Ilulissani timip ilaanik nassaarneq: Politiit toqussutaasoq paasigaat

Politiit Ilulissani toqutsisoqarsimaneratut suliamik misissuinerminni susoqarsimanera paasiniarlugu ulluni kingullerni suliaqangaatsiarput.

Pinerluttoqarsimaneranik misissuisartut toqusimasunillu misissuisartut Ilulissani misissueqqissaarnermut ikiuutaajartorlutik tikipput. Toqqutigineqartorlu maanna paasineqartoq politiit paasissutissiissutigaat.

- Toqqutigineqartoq paasivarput. Misissueqqissaarnermulli tunngatillugu annerusumik oqaaseqarfigisinnaanngilara, misissueqqissaartut pisortaat, Jan Lambertsen KNR-imut oqarpoq.

AAMMA ATUARUK Pinerluttoqarsimaneranik toqusoqarneranillu misissuisartut Danmarkimit Ilulissanut tikittut

Ilulissani eqqakkanik ikuallaavimmi inuup timaata ilaanik arfininngormat nassaartoqarpoq. Inuullu timaata ilaanik allamik marlunngormat aamma nassaartoqarluni.

Angut kalaaliugunartoq

Politiit toqutaasimasorineqartup kinaanera paaseqqajaallugu ippassaq oqaatigaat. Misissueqqissaartartut pisortaata pineqartup angutip kalaaliunissaanut takussutissaqarnerarpaa.

Taassumali kinaanera politiit misissuineri aatsaat naammassippata erseqqissarneqarsinnaavoq.

Politiit qatserisartullu nassaartoqarnerata kingunerisaanik eqqakkanik misissuillutik ulappupput, taakkulu suliaqarnera sapaatip akunnerata naanerata kingorna naammassissangatinneqarpoq.

- Qatserisartut ikiuulluarneratigut eqqakkanik ikuallaaveqarfimmi paasissutissaanik suli ujarleqqissaarpugut, Jan Lambertsen oqarpoq.

- Misissuiffiup annertoorujussuunerata saniatigut misissukkat peqqissaarulluinnarneqarput.

AAMMA ATUARUK Politiit suli paasisaqanngitsut: Toqutsinermik suliami ullut sisamassaat paasiniaasut

Nassaarineqartullu amiilaarnartut politiit suliaraat.

- Timip ilivitsup naggaterpiaani ilineqarsinnaanissaa uagutsinnut pingaaruteqarpoq, Jan Lambertsen oqarpoq.