SIK-p siulittaasua isornartorsiuisoq: Nuuk Imerup matunera mamianartuuvoq

Suliffeqarfik taama angitigisup matunera inuiaqatigiinnut tamanut eqquissasoq, Jess G. Berthelsen isumaqarpoq.

Allattoq Connie Fontain

maajip 01-at 2023 12:06

- Ajorluinnarpoq, assorujussuaq paasiuminaatsippara taamatut inatsisartut aalajangersinnaanerat. Ilaatigut oqariartorpoq pikkorinneruinnassasoq.

SIK-p siulittaasua, Jess G. Berthelsen Nuuk Imerup matunissaa pillugu tallimanngormat nalunaaruteqartoqareersorlu taama oqarpoq.

Maqiterivimmi puiaasanut inatsisit nutaaq 2024-mi januaarip aallaqqaataani atuutilerpat matussasoq tallimanngormat nalunaarutigineqarpoq.

Aamma atuarukDemokraatit: Nuuk Imeq unammillerteqarnissamut annilaangaguni pitsaanerusumik iliuuseqartariaqarpoq

Puiaasanut inatsisip allanngornerata kingunerisaanik nunatta avataanit poortuutit allat tikisinneqarsinnaalissapput, Nuuk Imerlu tamatumani unammillersinnaanngilaq.

- Nuuk imerup qanoq ililluni immiorfissuit ullormut taamannak tusind literinik maqitsisartut nunarsuarlu tamakkerlugu atuisut unammisinnaassagamigit? Unammisinnaanngilluinnaqqissaarpai, taamaattumik paasisinnaanngilara Inatsisartut taamatut aalajangernerat, Jess G. Berthelsen KNR-imut oqarpoq.

Inuiaqatigiinnut annaasaqaataasut

Nuuk Imerup kisermaassisusssaajunnaarnissaa poortuutissat pillugit inatsit Inatsisartunit allanngortinniarneqarpoq, unammilleqatigiittoqarsinnaaniassammat.

NUUK IMEQ AAMMA INATSIT NUTAAQ:

- Nuuk Imeq immiaaqqanik imeruersaatinillu tunisassiorfiuvoq, taanna Royal Unibrewimit, Carsbergimit Kommuneqarfik Sermersuumiillu pigineqarpoq.

- Puiaasat pillugit nalunaarut aappaagu januaarip aallaqqaataani allanngortinneqassaaq. Tamanna pissutigalugu immiaaqqanut sodavandinullu puiaasat pillugit malittarisassat nutaanngortinneqassapput.

- Tassa imaappoq Nuuk Imerup kisermaassisuunera atorunnaarsinneqassaaq, tassami immiaaqqat sodavandillu qillertuusanik, plastinik igalaaminernillu assigiinngitsunik puiaasanik utertinneqarsinnaasunik pooqartut tuniniarneqarsinnaalissapput.

- Nuuk Imerup maqiteriviup matoqaratarsinnaanera aarlerigisimavaa. Qillertuusat, plastit igalaamerngillu puiaasat siunissami atorneqalersut utertinneqarsinnaanissaannut utertitseriaaseq nutaaq aamma atuutilertussaavoq.

Allisiguk

Taamatullu aalajangertoqarnera Jess G. Berthelsenip nuannarivallaanngilaa:

- Nammineq napatittoq, suliffissaqartitsisoq. Taamaakkaluartoq aalajangertoqarpoq Nuuk Imeq matussasoq, tamanna uanga paasisinnaanngilluinnarpara, Jess G. Berthelsen oqarpoq nangillunilu:

- Assut ajuusaarnartutut isigaara, allaat nunatta oqaluttuarisaaneranut ilanngunneqartariaqartutut uanga isigaara.

Sulisut tupaqqasut

Nuuk Imermilu sulisut arlaqartut sunnerteqqaqisut, SIK-p siulittaasuta attaveqarfigisimallugit oqaatigaa.

- Annaasaqarfiussaqaaq. Ilaqutariippassuit eqqorneqartussaapput. Soorlu oqartunga Nuuk Imermi sulisut kisimik eqqorneqarnavianngillat. Jess G Berthelsen oqarpoq.

Aamma atuaruk Nuuk Imeq matulerpoq: Aatsaat taama ajuusaarnartigisumik misigisaqarpunga

Nuuk Imerup matuneqarnerata kingunerisaanik sulisut 50-it missaanniittut allamik suliffissarsiortariaqalissapput.

Taakkuli qanorpiaq pineqassanersut SIK siulittaasuata suli oqaaseqarfigerusunngilaa.

- Soorunami oqaloqatigineqassapput Nuuk Imeq peqatigalugu aammalu ingerlariaqqinnissaannut oqaloqatigineqassapput. Kisianni massakkut tassungaluunniit eqqarsarsinnaanngilagut aliasungaaratta taamatut pisoqarnera peqqutigalugu, Jess G. Berthelsen oqarpoq.