Naalakkersuisut inatsisitigut ataataqanngitsut taarsiiffigeqqunerat tapersersoraat - naalagaaffilli nukingisaarnianngikkaat
Naalakkersuisut kalaallit inatsisitigut ataataqanngitsut 27-t tamarmik immikkut 125.000 koruuninik danskit naalagaaffiannit taarsiiffigeqqunerat tapersersorpaat.
Meeqqanut, inuusuttunut ilaqutariinnullu naalakkersuisoq Mimi Karlsen (IA) inatsisitigut ataataqanngitsut danskit naalagaaffiannit qaammatip siuliani taarsiiffigeqqoreersullu taama oqarpoq.
- Eqqunngitsumik pineqarsimasut taarsiiffigeqqummata paasilluarpakka. Taamaliornerat Naalakkersuisuni paasilluarlugulu taperserparput, Mimi Karlsen oqarpoq.
- Meeqqanut isumaginninnermullu ministereqarfimmiit 2016-mi nalunaarusiami erserpoq, 1911-miit 1974-imut Kalaallit Nunaanni inatsisitigut ataataqanngitsut 8.000-it missaaniittut.
- Nalunaarusiaq naapertorlugu 2016-imi inatsisitigut ataataqanngistut 5.000 missaanniipput.
- Atuagaq ”Kampen for en far” 2011-mi saqqummersoq Kalaallit Nunaanni inuiaqatigiinni aalassatsitsivoq. Anne Sofie Hardenbergip ataatani danskiusoq najortiginagu peroriartornini atuakkiamini oqaluttuaaraa.
- Katuffik Ataata inatsisitigut atataqanngitsunut 2010-mi pilersinneqarpoq.
- Inatsisit 2014-mi allanngortinneqarput inatsisitigut ataataqanngitsut ataatassarsiorsinnaalersillugit ataataminnillu kingornussisinnaanngortillugit, kingornussassat agguaanneqareeersimanngippata.
- Inatsimmik allannguisoqartinnagu taamanikkut Naalakkersuisut Grønlandsudvalgillu kissaatigaat, inatsisitigut ataataqanngitsut kingornussisussaanngitsut aningaasatigut taarsiiffigineqassasut. Kissaataat taamani danskit naalakkersuisuinit itigartitsissutigineqarpoq.
- 2019-imi aningaasaqarnermut inatsimmi inatsisitigut ataataqanngitsunut suliniutinut atugassat koruunit 4,7 milliuunit immikoortinneqarput 2019-2023-mut paasissutissiinermut suliniutinut, katsorsarneqarnissamut suliniutinut aamma inatsisitigut siunnersorneqarnermut atugassat.
- Inatsisitigut ataataqanngitsut 27-t 125.000 koruuninik danskit naalagaaffiannit taarsiivigineqarnissamik piumasaqarput. Taakkua eqqartuussisuserisumit Mads Prammingimit sullinneqarput.
Tusarfik: Folketinget, Børne- og Socialministeriet, KNR.gl
Ataatassarsiorsinnaasimanngitsut inatsisitigut ataataqaangitsunik taaneqartarput. Uersakkammi ataatassarsiornissaminnut, ataatami kinguliaqatigilernissaanut kingornussinissamullu meeqqat pillugit inatsisip Kitaani 1963-imi nunattalu sinnerani 1974-imi atuutilernera sioqqullugu pisinnaatitaaffeqanngillat.
Tamannalu inatsisitigut ataataqanngitsunut kingunerluutaasimaqisoq, meeqqanut isumaginninnermullu ministereqarfiup 2017-imi nalunaarusiarititaani erserpoq. Innarlerneqarsimanerat taarsiiffigeqqunermut aallaaviusoq, inatsisitigut ataataqanngitsut eqqartuussissuserisuat Mads Pramming oqarpoq:
- Tamanna taakkununnga sunniuteqangaatsiarsimanissaa qularutissaanngilaq, tamannalu peroriartornerannut ajornarnerulersitsivoq. Innarliineruvoq, taamaammat taarsiiffigineqarnissaat piumasaraarput, Mads Pramming KNR-imut qaammatip siuliani oqarpoq.
Inatsisitigullu assigiinngisitsisoqarsimanera kalaallinut ilaqutariinnut anniaataasimasoq, Mimi Karlsen aamma oqarpoq.
- Ingammik aataakkuusut aanaakkuusullu inatsisitigut ataataqanngitsunik aamma isumaginnittuupput. Ajornanngippallu taakkua aamma taarsiiffigineqartariaqaraluarput, inatsisitigulli ataataqanngitsut taarsiiffigeqqusut uani pineqarput. Tamannalu pissusissamisoorpoq, Mimi Karlsen oqarpoq.
Ikiuunnissamut piareersimasut
Danskit naalagaaffiat nunatta oqaluttuarisaanerani pingajussaanik taarseeqquneqarpoq. Meeqqani misileraataasimasuni suli inuusut tamarmik immikkut 250.000 koruuninik danskit naalagaaffiannit ukioq manna taarsiiffigineqarput. Taakkualu inatsisitigut ataataqanngitsut eqqartuussissuserisuat Mads Pramming aamma sullissisoraat. Meeqqat misileraataasimasut taarsiiffigineqarnissamik piumasaqaataat danskit naalagaaffiata siullermik itigartippaa, eqqartuussivimmulli suliassanngortinneqartinnagu meeqqat misileraataasimasullu isumaqatigiissuteqarput.
Naalakkersuisut siulittaasuata, Múte B. Egedep, nunatta naalakkersuisuisa danskit naalagaaffiata utoqqatsernissaanut nukingisaaruteqarsimannginnerat pillugu meeqqat misileraataasimasut marsimi utoqqatserfigai.
AAMMA ATUARUK Inatsisitigut ataataqanngitsuulluni peroriartortoq: Ataatama ernerigaminga miserratigiuaannarpaa
Inatsisitigut ataataqanngitsut taarsiiffigineqarnissaasa Naalakkersuisut danskit naalagaaffiannut nukingisaarutiginiarneraat nalunarpoq.
Naalakkersuisut suliami inatsisitigut ataataqanngitsunut tunngasumi qanoq tapersiiniarpat?
- Inatsisitigut ataataqanngitsut peqatigiiffiat pisariaqartutigut suleqatigissavarput, naalakkersuisoq Mimi Karlsen oqarpoq.
Danskit naalagaaffiat taakkununnga taarsiissuteqaqquniarpisiuk?
- Qanoq pisoqassanersoq takoqqaassavarput. Pisariaqarpat ikiussavagut.
Naalakkersuisulli danskit naalagaaffiata taarsiissuteqarnissaa piumasariniarpaat?
- Taamaaliulersaanngilagut, taarsiiffigeqquneralli aamma taperserparput, Mimi Karlsen oqarpoq.
Inatsisitigulli ataataqanngitsut danskit naalagaaffiannit taarsiivigineqarnissamik piumasaqarnerat, isumaginninnermut ministerip Astrid Kragip maannamut suli oqaaseqarfiginngilaa.
Suliap piaarnerpaamik suliarineqarnissaa atorfilittaminut suliakkiutigisimallugu, Astrid Krag KNR-imut allappoq.
Inatsimmi ilanngutinngitsuugaq
Folketingi inatsisitigut ataataqanngitsunut inatsisitigut iliuusissanut assigiinngitsunut soorlu tarnip pissusiinik ilisimasalimmik oqaloqateqarnissanut, inatsisileritooqarnissanut ataatassarsiornissanullu 2018-imiit 2023-mut katillutik 4,7 millionit koruuninik immikkoortitsivoq.
Meeqqat pillugit inatsit ukiut arfineq-pingasut matuma siorna allanngorpoq, inatsisitigut ataataqanngitsut ataatassarsiorsinnaalersillugit ataataminniillu kingornussassat agguaanneqareeersimanngippata kingornussisinnaanngortillugit. Qimagaasut tamarmik kingornussisussaatitaanissaat inatsimmik allannguinermi qulakkeerneqanngimmat, inatsisitigut ataataqanngitsut ilarpaaluisa taamanikkullu Grønlandsudvalgiusup Naalakkersuisuusullu inatsisip taassuma allanngunnginnerani tamanna isornartorsiorpaat.
Danskimmi naalagaaffiata inatsisitigut ataataqanngitsut taamanikkut taarsiiffigiumanngilai.
Inatsisitigut ataataqanngitsut tamarmik immikkut taarsiivigineqarsinnaanissaasa ajornakusuusoorsinnaanera, isumaginninnermut ministerip Astrid Krag arajutsisimanngilaa.
- Inatsisitigut ataataqanngitsut ilaannut ajoraluartumik kingusippallaarpoq, kingornussisussallu allat soorlu kingornussereersimasut aamma eqqarsaatigineqartariaqarput, Astrid Krag KNR-imut allappoq.
Inatsimmik allannguinissaq naalakkersuisup Mimi Karlsenip ammaffigaa.
- Inatsimmik allanngunissaq Naalakkersuisunut immikkut suliassiissutigineqassappat, suliassap qanoq ingerlakkumaarsinnaanissaanut misissueqataassaagut. Taamaattoqassappat suliassiissutigineqarnissaa utaqqigallassavarput, Mimi Karlsen oqarpoq.
