Pisiniarfiit akit qaffasinnerat pillugu: Akitsuutit angallassinerlu sodavandinut akisutitsipput

Sodavandit eqqussorneqartut naatsorsuutigisamit akisunerupput, politikerilli pisiniarfiillu akit qaffasinnerannut kina akisussaasuunersoq isumaqatigiinngissutigaat.

Allattoq Lærke Schmidt Fallesen

februaarip 08-at 2024 07:53

Nutserisoq Connie Fontain

- Tassa aamma uanga tupaallaatigivakka taama akisutigilerneri.

Nunalerinermut, imminut pilersornermut, nukissiutinut avatangiisinullu naalakkersuisoq, Kalistat Lund (IA) KNR-imit sodavandit nutaat pisiniarfinni akisuneri pillugit sapaatip akunnerata siuliani aperineqarami oqarpoq.

Taassuma sodavandit 2024-mi akisunerulernissaat naatsorsuutiginagu siorna ukiakkut erseqqissaatiginikuugaluarpaa. Utertitseriaaseq nutaaq atuutilerpat pisiniarfinnilu sodavandit nutaat tikisinneqartut ammarneqarpata akit taamaaginnarniaraluarput.

PUIAASANUT INATSIT NUTAAQ

Imeruersaatit puui pillugit nalunaarutip utertitsisarnermilu aaqqissuussinerup allanngortinneqarnissaannik Inatsisartut Naalakkersuisunut 2022-mi ukiakkut peqqusippuut.

Allannguutit kinguneraat, immiaaqqat, sodavandit siornatigumut sanillillugu annertuninngorlugit tunineqarsinnaassasut, puullu assiginngitsut amerlanerit siornatigumut sanilliullugu atorneqarsinnaassasut.

Peqatigitillugu aalajangerneqarpoq utertitsisarnermi aaqqissuussinermi puiaasat qillertuusat puiaasallu plastikkit utertinneqartarnissaat isumagineqassasoq.

Utertitseriuserli nutaaq isornartorsiorneqangaatsiarpoq, pisiniarfiimmi nalunaarut kingusinaartumik takkuttoq isumaqarput.

Nuuk Imeq sodavandinik immiaaqqanillu maqitsinermut siornatigut kisermaassisuugaluarpoq. Taakku unammillersinnaanissartik ilimaginagu januaarip aallaqqaataanit matuniarlutik aalajangerpaat.

Allisiguk

Taamali pisoqanngilaq. Sodavandit akii sumiiffinni amerlasuuni ukiup nikinnerani akitsungaatsiarput.

Kalistat Lundillu oqarnera naapertorlugu tamanna pisiniarfiit akinik qaffasitsitsiniarlutik nammineq aalajangernerannik siullertut pissuteqarpoq.

Pisiniarfiilli taamaattoqannginnerarpaat. Taakku aperigaanni sodavandit eqqussorneqartut nunatsinni maqiterneqartunit akisunerunissaat politikerit tupaallaatigisariaqanngilaat.

Assartuineq akisusoq

Puiaasammi qularnaveeqqutaat puuilu ungasissumit assartorneri aamma akisunerungaatsiarput.

- Nioqqutissat siullermik nunami pisiffigisatsinni assartorneqartarput, quersuarmullu pigaangamik nioqqutissaatigut poortorneqartarput. Tamatuma kingorna nunatsinnut nassiunneqassapput, taakkulu immiaaqqanit sodavandinillu Nuummi maqiterneqartunit pisiarisartakkatsinnit annertunerungaatsiarput.

- Tamatuma kingorna assartuineq, toqqorsivimmiitsitsineq illoqarfimmi nioqqutissap tuniniarneqarfissaani isumaginninneq, Brugsenip pisiortornermut pisortaa, Randi Vestergaard Evaldsen KNR-imut allappoq.

Ukiullu nikinnginneranut sanilliukkaanni tassani Nuuk Imermit sodavandit maqiterneqarlaat illoqarfiit pingaarnersaanni pisiniarfinnut ingerlanneqartariaannaaneranni imaluunniit Nuummiit sinerissami pisiniarfinnut assigiinngitsunut nassiunneqariaannaaneranni assartuineq sivikinneruvoq, assartuinermilu aningaasartuutit appasinnerungaatsiarlutik.

Aamma atuarukNuuk Imeq ullumikkut matuvissorpoq

Politikerit sodavandit akisunerunissaat aamma ilimagereersimassagaluaraat Pisiffik aamma isumaqataavoq:

- Politikerit namminneq akitsuutinik atulersitsisuullutik sodavandit akiinut tupigusuutiginninnerat uissuumminarpoq. Ajornaatsumik naatsorsuinerup assartuinermi aningaasartuutit, puuinut akitsuutit, sodavandinut akitsuutit akitsuutillu sodavandit akiinut sunniuteqangaatsiartut takutippaa, Pisiffimmi Niuernermut, Attaveqatigiinnermut CSR-imullu pisortaq, Tina Hansen KNR-imut akissummi allappoq.

Akitsuuteqarunnaarpat akit appassasut

Tina Hansenip Pisiffiup sodavandinut iluanaarutaa qaffanngitsoq akissummini ilanngullugu erseqqissaatigaa. Attaveqaqatigiinnermulli pisortap Namminersorlutik Oqartussat aaqqissuussinermit nutaamit aningaasat iluanaarutigisaat qanoq pineqarnissaat pillugit pilersaarummik ersarissumik takusaqarusuppoq:

- Naak nioqqutigisinnaasatta amerlinissaannut periarfissaqalernerput pisisartutsinnullu toqqagassaqarnerulersitsinerput nuannaarutigigaluarlugu Namminersorlutik Oqartussat saniatigut 100 millionit koruunit sinnerlugit saniatigut isertitaqarnissaat taakkulu innuttaasunut qanoq iluaqutaanissaannik pilersaaruteqannginnerat eqqarsarnartoqartippara.

Attaveqaqatigiinnermullu pisortap politikerit akinut aamma appaaqataapallassinnaanerarpai:

- Ataaserlu qularnanngilaq: Akitsuut peerneqarpat pisisartutta pisiassat akikinnerusut aamma takusinnaalissavaat.

Sodavandi qillertuusaq 33 centiliteri nunatsinnut eqqunneqaraangami pingasunik akitsuuserneqartarpoq. Taakku katillugit 6 koruuninik naleqartarput. Sodavandimut literimut aalajangersimasumik 7,5 koruunimik akitsuuteqarpoq, puiaasanut akitsuut 2 koruunit aamma 90 øremik naleqarpoq, tamatuma saniatigut puiaasat utertittagaanerannut akitsuut 60 øre.øre.