Ilulissat eqqaanni nunap assingi eqqornerusariaqartut
Amerlanerit nalunngilaat nunap assingani Ilulissat sumiinnersut.
Ikittuinnaalli ilisimavaat qaqqat illoqarfiup eqqaani, minnerpaat tikillugit, qanoq ilillutik taamatut iluseqalersimanersut qaqqallu sunik sananeqaateqarnersut.
Tamannali massakkut paasiniarneqarpoq.
Tassa misissuisartut GEUS-imeersut (Danmarkimi Kalaallillu Nunaannilu nunap sananeqaataanik misissuisartut) anguniagaasa ilaat, Namminersorlutik Oqartussaneersullu sapaatit akunnerini pingasuni Ilulissani eqqaanilu nuna assiliorlugu sulisimapput.
Kristine Thrane GEUS-ip Nunap Assiliornermut Aatsitassanullu immikkooortortaani siunnersortaaneq suliniummillu aqutsisoq taakkununnga ilaavoq.
- Tamaani suli nunap assinganik 1:100.000 soqanngilaq. Geologi pillugu nunap assinganik peqarpugut, Ilulissat ilanngullugit, kisiannili sukumiisunik immikkuualuttullu ersersinneqarfiannik massakkut suliatsituut suli soqarata, taanna KNR-imut oqarpoq.
Nunalli assingi suliarineqanngillat pisuttuartut takornariallu sukkoqquutissanerlutik nalunnginniassammassuk. Taamaaliorpugut aamma ilisimalerusullugu qaarsut qaqqallu qanga qanoq pinngorsimanersut, ilaatigut nunarsuup sananeqataasa nunap iluani aporaannerisigut pinngortut.
- Tassa tunngaviusumik ilisimatusarnertut taasarparput, taamaaliornikkut qaqqat qanoq pisoqaatiginersut, qanoq pinngorsimanersut aamma naqitsineq qanoq annertutigisoq kissaassuserlu, pinngornerisa nalaani atuussimanersut. Taamaalioreernikkut Kalaallit Nunaanni aallani ilisimariikkatsinnut naleqqiussinnaalissavagut, Kristine Thrane oqarpoq.
Sermip Kujalliup kujataata avannaatalu eqqumiittortai
Suliniummik aqutsisoq nunatsinni nunap assinganik suliaqarluni sumiiffinni 16-neereerluni, misigisimavoq sumiiffiit tamarmik ujarassiuunut (geologinut) immikkuullarissuusut. Naakk qaqqat ilisimatusarfigineqangaatsiaraluartut, suli ullumikkut ilisimaneqanngilaq Ilulissat eqqaanni Kangiata avannaani kujataanilu, assigiinnersut.
Ilisimatusartoqatigiit misissugassatut tigooqqakkatik misissoqqissaalerunikkit, suliassaasa ilagaat tamanna paasiniassallugu, Kristine Thrane oqarpoq.
- Taamaalilluta paasisinnaalissavarput Kangiata kujataani avannaanilu qaqqat assigiinnersut. Aamma paasiniarparput Sermeq Kujalleq sooq tamatumanerpiaq inissisimanersoq? Nunavissuua, aggorneqalersimasoq, tassalu kujataani avannaanilu assigiinnersoq imaluunniit sermip sinai assigiinngilluinnartut marluunersut?
Ilisimasartoqatigiit Ilulissaniinnerminni aamma innuttaasunik qaaqqusipput, saqqummersitsineeraq ILLU Sciencemi & Art Hub-imi takusaanissamut, tassani ujarassiuut ujarassiuuttut misissuinerup qanoq ingerlanneqartarneranik oqaloqatigisinnaallugit, sumiffimmilu qaqqat qanoq ittuunersut ilisimasaqarfiginerulerlugu.
Soorunami aatsitassarsiorneq qaqqani ingerlanneqartarpoq.
Naalakkersuisut siunertaraat Kalallit Nunaata annerusumik aatsitassarsiorfiunissaa, aatsitassanillu qaqutigoortunik avammut tuniniaalluni. Tamannaavoq GEUS-ip suliaasa qitiusut ilaat, tassalu sumi aatsitassarsiorfeqatigiit iluanaaruteqarlutik suliaqarsinaanerat sumiiffissarsiussallugu.
- Tamanna misisuugassatut tigusatsinni misissortuaannarparput, Kristine Thrane oqarpoq nangillunilu: - Misissoqqissaarneqartarput takuniarlugu aatsitassanik soqutiginartunik akoqarnersut, piiarneqarsinnaasunik.
