Imminut toqunnissamik sioorasaarisunik nalunaarutiginninnerit siorna 832-iusut
Imminut toqunnissaminnik sioorasaarisut pillugit politiinut nalunaarutiginninnerit 2017-imi 832-upput. Tamanna ajornartorsiuterujussuuginnarani inuiaqatigiinnut sutigut tamatigut akisuvoq.
Assortuunneq nalinginnaasoq, allasiorsiornermut tunngasoq illoqarfissiornerluunniit nuannersoq imminut toqunnissamik sioorasaaruteqarnermik kinguneqarsinnaasarpoq. Tamannalu politiini peqqinnissaqarfimmilu sulisunut sakkortusarpoq, aammali qanigisaasunut misigisapilutitsisarluni.
Politimesterip Bjørn Tegner Bayip sioorasaarinerit assigiinngitsut marluunerarpai.
- Soorunami inuit imminut toqunnissaminnik eqqarsaateqarlutik oqaatiginnittarnerat ajunngilaq. Imminut toqunnissamik sioorasaarinerit taakku pinngilagut.
AAMMA ATUARUK Imminut toqoriarnerit amerleriarsimasut
Sioorasaarinerit tamaasa pimoorunneqartarput
Imminut toqunnissamik sioorasaarisut politiit pimooruttuaannarlugit orniguffiginngiinnarneranniillu ornikkusunnerullugit, politimesterip erseqqissaatigaa,
- Imminut toqunnissamik pimoorussinatik aliasunnerminnik kamannerminnillu ilaquttaminnut ikinngutiminnillu takutitsiniaannarlutik sioorasaarisartut politiit ajornartorsiutaanerarpaat.
Imminut toqunnissaminnik sioorasaarisutut nalunaarutigineqartut 75 procentiiniit 80 procentiinut imminnut toqunnissamik ilumoorussinngitsuusarnerat, Bjørn Tegner Bayip eqqoriakannerpaa.
- Imaappoq nalunaarutigineqartunit amerlanerpaat oqaasiinnartigut sioorasaariinnartarput.
Politiit suliaat taakku, assersuutigalugu isumaqatigiinnginnerup kingorna imminut toqunnissamik siorasaareriarlutik anisut pissutigalugit ilaqutaasut ernumassuteqarlutik politiinut sianernerannik aallarnerneqartarput.
- Taamaattoqaraangat suliaq pimoorullugu tigusarparput, piffissamimi tassani ilumut imminut toqunniartoqarnersoq oqaasiinnartigulluunniit sioorasaarutaanersoq nalusarparput.
AAMMA ATUARUK Inuusuttuaqqat imminut toquttartut ikileriarsimanngillat
Pakatsinermik qanoq iliorsinnaannginnermillu pissuteqakkajuttut
Aatsaalli kingornatigut pineqartup politiinit amerlanertigullu peqqinnissaqarfimmit oqaloqatigineqarnerani imminut toqunnissamik kissaateqartoqannginnera inerniliunneqartarpoq.
- Pineqartut oqaloqatigineqarnerminni ammasumik uagutsinnut nassuerutigisarpaat imminnut toqunnissamik eqqarsaateqarnatik siorasaarinerlu aliasunnerminnik kamannerminnillu takutitsiniutigiinnarsimallugu.
Sioorasaarinerillu taakku misigissutsitigut inuiaqatigiillu aningaasaqarnerannut kingunerluttarput.
- Imminut toqunnissamik oqaasiinnartigut sioorasaarisarneq piorsarsimassutsimi ajornartorsiutaasoraara aamma qanigisaasuni aammalumi politiini napparsimmavimmilu sulisuni sioorangaatsiarnermik annilaanganermillu pisariaqanngitsumik pilersitsisarpoq, Bjørn Tegner Bay oqarpoq.
Ajornartorsiuteqaruit, imminut toqunnissamik eqqarsaateqaruit imminut toqussimasumilluunniit nalaataqarsimaguit Attavik normumut 146-mut akeqanngitsumik sianerlutit siunnersorneqarsinnaavutit.
