Partiit imminnut tapiissutaasartut amerlinissaannut periarfissinneqartut
Inatsisartummi siulittaasoqarfiat naalakkersuinikkut sulinermut aningaasatigut tapiissuteqartarneq pillugu inatsisip allanngortinneqarnissaanik siunnersuuteqarpoq. Tapiissutit 2006-imit iluarsiissuteqarfigineqarsimanngillat, ukiumullu tapiissutit nalingi 2006-imut naleqqiullugit 30 procentingajammik annikilleriarsimallutik.
Partiit kingullermik qinersinermi Inatsisartuni qinikkanik sinniisuutitaqalersut partiip naalakkersuinikkut sulineranut ukiumut 650.000 koruuninik tunngaviusumik tapiiffigineqartarput. Taakkulu 850.000 koruuninut amerlineqassapput. Tamatumalu saniatigut partiip qinigaatitaanut ataatsimut 210.000 koruunit tapiissutaarsarput, taakkulu 275.000 koruuninut amerlineqassapput.
Aammattaaq siunnersuutigineqarpoq tapiissutit siunissami Nunatsinni kisitsit akinut iluarsiissutaasartoq malillugu ukiut tamaasa iluarsineqartassasut.
AAMMA ATUARUK Danskit partiimut tapiissutaat Siumup pisartagariinnassavai
Partiit sisamat Inatsisartuni maannakkorpiaq sinniisuutitaqarput attaviitsorlu ataasiulluni, taakkulu ukiumut katillugit 9.110.000 koruuninik tapiissutisisinnaatitaapput. Inatsisartut taamatut katitigaatillugit siunnersuutikkut tapiissutit tamarmiusut 11.925.000 koruuniussagaluarput - tassalu tapiissutit 2,8 millionit koruuninik amerlineqarlutik.
Siunnersuummut oqaasertaliussani atorfilittat allapput partiinut tapiissutaasartut amerlineqarnerat partiini sulisut amerlineqarnerannik kinguneqarsinnaasoq, taamatullu pisoqarpat ilaasortat siunnersuutaasa § 37-ilu naapertorlugu apeqqutaasa amerlanerulernissaat naatsorsuutigineqarsinnaasoq.
Tamatumalu Namminersorlutik Oqartussani sulisutigut piariaqartitsineq annertunerulersissinnaavaa Inatsisartullu ataatsimiinneri sivitsorneqartariaqalersinnaallutik.
Siulittaasoqarfiup aamma erseqqissaatigaa tapiissutit neqeroorutaasut partiinit naaggaarneqarsinnaasut.
