Sikorpiassaarnera Danmarkimut pissaaneqarnerulersitsisinnaasoq
USA-mi pissutsinik immikkut ilisimasalik Mads Fuglede taama isumaqarpoq. Kujataatami Kitaatalu sineriaatigut, taamatullu aamma Danmarkip imartaatigut, umiarsuarnik angallannerup annertunerulernissaa taassuma siulittuutigaa.
- Aqqutissap matoqqatinnissaa ammatinnissaalu periarfissaappat, taava killilersugaanngitsumik angalasinnaanermut nunatut aalajangiisuusussamik inissittoqarsinnaavoq.
- Soorlu nunarsuarmi akerleriinnernik pilertoqassagaluarpat taava nunatut allanit ikinngutiginiarneqarnissaq naatsorsuutigineqarsinnaassaaq.
Sullualuk silap pissusiata allanngoriartornera pissutigalugu maanna juulip qaammataanit novembarip tungaanut sikuuneq-ajorpoq.
Taamaammat umiarsuit Kangianit Europaliarniartut tassuunaqquussinnaapput, angalanerallu ikerasaliat Panamap Suezillu aqqutigisarnerannut naleqqiullgu kilometerinik 4.000-7.000-inik naannerulerlunilu ullunik 12-15-inik sivikinnerussaaq.
Taamatullu inissisimanini iluaqutigalugu Danmarkip nunat tamalaat akornanni nukittuumik inissisinnaavoq, Mads Fuglede taama isumaqarpoq.
- Tusaaniarneqarnerulissaagut, aamma angallanneq unitsissinnaavarput. Taamaammat Danmarkimut pitsaasumik attaveqarnissaq pingaaruteqassaaq, naak Danmark nunatut anginngikkaluartoq, Mads Fuglede DR-imut taama oqarpoq.
Sullualuulli aqqutigineqarsinnaalernerata sunniutaata malunnaatilimmik malugineqarsinnaalernissaa suli ungasippoq.
Naalakkersuisut 'Umiarsuit angallannerat Silallu pissusiata allanngoriartornera' pillugit nalunaarusiami allapput Sullualuup aalajangersimasumik angallavigineqartalernissaa aatsaat 2050-ip kingorna naatsorsuutigineqarsinnaassasoq.
