Imminut toqunnissamik sioorasaarinerit amerlavallaartut

Sioorasaarinerit sisamaagaangata pingasut toqunissamik kissaateqanngitsut paasineqartarpoq.

Politiit naapertorlugit amerlasuut kamannertik pakatsinertilluunniit takutinniarlugu taama sioorasaarisarput. Tamannalu napparsimmavimmi aamma ilisarineqarsinnaavoq.

AAMMA ATUARUK Imminut toqunnissamik sioorasaarisunik nalunaarutiginninnerit siorna 832-iusut

- Tamanna ulluinnarni suliarisartakkatta ilagaat. Sioorasaarisunik oqaloqateqartarnitsinni oqaluussagut amerlanertigut pakatsinerminnik assingusumilluunniit nalaataqarnerminnit taama qisuariaateqartarnerattut oqaatigineqarsinnaavoq, Sermersuumi nakorsaaneq, Jesper Olesen oqarpoq.

Tusaanngitsuusaarneqartanngitsut

Taassuma politiit erseqqissaanerat assigalugu taama nalunaaruteqarnerit tusaanngitsuusaaginnarneqanngisaannartut erseqqissaatigaa.

- Imminut toqunnissamik sioorasaarinerit tamarluinnaasa ilungersunartumik tigusarpagut, ajornartorsiutaasorlu paasiniartarlugu.

AAMMA ATUARUK Imminut toqoriarnerit amerleriarsimasut

Jesper Olesenillu politiitulli sioorasaarinerit kingunerlunnissaannik eqqarsaqqaarnani qisuariarnerusartut maluginiarpaa.

- Imminut toqunnissamik siorasaarinerit oqaluttariaatsit ilagigaipaasiarparput, tassalu oqarluni nakorsaatinik tuninngikkussinga imminut toquinnassaanga, Jesper Olesen oqarpoq

Ileqqoq pinaveersaartittariaqartoq

Peqqinnissamut naalakkersuisoqarfimmeersup Tina Evaldsenipajornartorsiut aamma ilisarilluarsinnaavaa.

- Taama sioorasaarineq immaqa ileqqoriliinnarsimavarput. Misigissutsikkut inuunitsinniluunniit artorsaateqaleraangatta piumasaqaraangattaluunniit taamatut sioorasaarisarpugut, Tina Evaldsen oqarpoq.

Tina Evaldsen siunnersortaavoq, imminullu toqunnerup pinaveersaartinneqarnissaanut suliaqartuulluni.

- Ajornartorsiut taama angitigitillugu aamma eqqartorneqaqattaaleraangat taava tusaajuaraanni nalinginnaaleraluttuinnarsinnaavoq. Ingammik meeqqat inuusuttullu peroriartornerminni tusartuarunikku ileqqussatut isigilersinnaavaat.

Tina Evaldsenip pinaveersaartitsinermik suliaqarnermini imminut toqussimasut imminullu toqoriaraluartut ukkatarisarpai.

Imminut toqunnissamik sioorasaarillutik qunusaarisarnerit sammivallaanngikkitsik, Tina Evaldsenip oqaatigaa. Ileqqorli taanna inuiaqatigiinni pinaveersaartinneqartariaqarsoraa.

AAMMA ATUARUK Imminut toquttarnerup pinaveersaartinniarnera Nunavimmi sammineqartoq