Inatsisartut aalajangiipput: Sukkut tipigissaatillu akikinnerusut sodavandillu assigiimmik akeqartut
Naqqiineq: Ilanngutassiami siusinnerusukkut kiisalu Qanoruumi ilanngutassiami akitsuutit 2025-mit aatsaat atorunnaarsinneqassasut saqqummiunneqaraluarpoq. Tamanna eqqortuunngilaq. Atorunnaarsitsineq inatsisip aalajangersarneqarnerani atuutilissaaq. KNR-ip kukkuneq ajuusaarutigaa.
Sodavandinik mamarisaqartunut nutaarsiassatsialaqarpoq. Akimmi nunatsinni tamarmi assigiissilerniarneqangajalerput – tassami pisiniarfiit imeruersaatinik eqqussinissamut akiliutigisartagaat naleqqussarneqassapput.
Inatsisartut upernaakkut ataatsimiinnermi ullormi ataatsimiiffiusumi kingullermi tamanna aalajangerpaat. Tassa imeruersaatinut akitsuutit Qaanaaq, Ittoqqortoormiit Tasiilarlu minillugit sumiiffinni allani tamani inatsit inissivinneqariarpat appartinneqassapput. Tamannami aalajangersarluarneqaqqaassaaq.
Tassa nunatsinni sumiikkaluaraanniluunniit imeruersaatinik mineralvandinik, sodavandinik, limonadenik assigiinnik akitsuutilinnik pisisoqarsinnaalissaaq.
Qaanaammi, Ittoqqortoormiini Tasiilamilu akitsuutit sumiiffinnit allanit appasinerugaluarput.
Akitsuut taanna kisimi pineqanngitsoq
Sodavandinut akitsuut appartinneqassanersoq peerneqassanersorluunniit Inatsisartut upernaakkut ataatsimiinnermi matumani taamaallaat aalajangiiffigisussaanngilaat.
Marlunngornermi oqallinnermi tipigissaatinut, sukkunut, sirupinut glukosenullu akitsuutip appartinneqarnissaa amerlanerussuteqartut aamma akueraat. Sukkunut akitsuut ukioq manna ukiup nikinneranit atorunnaarsinneqareerpoq, inatsilli nutaaq pissutigalugu aalajangerneq una atajuartussanngortinneqarpoq. Taamaammat aningaasat annikinnerusut atorlugit iffiortoqarsinnaalissaaq.
Tamatuma saniatigut qummoroortartunik eqqussuinermut akitsuutip affaannanngortinneqarnissaanut aamma siunnersuuteqartoqarpoq.
Inatsisissarli siullermeerlugulu aappassaaneerneqarmat Inatsisartunit taperserneqanngilaq. Taamaammat Naalakkersuisut inatsisissap pingajussaaneerneqarnissaannut immikkoortup taassuma peerneqarnissaanut allannguutissatut siunnersuuteqarput, taamaammat qummoroortartut akikinnerulissanngillat.
Akitsuutinik allanngortitsineq nunatta karsianut isertitat ukiumut 14 millionit koruunit missaannik annikinnerulersitsissasoq missiliorneqarpoq.
Inatsisartut isertitassanit annaasat sipaarniarnikkut matussuserneqassasut aamma aalajangerpaat, taanna 2025-mut kingornanullu Aningaasanut inatsisissatut siunnersuummut ilanngunneqassaaq.
