Illuatungiliuttut ilannguttut: Partiit tamarmik cannabis pillugu oqallinnissamut piareertut

Illuatungiliuttut partiivi Demokraatit Nalerarlu cannabis pillugu oqallinnermut ilanngunnissamut piareerput.

Atassutip siulittaasuata, Aqqalu Jerimiassenip oqallinnermik Facebookimi quppernermini aallartitsinerata kingorna taakku ilanngupput.

Nunatsinni ikiaroornartoq pillugu suliat amerliartuinnarnerata kingunerisaanik taanna oqallitsitsilerpoq.

Naalakkersuisoqatigiit partiivi, Inuit Ataqatigiit Siumullu cannabis pillugu oqallinnissamut aamma piareersimallutik ippassaq KNR-imut oqaatigaat.

Taamaalillutik Inatsisartuni partiit tamarmik ammasumik oqallinnissamut piareerput.

AAMMA ATUARUK Aqqalu Jerimiassenip hash akuerisaassanersoq oqallikkusuttoq

Partiillu taama oqallinnissaat aamma piffissanngortoq, Demokraatit siulittaasuata tullersortaa, Nivi Olsen oqarpoq:

- Inuiaqatigiinni ajornartorsiuteqarpugut annertuumik. Hashimik atornerluineq inuiaqatigiinni ajornartorsiutitta annerpaat ilagaat. Taamaammat tamanna pillugu oqallinnissarput pisariaqarpoq. Aaqqiissuteqarsinnaalernissatsinnut eqqartortariaqarlutigulu oqaluuserisariaqarparput, taanna oqarpoq.

Naleqqamit Jens Napaattuup nunatsinni ajornartorsiutit ilaatigut ikiaroornartumik niuernermut tunngasoq pillugu ersarissumik oqallinnissamut aamma piffissanngorsoraa.

- Nunarpassuit ammaannerullugu inissipput. Aamma ammanerusumik eqqartortarlugu aaqqissuussiffigivaat. Taamaalilluni pinerluttuliorluni aningaasarsiupilunnerata saniatigut aqutaanerusumik annertussusaa atugaanera ersarinnerulerluni inissinnerulerluni pitsaaqutitaqarpoq, kisianni aamma napparsimalersartut atuivallaarlutik aanngajaarniutinik imigassaagaluarpat ikiaroornartuugaluarpat taamatut inissittartut amerlavallaannginnissaat avaqqunniagassaavoq.

Jens Napaattuup Nivi Olsenillu cannabisimut tunngatillugu qanorpiaq isumaqarnerlutik oqaatigisinnaanngilaat.

Oqallinneq sumut tunngassava?

Aqqalu Jerimiassenip nunatsinnut partiinullu allanut oqallinnissamut qaaqqusisup cannabis pillugu oqallittoqarnissaa siullertut kissaatigaa.

Oqallinneq sumut tunngassanersoq suli isummerfiginagu taassuma oqaatigaa.

Kisianni oqallinneq hashimut kisimi tunngassanngitsoq qularutissaanngilaq. Cannabisinulli assiigiinngitsunut tamanut tunngassaaq.

Taassuma oqallinneq cannabisimut akerliujunnaarnermut tunngassanersoq aamma naluaa. Oqallinneq sukaterinerunermut ikiaroornartumillu pinerluuteqartunut akiuiniarnerunissamut aamma tunngasinnaasoq taanna isumaqarpoq.

Taassuma Inatsisartuni suleqatai aamma taama tunngaveqarput.

AAMMA ATUARUK Koalitionen er åben for at debattere hash, men er ikke sikker på, at legalisering er en god ide

Partiit arlaannaalluunniit suli aalajangersimasumik isumminngilaq. Tamarmik oqallisigineqarsinnaapput.

- Aaqqiissutit suut ujartussanerigut oqaluuserissavarput. Haship inerteqqutaajunnaarsinneqarnera qanoq kinguneqassava? Suut iluaqutaassappat suut ajoqutaassappat?  Oqallinnermut hashimik atornerluisuunermut tunngatillugu aqqut suna qinissaneripput ilusilissavaa, Nivi Olsen oqarpoq, nangillunilu:

- Oqallitta inuiaqatigiinnilu ajornartorsiutinik aaqqiissutissarsilluta.

Partiilli tamarmik ukiuni kingullerni haship politiinit arsaarinnissutaasup annertusiartortup, inuillu hashimik iioraasimallutik anngiortumik eqqusseriaraluarlutik toqusut amerlassusaat ajornartorsiutaangaatsiarsoraat.

- Inuit qulaaninngaanniit inatsisitigut ammut pinngitsaalillugit malitassaannik aaqqissuussiniarneq iluatsissinnaanngitsoq uuma uppernarsarpaa, Jens Napaattooq oqarpoq.

Suliat amerliartortut

Nunatsinni ikiaroornartumik anngiortumik eqqussuinermi siorna tigusarineqartut 2021-mut sanilliullugit pingasoriaammik amerlanerupput. Amerlanerpaat hashimik eqqusseriaraluarlutik tigusarineqarput.

2021-mi hashi 97,4 kiilu arsaarinnissutigineqarpoq. Tamanna ukiuni kingullerni tallimani arsaarinnissutaasumit agguaqatigiissillugu 64 kiiluusumit annertunerungaatsiarpoq.

Tamanna politiit 2021-mi ukiumoortumik naatsorsueqqissaarnerata takutippaa.

AAMMA ATUARUK Hashi 12 millionit koruuninik nalilik RAL-ip umiarsuaani nassaarineqartoq

Tamatuma saniatigut ikiaroornartumik iioraasimalluni eqqusseriaraluartumik siorna oktobarip 20-ani toqusoqaqqippoq. Angut Qaqortumeersuuvoq, taassuma haship poortorsimasup erlaviinut katersuussimanera toqqutigaa.

Taanna ikiaroornartumik iioraalluni eqqusseriaraluarlutik toqusut ukiup affaata ingerlanerinnaani pingajoraat.