Naalakkersuisoqatigiit ikiaroornartoq oqallisigerusuppaat, akuerisaanissaali isumatsialaanersoq apeqquserpaat
Aqqalu Jerimiassenip ikiaroornartut nunatsinnut eqqussuunneqartartut ajornartorsiutaanera pillugu Facebookimut quppernerminut oqallissaarutissaminik ippassaq pingasunngornermi saqqummiivoq.
Oqallissaarummini ilaatigut ikiaroornartoq nunatsinni akuerisaassanersoq sukateriffigineqassanersorluunniit oqallissaarutigaa.
Tamanna innuttaasut Facebookkikkut assigiinngitsorpassuarnik isummerfigaat.
Aamma partiit assigiinngitsunik isumaqarput.
AAMMA ATUARUK Aqqalu Jerimiassenip hash akuerisaassanersoq oqallikkusuttoq
Inuit Ataqatigiinniit aamma Siumumit nunatsinni ikiaroornartoq pillugu oqaalittoqarnissaanik isumaqataapput.
- Ajornartorsiutit suulluunniit, inuiaqatigiinni ajornartorsiutigisagut isumaqarpunga oqallisiginissaat pingaaruteqartoq. Minnerunngitsumik aamma inuiaqatigiit akornanni oqallisigineqarnissaa pingaaruteqartorujussuuvoq, Inuit Ataqatigiit siulittaasuata tullia, Agathe Fontain oqarpoq.
Tamanna Siumut oqaaseqartartuanit Hans Peter Poulsenimit isumaqatigineqarpoq, aanngajaarniutilli nunatsinni akuerisaassanersut taassuma apeqqusernartoqartippaa.
- Siullermik ikiaroornartup malitsigisaanik ajornartorsiutaasartut. Aamma ukiuni kingullerni nunatsinni ikiaroornartut nunarsuarmiooqataajartornitta malitsigisaanik amerliartorneri eqqartortariaqaripput isumaqarpunga, taanna KNR-imut oqarpoq.
Pitsaaqutaa pitsaanngequtaalu
Hashimik siornaak 97,4 kilomik arsaarinnittoqarpoq. Taanna ukiuni kingullerni tallimanik agguaqatigiisillugu arsaarinnissutigisartumik annertunerungaatsiarpoq. Ukiummi kingulliit tallimat agguaqatigiisillugu 64 kilo hashi arsaarinnissutigineqartarpoq.
Tamanna politiit 2021-mi ukiumut nalunaarusiaanni erserpoq.
Ikiaroornartulli ajornartorsiutaanera akiorniarlugu iliuuseqaqatigiinnissaq Aqqalu Jerimiassenip aamma ujartorpaa.
Tassunga tunngatillu Inuit Ataqatigiit ima oqaaseqarput:
- Taamaammallu inatsisartuni aamma eqqartussavarput, isummersorluarumaarpugut kisianni aamma pingaartorujussuuvoq inuiaqatigiinni aamma isummersoqataanissaq. Assigiinngitsut isummersortussat politiit, peqqinnissaqarfk, atuarfeqarfiit, kommunit tamarmik isummersoqataalluarnissaat pingaaruteqartorujussuuvoq., Agathe Fontain oqarpoq.
Ikiaroornartup sinerissamit aamma oqallisigineqarusuttarnera, Hans Peter Poulsenip maluginiartarpaa.
- Ataatsimiititalianiit sinerissami angalagaangatta naapitatta ikiaroornartup eqqartorneqarnissaanut soqutiginittarput.
- Inatsisit qanoq iluarsaanneqassanersoq imaluunniit allanngortinneqassanersoq, taava suna pinerlugu ilisimasagut annertusaqqaartariaqarpagut, Hans Peter Poulsen oqarpoq.
