Politiit peqatigiiffiat assigiimmik akissarsiaqalernissamut neriorsuut pillugu: Ilorraap tungaanut alloriarnerujussuuvoq
Danskit inatsiseqarnermut ministeriata, Peter Hummelgaardip politiini pinerluuteqarsimasunullu inissiisarfinni sulisut nunaqavissut tikisitallu assigiimmik kiisami akissarsiaqalernissaat pingasunngornermi unnukkut neriorsuutigaa.
Nutaarsiassarlu tamanna nunatisnni politiit peqatigiiffiata siulittaasuata, Bjørn Bjerregaard nuannaarutigaa:
- Tamanna Kalaallit Nunaanni politiit peqatigiiffiata tungaaniit alloriarnerujussuuvoq. Eqqaamasakkami malillugit, aatsaat taama ittumik nalunaarummik nalunaartoqarunarpoq.
Bjørn Bjerregaardilumi ilumoorpoq, nunaqavissummi Danmarkimiillu tikisitat akissarsiaat ukiuni qulikkuutaani naligiinngillat.
Tamanna politeeqarfinni naqisimanartoqartitsisimasoq, Bjørn Bjerregaard oqarpoq:
- Suleqatigut suleqatigiilluartaqaat, kisianni nunaqavissut sooq akissarsiakinnerusussaatitaanerat qamanermioriuaannartarpaat. Ilumoorsinnaanngilarmi suliat assigiit assigiinngitsumik akissarsiaqartinneqartuarnerat, taanna oqarpoq.
Akissarsiat naligiinnginnerat pissutsinut aarlerinartitsisartut
Maannali tassa tamanna allanngortussanngorpoq. Sulilu isumaqatigiissutinik aaqqiisoqanngikkaluartoq ministeriunerup Peter Hummelgaardip taama nalunaaruteqarnera peqatigiiffiup siulittaasuanut Bjørn Bjerregaardimut naammakkallarpoq, taassumami neriuutigaa, politiit atugaannut iluamik aaqqiilluartoqarumaartoq:
- Taama nalunaartoqareersorlu pisut ilorraap tungaanut saappasipput, sulisulli ilaat soorunami suli aperisarput: ”Ilumut upperissavarput?”uangali upperaara, kiisami iluarsiisoqaleqaaq, taanna oqarpoq.
Nunatsinnilu politiit akornanni akissarsiat assigiinnginnerisa iliuuseqarfigineqarnissaat pisariaqartinneqarpoq, ineriartornerlunnermi erngertumik mumisinneqartariaqartoq, Bjørn Bjerregaard oqarpoq:
- Atorfinitsitsiniarnermummi sulisunillu attassiniarnermut atatillugu isumaqangaatsiarpoq. Politiit nunaqavissut 2016-imi 116-iusut 2022-mi 87-inut ikilipput. Taamalu ineriartortoqaannassapput politiit affaat tassanngaannartumik tikisitaalissapput, taanna oqarpoq.
Oqaatigineqareersutuut suli isumaqatigiissusiortoqanngilaq aammalu Peter Hummelgaardip nammineq erseqqissaatigaa, isumaqatigiissummik suli aaqqiisoqannginnera. Taamaakkaluartorli akissarsiat assigiissinnissaat pillugu politiit peqatigiiffiat ukiorpassuarni sorsussimaqaaq, Bjørn Bjerregaardip Danmarkimi isumaqatigiissutip atuuttup nalingatut pineqassallutik neriuutigaa:
- Akissarsiatigut naligiilerutta neriuppunga aamma akissarsianut isumaqatigiissummut Danmarkimi atorneqartumut naapertuukkumaartoq, taamaanngeriataassappammi suli assigiinngittoqassaaq, Kalaallit Nunaallu suli aamma akissarsiatigut angummassimassanani, Danmarkimi OK 24-mut killeqqapput uagulli suli OK20-miippugut.
