Inatsisartut ima akissarsiaqarput
Politikkimik sulinermi atukkat pitsanngorsarnissaannut siunnersuutit arlallit Inatsisartut ukiaanerani ataatsimiinneranni oqallisigineqassapput. Partiimut tapiissutit 30 procentimik qaffanneqassapput, Inatsisartunilu ilaasortat ilaqutaat akiliutsillutik ukiumut marloriarlutik Nuummukartarnissaat periarfissaalissasoq eqqartorneqartussanut ilaapput.
Ilaqutaasut ukiumut ataasiarlutik maannakkut Nuummukarnissaminnut akiliunneqartarput. Inatsisartunili ilaasortat qanoq aningaasarsiaqartigippat
Tunngaviusumik aningaasarsiat akileraannginnermi ukiumut 346.602 koruuniupput. Taakkua ukioq manna taama annertussuseqarput. Aningaasaqarnermut sulisoqarnemullu aqutsisoqarfik KNR-imut taama paasissutissiivoq.
Inatsisartut tunngaviusumik aningaasarsiamik saniatigut arlalinnik tapeqarput. Siullertut tapi nalinginnaasoq, tassa 16.836 koruuniusoq ukiumut ataasiarlutik pisarpaat, tapilu immikkut ittoq 71.552 koruuniusoq aamma ukiumut pissarsiarisarlugu.
Inatsisartuni ilaasortat aningaasartuuteqarnerminnut immikkut aamma tapisisarput, taannalu ukiumut 50.000 koruunimik ataasiartumik pisarpaat. Aningaasartuutit matussuserneqarnissaannut tapi taanna pereeraangamikku ukiumut 484.990 koruunisisarput.
AAMMA ATUARUK Aaja Chemnitz marlunnik ilaasortaaffeqarnermini millionit sinnerlugit isertitaqalissaaq
Inatsisartut siulittaasuat maanna Lars Emil Johanseniusoq siulittaasuunersiutitut immikkut aamma tapimik pisarpoq.
Tapi taanna ukiumut 120.930 koruuniuvoq.
Tamatuma saniatigut Inatsisartut siulittaasuat Inatsisartunut allanut sanilliullugu aningaasarsiaqarneruvoq, tassa løntrin qaffasinnerusoq pissarsiarisaramiuk.
Taamaalilluni siulittaasup aningaasarsiai ukiumut 759.962 koruunisisarpoq. Inatsisartuni ilaasortanut nalinginnaasunut sanilliullugu 275.000 koruunit missaannik aningaasarsiaqarnerulluni.
Siunnersuutit partiinut tapiissutinut tunngassuteqartut, Inatsisartullu ilaqutaasa akiliunneqarlutik angalatittalernissaanut tunngassuteqartoq Inatsisartuni siullermeerneqarluni oqallisigineqassapput.
AAMMA ATUARUK Partiit imminnut tapiissutaasartut amerlinissaannut periarfissinneqartut
AAMMA ATUARUK Demokraatit partiinut tapiissuteqarnerunissaq akerlerigaat
