Avatangiisinik annertuumik mingutsitsisoqartillugu Danmark akiliisinnaasoq
Nunatta imartaani avatangiisinik annertuumik mingutsitsisoqartillugu Nunarput Danmarkimit ikiorneqarnissaminik noqqaassuteqarsinnaavoq.
Isumaqatigiissut nutaaq, danskit illersornissamut ministeriata, Claus Hjort Frederiksenip (V), aamma namminiilivinnermut, pinngortitamut, avatangiisinut nunalerinermullu naalakkersuisup, Suka K. Frederiksenip (S), atsioqatigiissutigisaat pingaarnertut taama imaqarpoq. Illersornissamut ministereqarfik taama nalunaaruteqarpoq.
Nunatta 3 sømilit iluanni imaani avatangiisit 1989-miilli akisussaaffigai, killeqarfiullu taassuma avataani mingutsitsinerit suulluunniit danskit akisussaaffeqarfiata ataanniillutik.
Nutaamilli isumaqatigiissuteqartoqarneratigut Namminersorlutik Oqartussat nunamit 3 sømilit iluanni, assersuutigalugu uuliamik akuutissanilluunniit mingutsitsisoqartillugu, naalagaaffimmut tamatuminnga akiuiniarnissamut ikiorneqarnissamik noqqaassuteqarsinnaapput. Taamatullu pisoqassagaluarpat Danmarkip pisussaaffigaa ikiuutissalluni aammalu saliineq akilissallugu.
Saliinermullu akiligassaq mingutsitsisumut kingorna ingerlateqqinneqarsinnaavoq, mingutsitsisoq kinaanersoq ilisimaneqarpat.
Isumaqatigiissut ukioq manna juulip aallaqqaataani atuutilertussaq Danmarkimi Nunatsinni imaani avatangiisit pillugit upalungaarsimaniarnerup tamakkiisup erseqqissarneqarneranik ilaatigut aamma imaqarpoq.
Isumaqatigiissut uani atuarneqarsinnaavoq (kalaallisoortaqanngilaq).