Qamittoorneq: Ima pisoqarpoq - Qanorluunniit ilungersunarpoq

Decembarip 28-anni meeqqat ullaakkorsiortut Katrine Sandgreenip nereqatigilinnginneranni naneruutinik ikitsivoq. Nalinginnaasumik ikitsisanngikkaluarpoq.

Ullorli taanna nalinginnaanngilluinnartoq aallartilerpoq. Naneruutimmi iperaa ikeqqammilaaginnartoq Nuuk tamarmi qamittoorpoq.

Taanna nunatsinni upalungaarsimasut siulittaasuunini pissutigalugu erngertumik sianerfigineqarpoq.

Politiit pigaartuisa suliffigisartagaat sianerpoq, akunnialuillu qaangiuttut Katrine Sandgreen Nuummi oqartussat assigiinngitsut akornanni ataatsimiinneranniippoq.

KNR-ip Katrine Sandgreen kingullermik innaallagiaqannginneq aamma upalungaarsimasut 2021-mit juullikkunniillu qanoq ilikkagaqarsimanerat pillugit oqaloqatigaa,

Ataatsimiinneq siulleq

Upalungaarsimasuni aalajangersimasumik ilaasortat: Peqqinnissaqarfik, Issittumi Sakkutooqarfik, kommunimi annaassiniartartut kiisalu Tusass, KNR allallu attuumassuteqartut politeeqarfimmi nalunaaqutaq marluk missaani ataatsimiipput.

Sarfaaruttoqarnerata saniatigut taamaallaat Tusass KNR-ilu naatsorsuutiginngisanik ajornartorsiuteqarput.

Ilanngutassiaq assip kingorna nangeqqissaaq.

Nunatsinni Upalungaarsimasut siulittaasuata, Katrine Sandgreenip ataatsimiinnerit assigiinngitsut sianerfiginissaat kiisalu pissutsit ataatsimut isiginiarnissaat pillugu ataatsimut ataatsimiinnissamut aggersarnissaat akisussaaffigaa. Assi © : KNR / Markus Valentin

- Tusass ajornartorsiuteqarpoq, taamaammat uagut allat qanoq ikiuussinnaanerluta paasiniarparput. KNR-ip ajornartoornermi generatoria aallartinngitsoq aamma ajutooqqavoq, taamaammat piffissami siullermi radiokkut aallakaatitsisoqarsinnaanani, Katrine Sandgreen oqarpoq.

Oqartussat ataatsimiinnerup kingorna immikkut ingerlaqqipput. Ataaserli qularutiginngilaat: Innuttaasunut imminnullu attaveqarnissaq pingaaruteqarpoq.

Nammineq akisussaaffeqarneq inuiaqatigiillu

Kommuneqarfik Sermersuumi illoqarfiup ineriartortinneqarneranut sanaartornermullu ataatsimiititaliap ataatsimiinnerani kingullermi qinikkat Peter Davidsen (S) aamma Uju Petersen (IA) siunnersuuteqarput.

Taamaammat kommuni innuttaasunut attaveqarnermut pitsanngoriaataasussamik pilersaarusiuleruttorpoq.

Init kialaarfiusut marluk Timersortarfimmi pilersinneqartut innuttaasunut attaveqaqatigiinnerluttoqarnera pissutigalugu atorluarneqannginnerat siunnersuummut pingaartumik tunngavilersuutaasoq qinikkat oqaatigaat.

Ilanngutassiaq assip kingorna nangissaaq.

Politeeqarfimmi inimut ataatsimiiffissamut matu ersarilluarpoq. Aamma ini ataatsimiiffissaq sutortarfeeqqap killinganiittoq. Assi © : KNR / Markus Valentin

Katrine Sandgreenip upalungaarsimasut suliassat pinasuarnerulaartut ukkatarisinnaaniassammatigit inuiaqatigiit ajornartoornermi qanoq ilillutik imminnut piffissami sivisunerusumi isumaginerusinnaalernissaata ukkatarineqarnerulernera aamma oqaatigaa.

- Oqartussat kisimik piareersimassanngillat. Innuttaasunut inuussutissarsiuteqartunullu qanoq ililluni piareersimasoqarnerulernissaa pillugu eqqartuissaagut, innuttaasut taamaalillutik allamit ikiorneqarnissamut pisariaqartitsilernissaannut piffissaq sivisunerulersinnaassalluni. Taamaammat inuiaqatigiinni pitsanngorsaaneq.

Assigiinngitsunik pisoqarsinnaanera

Sarfaaruttoqarmat Katrine Sandgreenip upalungaarsimasullu pissutsit naatsorsuutigisamit ajornerulissagaluarpata qanoq iliortoqarsinnaanera erngertumik eqqarsaatersuutigilerpaat.

- Qanorluunniit pisoqaraluarpat ilungersunaannavippoq. Susoqarsinnaanera soorlu: "taavami ullunik pingasunik imaluunniit sapaatip akunnerani sivisussuseqarpat?" Taava pisussat piareersimaffigisassat piareersarfigineqalissapput, soorlu inuussutissanik pisiniarfiit, Katrine Sandgreen oqarpoq.

Qaqugukkut Danmarkimut sianerluni ikioqqusoqassava?

- Tunngaviusumik ingerlaannartumik taamaaliorsinnaavugut. Kisianni pisut siulliit isumaginissaannut piareersimalluarpugut. Sumiiffinniimmi taama ungasitsigaluta ikiorneqarnissatsinnut piffissaq sivisulaassaaq.

- Nunatsinni pissarsiarisinnaanngisatsinnik pisariaqartitsilluta paasigutsigu taama Danmarkimut erngertumik ilisimatitsissaagut. Taamaammat paasinissaanut aamma sukkangaatsiarpugut, ikiuutaasussammi apuunnissaanut sivisulaassaaq. Pisariaqartinneqartut atortussanit saniatigullu isumalluutissanut assigiinngitsuusinnaapput.

Katrine Sandgreen akunnerni aqqaneq-marlunni sulivoq, taannalu sapaammi unnuami marlunut aatsaat innarpoq.

- Tassani isumallualaarpunga. Nalunaarutigineqarsimasoq malillugu pilersaarut aallartipparput, illoqarfillu tulleriiaartumik ikiteriffigineqalerluni. Pilersaarut malillugu ingerlalluartoqalereermat aatsaat innarpunga, taanna oqarpoq.