Astrid Kragip inatsisitigut ataataqanngitsut taarsiiffigeqqunerat oqaaseqarfiginngikkaa
![](/sites/default/files/styles/image_934x467/public/article_images/astrid_krag_2.jpg?itok=ATQCtHAd)
Kalaallit inatsisitigut ataataqanngitsut danskit naalagaaffiannit taarsiivigineqarnissamik piumasaqarnerat, danskit isumaginninnermut utoqqarnullu ministeriata Astrid Kragip ersarissumik oqaaseqarfiginngilaa.
Kalaallimmi inatsisitigut ataataqanngitsut 27-t danskit naalagaaffiannit tamarmik immikkut 125.000 koruuninik taarsiiffigineqarnissamik piumasaqaateqarput. Taakkuami meeqqat pillugit inatsit nunatsinni suli atuutilinngitsoq uersagaapput aamma meeqqat allatuulli ataataqartitaanissaminnut pisinnaatitaaffeqanngillat, taamaammat taarsiiffigineqarnissamik piumasaqaateqarput.
AAMMA ATUARUK Inatsisitigut ataataqanngitsut danskit naalagaaffianit taarsiiffigineqarnissamik piumasaqaateqartut
Taarsiiffigineqarnissamik piumasaqaataat ministeriuneqarfimmut nassiunneqarsimasoq isumaginninnermut utoqqarnullu ministereqarfimmut ingerlateqqinneqarsimavoq.
Inatsisitigut ataataqanngitsut pillugit suliaq
- Meeqqanut isumaginninnermullu ministereqarfimmiit 2016-mi nalunaarusiami erserpoq, 1911-miit 1974-imut Kalaallit Nunaanni inatsisitigut ataataqanngitsut 8.000-it missaaniittut.
- Nalunaarusiaq naapertorlugu 2016-imi inatsisitigut ataataqanngistut 5.000 missaanniipput.
- Atuagaq ”Kampen for en far” 2011-mi saqqummersoq Kalaallit Nunaanni inuiaqatigiinni aalassatsitsivoq. Anne Sofie Hardenbergip ataatani danskiusoq najortiginagu peroriartornini atuakkiamini oqaluttuaaraa.
- Katuffik Ataata inatsisitigut atataqanngitsunut 2010-mi pilersinneqarpoq.
- Inatsisit 2014-mi allanngortinneqarput inatsisitigut ataataqanngitsut ataatassarsiorsinnaalersillugit ataataminnillu kingornussisinnaanngortillugit, kingornussassat agguaanneqareeersimanngippata.
- Inatsimmik allannguisoqartinnagu taamanikkut Naalakkersuisut Grønlandsudvalgillu kissaatigaat, inatsisitigut ataataqanngitsut kingornussisussaanngitsut aningaasatigut taarsiiffigineqassasut. Kissaataat taamani danskit naalakkersuisuinit itigartitsissutigineqarpoq.
- 2019-imi aningaasaqarnermut inatsimmi inatsisitigut ataataqanngitsunut suliniutinut atugassat koruunit 4,7 milliuunit immikoortinneqarput 2019-2023-mut paasissutissiinermut suliniutinut, katsorsarneqarnissamut suliniutinut aamma inatsisitigut siunnersorneqarnermut atugassat.
- Inatsisitigut ataataqanngitsut 27-t 125.000 koruuninik danskit naalagaaffiannit taarsiivigineqarnissamik piumasaqarput. Taakkua eqqartuussisuserisumit Mads Prammingimit sullinneqarput.
Tusarfik: Folketinget, Børne- og Socialministeriet, KNR.gl
Suliap piaarnerpaamik suliarineqarnissaa atorfilittaminut suliakkiutigisimallugu, Astrid Krag KNR-imut allappoq.
Danmarkip Kalaallit Nunaatalu akornanni kukkusoqartarsimasoq tamakkualu ilinniarfigissagivut, taanna aamma allappoq. Danskilli naalakkersuisui taarsiissuteqarniarnersut ersarissumik oqaatiginngilaa.
Ministeri: Meeqqat pillugit inatsit allanngoreerpoq, ikiorneqarsinnaalereerpullu
Meeqqalli pillugit inatsit Kalaallit Nunaanni 2014-imi atuutilertoq inatsisitigullu ataataqanngitsut taamaalillutik ataatassarsiorsinnaanngornerannut kingornussinissamullu pisinnaatitaaffeqalernerannut tunngaviusoq, taassuma innersuussutigaa.
Tamatuma saniatigut Folketingi 2018-imiit 2023-mut katillutik 4,7 millionit koruuninik inatsisitigut ataataqanngitsunut inatsisitigut iliuusissanut assigiinngitsunut immikkoortitsivoq.
Inatsisitigulli ataataqanngitsut tamarmik immikkut taarsiivigineqarsinnaanissaasa ajornakusuusoorsinnaanera, isumaginninnermut ministerip arajutsisimanngilaa.
Kingornussisussammi suli kingornussisimanngippata taamaappoq.
- Inatsisitigut ataataqanngitsut ilaannut ajoraluartumik kingusippallaarpoq, kingornussisussallu allat soorlu kingornussureersimasut aamma eqqarsaatigineqartariaqarput, Astrid Krag allappoq.
Meeqqat misileraataasimasut taarsiivigineqartut
Inatsisitigut ataataqanngitsut taarsiiffigineqarnissamik piumasaqaataannik tapersersuillutik piumasaqaataannilluunniit inatsisitigut naliliisitserusullutik, Danmarkimi partiit arlallit nalunaarput.
Danmarkimi partiit arlaannaalluunniit inatsisitigut ataataqanngitsut taarsiiffigineqarnissaannut maannamut akerliliinikuunngillat.
AAMMA ATUARUK Inatsisitigut ataataqanngitsuulluni peroriartortoq: Ataatama ernerigaminga miserratigiuaannarpaa
Meeqqat misileraataasimasut tamarmik immikkut 250.000 koruuninik taarsiiffigineqassasut, danskit naalagaaffiata februaarimi nalunaarutigaa. Ministeriuneq Mette Frederiksen danskit naalagaaffiata meeqqanik misileraasimanera pillugu pisortatigoortumik utoqqatsereersorlu tamanna pivoq.
Meeqqat misileraataasimasut taarsiiffigineqarnissamik piumasaqaataat danskit naalagaaffiata siullermik itigartitsissutigaa, eqqartuussivimmulli suliassanngortinneqartinnagu meeqqat misileraataasimasullu isumaqatigiissuteqarput.