Imartatsinni avatangiisinik illersuinissaq qulakkeerniarneqartoq

Imartatsinni avatangiisinik illersuinissamik siunnersuutit marluk tulleriit oqaluuserineqarmata, Inatsisartuni amerlanerussuteqartunit taperserneqarput.
apriilip 22-at 2017 11:00

Nunatsinni nerisartakkatta aningaasanillu isaatitsiffigisartakkatta pingaarnersaat imartatsinneersuupput. Taamaammat imartatta illersorneqartuarnissaa pingaaruteqarpoq, taamaasillunimi avatangiisinut ajoqusiinani ineriartortitsiuarnissaq qulakkeerneqassaaq.

Inatsisartut tallimanngornermi ataatsimiinneranni Naalakkersuisut assigiinngitsunik marlunnik siunnersuuteqartut taama isumaqarput.

Inatsisissatut siunnersuut siulleq tassaavoq imartatsinni sømilit pingasut iluanni avatangiisinik illersuinissaq. 

Siunnersuutigineqartup aapparaa Kalaallit Nunaanni aningaasarsiornermut killeqarfimmi imaani avatangiisinik allanngutsaaliuinissaq pillugu Folketingip inatsisaanut Namminersorlutik Oqartussat tapersiinissaat pillugu Inatsisartut aalajangiiffigisassaattut siunnersuut.

AAMMA ATUARUK Avatangiisinik annertuumik mingutsitsisoqartillugu Danmark akiliisinnaasoq

Siunnersuutit taakku ataatsimut isigalugit imartaani illersuinissaq pillugu malittarisassat nunani tamalaani malittarisassat pitsaassusaanut naleqquttunngortinnissaat siunertaraat.

Siunnersuutit ilaatigut pitsaaliuinernut saliisarnernullu tunngasunik imaqarput. Ilaatigut malittarisassat mingutsitsisartunik eqqagassalerinernut imaarsisarnernullu tunngasut sukaterniarpaat.

Uuliamik akoorutissamillu annertuumik mingutsitsisoqarsimatillugu Kalaallit Nunaat Danmarkimut ikioqqusinnaavoq.  Siunnersuut naapertorlugu Naalakkersuisut umiarsuit mingutsitsisut Nunatta imartaani iseqqujunnaarsinnaavaat.

AAMMA ATUARUK Sikorpiassaarnera Danmarkimut pissaaneqarnerulersitsisinnaasoq

Pinngortitaq pillugu nunarsuaq tamakkerlugu suliniaqatigiiffiup WWF-ip maluginiarpaa siunnersuutit taakku naapertorlugit Naalakkersuisut uuliamik oqimaatsumik mingutsitseqisumillu HFO-mik Nunatta imartaani atueqqusiunnaarsinnaasut.  

- HFO-p atorunnaavinnissaa neriuutigisimagaluarparput. Kisianni umiarsuit imartatsigoortut orsussanik qanoq ittunik atuisarnissaannik maanna piumasaqarsinnaalissapput. Tamannalu pingaaruteqarluinnarsoraara, WWF-imi siunnersortaaneq Mette Frost oqarpoq.

Kisianni inerteqqut allaqqariinngilaq, Naalakkersuisulli inatsit naapertorlugu periarfissaqarput.

Siunnersuutit siullermeerlugit tallimanngornermi suliarineqarput partiinillu amerlanerussuteqartunit taperserneqarlutik. 

Oqaaseqartut tamarmik siunnersuut pitsaasumik oqaaseqarfigaat, ingammik inatsisip nutarternera ingammillu Issittumi angallattoqarneruleriartorneranut naapertuuttussanngorneqarnera nuannaarutigaat.

Siunnersuutit taamaatsillugit Eqqissisimatitsinermut Avatangiisinullu Ataatsimiititaliamut suliareqqitassanngorlugit innersuunneqarput.