Naalakkersuisup akit aalaakkaanissaat neriorsuutigaa, sodavandilli akitsortut

Januaarip aallaqqaataanit pisiniarfiliarlutit sodavandit toqqagassarpassuuneri immaqa nuannaarutigivat. Pepsi Maxip Fantallu saniatigut ilisimaneqarluartut Coca Colanit nioqqutissat qillertuusanit literinut appaata affaanik imaqqortussuseqartut pisiarineqarsinnaapput.

Akilli takugakkit immaqa pakatsivutit.

Inuimmi KNR-ip Nuummi Brugsenimi januaarimi naapitaat ilaat taama misigisimapput.

- Qilanaarinikuuakka kisianni, akeqqatigiipajukkamik ukulu mikinerullutik, Tupaarnaq Zethsen sodavandit qillertuusat Danmarkimit eqqussat Nuup imermiillu literip affaanik imaqartut assigiinngissusaat pillugit oqarpoq.

Naak maqiterivik Nuuk Imeq ukiup nikinnissaata tungaanut tuniniaanermi kisermaassisimagaluartoq matoreeraluartoq tunisassiarisaat kingulliit pisiniarfinni suli tuniniarneqarput.

Akillu nikingassutaat takuneqariaannaavoq.

Nuummi Brugsenimi sodavandi qillertuusaq 33 centiliterimik imalik puukua ilanngullugu 17 koruuneqarpoq. Nuuk Imermit sodavandi 50 centiliterimik imaqartoq puukua ilanngullugu 19 koruuneqarpoq. Tassa imaappoq sodavandi avataanit eqqussaq literimut 13,5 koruunimik akisuneruvoq.

- Isumaqarpunga akisuallaarujussuartut, Daniel Lyberth Hauptmann oqarpoq.

Jørgen Boassenip politikerit sodavandit akiinut atatillugu neriorsuutiminnik eqquutsitsinnginnerat ilorrisimaarutiginngilaa. Assi © : KNR / Johasinnguaq Olsen

- Neriorsuutigineqarnikuummata akikillissammata unammilleqatigiinneq ammarneqassasoq kisianni killormorluinnaq ippoq isigisinnaasakka malillugit, Jørgen Boassen oqarpoq.

Naalakkersuisoq neriorsuinerluttoq

Jørgen Boassenilu ilumoorpoq. Nunalerinermut, Imminut Pilersornermut, Nukissiutinut Avatangiisinullu Naalakkersuisup, Kalistat Lundip sodavandip akii ukiup nikinnerani allanngornavianngitsut KNR-imut septembarip aallartinnerani oqaatigaa.

- Naamik taanna naatsorsuutigineqanngilaq akisunerulernissaa. Aamma akikinnerulernissaa siunertaanngilaq, taanna oqarpoq.

Taamaakkaluartorli akit qaffapput, tamannalu pisisartut malugaat.

- Akikillisoqanngilaq taakku qasseriarlutik neriorsuutigineqarpat politiikeriniit akitsortoqassanngitsoq, Jørgen Boassen oqarpoq.

Sodavandi qillertuusaq 33 centiliteri nunatsinnut eqqunneqaraangami pingasunik akitsuuserneqartarpoq.  Taakku katillugit 6 koruuninik naleqartarput. 

Brugsenimi pisiortornermut pisortap, Randi Vestergaard Evaldsenip oqarnera naapertorlugu akitsuutit marluk peerneqaraluarpata sodavandi qillertuusaq 3 aamma 4 koruunip akornanni akikillissagaluarpoq. Akitsuut kingulleq 60 øre puutunut akitsuutaavoq.