Inatsisitigut ataataqanngitsut danskit naalagaaffiannit nipaattoqarnera pillugu: Kalaaliunera pillugu nalikinnerusutut misigisimavunga
Inatsisitigut ataataqanngitsut 125.000 koruuninik taarsiiffigineqarnissamut piumsaqarnerannit sapaatit akunneri pingasut qaangiupput. Danskilli naalakkersuisui taarsiissuteqaqqusinermut suli oqaaseqanngillat.
AAMMA ATUARUK Inatsisitigut ataataqanngitsut danskit naalagaaffianit taarsiiffigineqarnissamik piumasaqaateqartut
Danskit isumaginninnermut ministeriata, Astrid Kragip suleqatini ’suliamik erngertumik misissuinissaannik’ piumasaqarfigisimallugit KNR-imut allakkatigut oqaaseqarnermini paasissutissiissutigaa.
- Meeqqanut isumaginninnermullu ministereqarfimmiit 2016-mi nalunaarusiami erserpoq, 1911-miit 1974-imut Kalaallit Nunaanni inatsisitigut ataataqanngitsut 8.000-it missaaniittut.
- Nalunaarusiaq naapertorlugu 2016-imi inatsisitigut ataataqanngistut 5.000 missaanniipput.
- Atuagaq ”Kampen for en far” 2011-mi saqqummersoq Kalaallit Nunaanni inuiaqatigiinni aalassatsitsivoq. Anne Sofie Hardenbergip ataatani danskiusoq najortiginagu peroriartornini atuakkiamini oqaluttuaaraa.
- Katuffik Ataata inatsisitigut atataqanngitsunut 2010-mi pilersinneqarpoq.
- Inatsisit 2014-mi allanngortinneqarput inatsisitigut ataataqanngitsut ataatassarsiorsinnaalersillugit ataataminnillu kingornussisinnaanngortillugit, kingornussassat agguaanneqareeersimanngippata.
- Inatsimmik allannguisoqartinnagu taamanikkut Naalakkersuisut Grønlandsudvalgillu kissaatigaat, inatsisitigut ataataqanngitsut kingornussisussaanngitsut aningaasatigut taarsiiffigineqassasut. Kissaataat taamani danskit naalakkersuisuinit itigartitsissutigineqarpoq.
- 2019-imi aningaasaqarnermut inatsimmi inatsisitigut ataataqanngitsunut suliniutinut atugassat koruunit 4,7 milliuunit immikoortinneqarput 2019-2023-mut paasissutissiinermut suliniutinut, katsorsarneqarnissamut suliniutinut aamma inatsisitigut siunnersorneqarnermut atugassat.
- Inatsisitigut ataataqanngitsut 27-t 125.000 koruuninik danskit naalagaaffiannit taarsiivigineqarnissamik piumasaqarput. Taakkua eqqartuussisuserisumit Mads Prammingimit sullinneqarput.
Tusarfik: Folketinget, Børne- og Socialministeriet, KNR.gl
Tamannalu pakatsinartoq, inatsisitigut ataataqanngitsut 27-t taarsiiffigineqarnissamik piumasaqartut ilaat, Anne Sofie Hardenberg taama isumaqarpoq.
- Danskinut sanilliulluta kalaaliuneq pillugu nalikinnerusutut misiginarseqqippoq. Tamanna misigiuaannarparput. Ministerip akissuteqarnissaanut piffissanngorsoraara. Akuerineqarnissarput nalilittut misigimalernissarput ukiorpassuarni utaqqisimavarput. Piffissanngorneranilu danskit naalagaaffiat akissuteqarusunngilaq, Anne Sofie Hardernberg Sisimiuni najukkaminit oqarasuaatikkut oqarpoq.
Ataatassarsiorsinnaasimanngitsut inatsisitigut ataataqaangitsunik taaneqartarput. Uersakkammi ataatassarsiornissaminnut, ataatami kinguliaqatigilernissaanut kingornussinissamullu meeqqat pillugit inatsisip Kitaani 1963-imi nunattalu sinnerani 1974-imi atuutilernera sioqqullugu pisinnaatitaaffeqanngillat.
Naalakkersuisut iliuuseqassasut
Nunatta tungaanniit Naalakkersuisut inatsisitigut ataataqanngitsut taarsiiffigineqarnissamik piumsaqarnerat taperseraat, meeqqanut inuusuttunut ilaqutariinnullu naalakkersuisup, Mimi Karlsenip KNR-imut oqaatigaa.
Naalakkersuisulli danskit naalakkersuisuinut inatsisitigut ataataqanngitsut pillugit suli iliuuseqanngillat.
Naalli Anne Sofie Hardenbergip Naalakkersuisut tapersiinerminnik ersersitsigaluartut tamanna iliuuseqarnermik kinguneqarnissaa kissaatigaa.
- Piumasaqaatitsinnik tapersiinerat ajunngilaq. Kisianni danskit naalakkersuisuinut iliuuseqartariaqartut isumaqarpunga. Danskit naalagaaffiannut attaveqarlutik sooq akissuteqannginnersut apeqquteqarsinnaapput.
Iliuuseqarnissamut piareersimajuaannartoq
Anne Sofie Hardenbergip atuakkiani ”Ataatamik ilungersuutit” 2009-mi saqqummersikkamiuk suliamik iliuuseqaqataavoq. Taassuma danskimik ataataqarluni kalaallimillu anaanaqarluni ataataqarnissamut pisinnaatitaaffeqannginneq qanoq nnersoq oqaluttuaraa.
- Tamanna iliuuseqarnissamut piareersimajuaannarnitsinnik isumaqarpoq, meeraanermimi inersimasuunermilu piimmatigineqarpugut. Suusoralunga isumaqassanngitsunga oqarfigineqartarpunga. Tamanna nuanninngilaq. Pingaartumik inersimasuniit oqarfigineqarneq, Anne Sofie Hardenberg 1948-mi inunngorsimasoq Qaqortumilu anaanamini ningiuminilu peroriartorsimasoq oqarpoq.
Aamma inatsisitigut ataataqanngitsuunerup inuttut kingunerluutaanik qulaajaanermi 2017-imi nalunaarusiaq meeraanermi piimmatigineqarneq pillugu oqaluttuassanik ilaqarpoq.
Anne Sofie Hardenbergillu danskit naalagaaffiannit taarsiiffigienqarneq anniaatinut nalaassimasaminut taarsiissutaasinnaanngitsoq erseqqissaatigaa. Suliarli tassunga suli pingaaruteqarpoq.
- Taarsiissuteqarneq anniaatinut meeraanermi inersimasuunermilu nalaassimasanut taarsiissutaassaaq. Taamaammat kontumut aningaasanik ikisoqalaarnissaa pitsaassaaq, Anne Sofie Hardenberg oqarpoq.
