Kalistat Lundip sodavandit akisungaatsiarneri tupaallaatigai, pisiniarfiilli pisuutikkai
Amerlasuut sodavandit pisiarineqarsinnaasut ukiup nikinneranit toqqagassarpassuulerneri nuannaarutigivaat.
Pisisartulli kisiartaallutik akinut sungiusimasatsinnit qaffasinnerusunut tupaallanngillat.
- Tassa aamma uanga tupaallaatigivakka taama akisutigilerneri, nunalerinermut, imminut pilersornermut, nukissiutinut avatangiisinullu naalakkersuisoq, Kalistat Lund (IA) KNR-imut oqarpoq.
Sodavandi liiterip affaa Nuuk Imermeersoq puua ilanngullugu 19 koruuneqarpoq, avataaniilli tikisitaq taama imartutigisoq puua ilanngullugu maanna 27 koruuneqarluni, tassa 8 koruuninik akisunerulerpoq.
Amerlasuut akit qaffangaatsiannginnissaat neriuutigisimagaluarpaat. Kalistat Lundilu aamma taama isumaqarpoq.
Taanna Qanoruumut siorna septembarip aallaqqaataani sodavandit nutaat akissaannut atatillugu ima oqarpoq:
- Naamik taanna naatsorsuutigineqanngilaq akisunerulernissaa. Aamma akikinnerulernissaa siunertaanngilaq.
Naalakkersuisut sodavandit akiisa allanngornissaat naatsorsuutiginagu aggustip naanera tusagassiuutinut nalunaarummi allappaat.
Taakku maqiterivik Nuuk Imeq nioqqutissanut nutaanut unammillersinnaanaviarnani naliliineranik tunngavilersuuteqarput. Nuuk Imeq nunatsinni immiaaqqanik sodavandinillu maqiterinermut kisermaassisuugaluarpoq, taakkuli ukiup nikinneranit matuinniarlutik aalajangerput.
Naalakkersuisut tamanna sodavandit nutaat Nuuk Imermeersut akiannut assingunissaannut takussutissaasutut aalajangerpaat.
Pisiniarfiimmi sodavandinut eqqussukkanut akitsuutinut akiliisarnermisulli Nuuk Imermit nioqqutissanut eqqussuinermut akitsuummik akiliineq ajorput. Naalli taamaattoqaraluartoq Nuuk Imiup unammillersinnaanissani naatsorsuutiginngilaa, taamaammallu akit assigiiginnassasut naalakkersuisut nalilerpaat.
Naliliinerli taanna uniuinerungaatsiarpoq.
Pisiniarfiit paasisimasaqarnerusut
Kalistat Lundip akit qaffakkiartornerannut pisiniarfiit akisussaanerarpai, taassumammi oqarnera naapertorlugu pisiniarfiit nioqqutissat qanoq akeqarnissaannut naggataani aalajangiisartuupput.
Taakkulu suleriaasiat malillugu tassa naatsorsuutiginnerit ingerlasimavoq tassa Brugseni niuerferujussuaq oqarsimammat akikinnerulerumaarput, soorunalimi naatsorsuutigaara taava, taakku ilisimaqqissaarmassuk suliartik, naalakkersuisoq oqarpoq.
Pisiniarfiilli puiaasanut akitsuut iliuuseqarfigineqanngippat akit soorunami qaffakkumaartut tusagassiuutit aqqutigalugit arlaleriarlutik oqaatigaat.
Sodavandi qillertuusaq assersuutigeriaraanni nunatta avataaniit eqqunneqarnerminni assigiinngitsunik pingasunik akitsuuteqarpoq. Tamannalu katillugit 6 koruunimik naleqarluni. Sodavandimut literimut aalajangersimasumik 7,5 koruunimik akitsuuteqarpoq, puiaasanut akitsuut 2 koruunit aamma 90 øremik naleqarpoq, tamatuma saniatigut puiaasanut utertittagaaneranut akitsuut 60 øre.
Sooruna neriorsuutit piviusunngortinneqanngitsut?
- Uanga neriorsuinngilanga, aperineqarama akitigut qanoq inissisimasoqalerumaarnersoq oqaannarpunga naatsorsuutiginngilanga, tassa ilaa una neriorsuinerit naatsorsuutiginninnerillu assigiinngillat, Kalistat Lund oqarpoq.