Inatsisartut cannabis pillugu oqallinnerat: Innuttaasut taasitinneqassasut Naleqqap piumasaraa

Cannabis nunatsinni inerteqqutaajunnaarnissaanik innuttaasut taasitinneqassasut, Naleqqap oqaaseqartartuat, Jens Napãtôk, inatsisartut upernaakkut ataatsimiinneranni ullumi pingasunngornermi oqarpoq.

- Uagut isumaqarpugut paasissutissat amerlasoorpassuit nunarsuaq tamaat pigineqarmata ajoqutai ajunngequtaallu tamavimmik paasititsiniutigeriarlugit, qinersititsisoqaqqilerpat innuttaasunut taasititsissutigineqarniarli, Jens Napãtôq oqallinnerup kingunitsianngua KNR-imut oqarpoq.

Taassuma oqarnera naapertorlugu, innuttaasut aangajaarniutinut tunngatillugu taasitinneqartareernikuummata, taamaaliorneq nutaajunngilaq. Kommuninimmi arlaliusuni imigassanut tunngatillugu taasititsisoqareersoq, taanna oqarpoq.

Uani assersuutigivaa Qaanaami imigassap 2007-imi inerteqqutaalernikuunera, 2013-imi taasititsissutigineqarnera.

- Taamaammat innuttaasut namminneq aaqqiinissaminnut aqqutissiorneqarnissaannut ikiaroornartoq peqataaffiginiarlissuk, ajoqutai pitsaaqutaalu nalilersoriarlugit taasisitsissutigalugu, amerlanerusut kissaatigippassuk ammaanneqassasoq taava ammaanneqarniarli, taanna oqarpoq.

Politikerillu taasitinneqassappata, nammineerluni qanoq taasiniarluni nalornisinngilaa.

- oqaluttarfimminngaanniit taasisoqassappat, uanga ammaanneqarnissaanik taasissallunga oqaatigereerpara, Jens Napãtôq oqarpoq.

Inatsisartunili oqallinnermi cannabissip iluaqutissartaa ajoqutissartaalu misissorneqarluarneratigut aatsaat aalajangiisoqarnissaannik kissaateqarput.

Iluaqutissartaa ajoqutissartaalu

Cannabissip nunatsinni inerteqqutaajunnaarnissaa Atassutip siulittaasuata Aqqalu Jerimiassenip januaarimi oqallissaarutissatut qaqilermaguli oqallisaalerpoq. Taamani taassuma Facebookimut quppernerminut nunatsinni partiinilu oqallisigineqarnissaanik kaammattuuteqarpoq.

Partiit tamarmiusut cannabissip oqallisigineqarnissaanik piareersimanerarput.

Kingorna Inuit Ataqatigiinneersup, Kristian Jeremiassenip, nunatsinni hashi inerteqqutaajunnaassappat iluaqutissartaanik ajoqutissartaanillu nalunaarusiorneqassasoq Naalakkersuisunut siunnersuutigaa. Inerteqquteqarunnaartoqassappallu qanorpiaq iliortoqassasoq nalunaarusiami allaqqassasoq ilanngullugu siunnersuutigaa.

Nalunaarusiortoqarnissaanik siunnersuut Naalakkersuisumit ammaffigineqarpoq. Allannguutissatulli siunnersuummi, peqqissutsimut naalakkersuisup, Mimi Karlsenip (IA), inerteqquteqarunnaarsitsinissaq peerneqarnissaanik oqariartuuteqarpoq, tamanna kingorna tikinneqarsinnaasoq taanna isumaqarpoq.

Ikiaroornatup cannabissip ajoqutissartarpassuanik nalunngissaqartoqareersoq, Mimi Karlsen oqaluttarfimmi oqarpoq. Inerteqquteqarunnaartoqassappallu peqqinnissaqarfik artukkeqqareersoq suli artukkerneqaqqissinnaaneranik oqariartuuteqarpoq.

Oqallinneq aallartippoq

Cannabissi pillugu Inatsisartuni oqallinneq aallartittoq, Aqqalu Jerimiassenip nuannaarutigaa.

- Soorunami soqutiginaateqarpoq, nuannerpoq kiisami Inatsisartutigut oqallisigineqarmat. Oqallinnerli itinerulaarsimasinnaagaluartoq uani isumaqarpunga, partiip siulittaasuat KNR-imut oqarpoq.

Taasuma cannabissip inatsisartuniinnaanngitsorli innuttaasunit aamma oqallisigineqarnissaa kissaatigaa.

- Akisussaaffik inuiaqatigiinnut uanga tunniukkusunnerpaajuara. Ajornartorsiut ukiorpassuarni asuli isiginngitsuusaaginnarneqarnikuuvoq paquminarsarneqartarluni, taanna oqarpoq.

Aqqalu Jerimiassenip, Jens Napãtôq taperserlugu innuttaassut taasitinneqarnissaanik aamma kissaateqarpoq.

Ikiaroornartup cannabissip ajoqutissartai iluaqutissartaasalu nalunaarusiornissaannik Inatsisartuni taasititsinissaq maajip qulinganni siullermeerneqassaaq.

Partiit tamarmiusut nalunaarusiortoqarnissaanut soqutiginnipput.