Inatsit nutaaq: Pinerluffigineqarsimasut nalunaarfigineqarsinnaalersut
Inuit pinerluuteqarfigineqarsimasut pinerluuteqartumik naapitseqqinnissartik amerlanertigut ersigisarpaat.
Inummut navianartumik pinerluuteqarsimasutut eqqartuunneqarsimasup nunatsinni radiokkut, tv-kkkut atuagassatigulluunniit peqataannginnerani nalunaarfigineqaqqaartarnissaq periarfissanngungajalerpoq. Tamanna pinerluuteqarsimasup aallakaatitassiami oqaluttuamiluunniit naqitami nuiumanerunerani atuutissaaq.
Pinerluuteqarteqarsimasoq ingiorteqarani anisinnaappat imaluunnit pineqaatissinneqarsimanerup kingorna aniguisinneqarpat nalunaaruteqartoqarsinnaassaaq.
Tamanna Inatsisartut ukiaq akuerisaannut, maannalu Folketingimit suliarineqartunut inatsisissanut ataatsimoortunut ilaavoq. Inatsit pinerluttuliorneq pillugu suliami pinerluuteqarfiusimasunik ilisimannittunillunillu pitsaanerusumik illersuinissamik ilaatigut qulakkeeriniarneruvoq.
IA: Inatsit inuiaqatigiinni eqquinerlussaaq
IA-meersulli Folketingimut ilaasortap pinerluuteqarfiusimasunut illersuiniarnissamut inatsisissatut siullersuut amigarsoraa.
Pinerluuteqarsimasup tusagassiuutitigut peqataanissaanik aniguinissaanilluunniit nalunaarfigitinnissamut pinerluuteqarfiusimasut imaluunniit pinerluuteqarfigineqarsimasut ilaqutai namminneerlutik nalunaarfigineqarnissamik politiinut qinnuteqassapput.
Tassungalu nukissamik kikkut tamarmik piginngisaannik peqarnissaq pisariaqartoq, IA-meersoq Aaja Chemnitz Larsen inatsisit ataatsimoortut Folketingimi siullermeerneqarneranni oqaatigaa.
- Piumasaqartoqarnerani aatsaat nalunaartoqartassappat tamanna naammanngilaq. Tamanna eqquinerlusaaq, inuit isumalluutigissaartut ilaqutaasalu tamanna atorluaraat sanngiinnerusut qinnuteqarnissaminnut nukissaqarnavianngillat.
IA-meersulli Folketingimut ilaasortap inatsisit ataatsimoortut ataatsimut taperserpai. Partiilli nunatsinni radiokkut, tv-kkut atuagassatigulluunniit peqataasoqarnissaa inatsimmi kisimi ilaatinneqarnerat aamma isornartorsiorpaa.
Nittartakkatigut tusagassiorfiit – assersuutigalugu KNR, Sermitsiaq.ag nutaarsiassaqartitsiviillu inoqutinut attaveqaatit allat soorlu Facebook aamma Instagram ilaatinneqanngillat.
- Pineqaatissinneqarsimasoq tv-kkut, nittartakkatigut, facebookikkut allaniluuniit apersorneqarataaruni aamma killissamik qaangiinerussaaq, Aaja Chemnitz Larsen oqarpoq, nangillunilu:
- Tusagassiornermimmi imaqarnerusut nittartakkatigut tusagassiorfinni saqqummertarput, taamaammat qarasaasiatigut tusagassiorfiit inatsimmi matumani ilanngutitinneqarnissaat pinaartuusoraarput.
Tusagassiorfiit pinerluuteqarsimasup nunatsinni radiokkut, TV-kkut atuagassiatigulluunniit peqataaneranik paasissutissiinissamut qanoq iliuuseqartarnissaat pillugu inatsisissatut siunnersuummi allassimanngilaq.
KNR-ip inatsiseqarnermut ministereqarfik suliamut atatillugu oqaaseqarsiivaa.
