Imivik Nuuk Imeq matugaluarpalluunniit tunisassiuinnarniartoq

Imivik puilasup ernganik nunatsinnut tunisassiuiinnarsinnaassalluni neriorsuivoq. Aamma naak puiaasaaqqanut maqitsisuusaraluartoq, tassa Nuuk Imeq matusussanngoraluartoq.

Allattoq Rune Hvistendal Kristiansen

maajip 10-at 2023 13:05

Ukiumut nutaamut iserutta Nuuk Imeq piunavianngilaq, taannami decembarip 31-ani matusussaavoq.

Matusineq Imivimmut qissaarnalaarpoq. Nuuk Imermi Imivimmut maqitsisuusarlunilu puiaasanik, Imiviup atugaanik tunniussaqartartuuvoq.

NUUK IMEQ AAMMA INATSIT NUTAAQ:

- Nuuk Imeq immiaaqqanik imeruersaatinillu tunisassiorfiuvoq, taanna Royal Unibrewimit, Carsbergimit Kommuneqarfik Sermersuumiillu pigineqarpoq.

- Puiaasat pillugit nalunaarut aappaagu januaarip aallaqqaataani allanngortinneqassaaq. Tamanna pissutigalugu immiaaqqanut sodavandinullu puiaasat pillugit malittarisassat nutaanngortinneqassapput.

- Tassa imaappoq Nuuk Imerup kisermaassisuunera atorunnaarsinneqassaaq, tassami immiaaqqat sodavandillu qillertuusanik, plastinik igalaaminernillu assigiinngitsunik puiaasanik utertinneqarsinnaasunik pooqartut tuniniarneqarsinnaalissapput.

- Nuuk Imerup maqiteriviup matoqaratarsinnaanera aarlerigisimavaa. Qillertuusat, plastit igalaamerngillu puiaasat siunissami atorneqalersut utertinneqarsinnaanissaannut utertitseriaaseq nutaaq aamma atuutilertussaavoq.

Allisiguk

Naalli ajornakusuulaaraluartoq Imivik nunatsinnut puilasup ernganik tunisassiuiinnarniartoq, Imiviup pisortaanerata, Jørgen Wæver Johansen neriorsuivoq.

- Matunissaa piffissami sivitsortumi piareersarfiginikuuvarput. Taamaammat tunisassiorsinnaajunnaarnissarput naatsorsuutiginngilarput. Imivimmiilli nunatsinnut tunisassiuinnarnissarput qulakkeerniarsariniarparput, taanna oqarpoq.

Aamma atuaruk Atassut Demokraatillu isumaqatigiittut: Nuuk Imerup tunniutiinnarnera uggornarpoq

Aaqqiissutissaq pitsaanerpaaq suunersoq pisortap suli aalajanginngilaa, kisianni namminneq maqitsisuulersinnaapput.

- Nammineq aallaqqaataaniit nioqqutissiorsinnaanissarput sulissutigisaarput, Jørgen Wæver Johansen oqarpoq.

Suleqatigilluakkamik annaasaqartoq

Nuuk Imeq matuppat suleqatigilluartagaq inuulluaqquneqassaaq.

Nuuk Imeqarsimanngikkaluarpammi Imiviup ukiuni siulliit iluatsitsiffigisimanavianngikkaluarpai.

- Uagutsinnut iluaqutaalluarnikuuvoq, tassa tunisassiortutut nutaatut Nuuk Imermik suleqateqarsinnaagatta. Taakku piginnaasaqarlutillu misissuiffinnik tunisassiatsinnik tunisassiorsinnaatitsisunik atortorissaaruteqarput. Taama pitsaassuseqartumik tunisassiorsinnaanissarput Nuuk Imeqanngikkaluarpat ajornakusoorsimassagaluarpoq, Jørgen Wæver Johansen oqarpoq.

Nuuk Imeq matuppat Imivik nunatsinni kisiartaalluni puilasup ernganik tunisassiortunngussaaq.

Nutaarsiassami kukkunermik nassaarsimaguit uunga allaffigineqarsinnaavugut.