inatsisartut immikkut ittumik aningaasaliissuteqassasut. Taamaaliornitsigut innuttaasut Isumaliutissiissut pillugu oqaloqatigiinnermikkut qanoq isummernerat qularnaatsumik ilisimalissagatsigu, Doris J. Jensen oqarpoq.
