Kattuffik aarlerisaarisoq: Isumaqatigiissutaalersussaq nakkutilliisunik soraaralersitserataannaavoq
Kiisami!
Pinerluuteqarsimasunut nunatsinni inissiisarfinni nakkutilliisut akissarsiaasa malunnartumik qaffannissaat danskit naalagaaffiata aamma Inuit Ataqatigiimmit Siumumillu Folketingimi ilaasortat 2019-imi isumaqatigiissutigimmassuk taama oqartut amerlapput.
Pinerluuteqarsimasunut nunatsinni inissiisarfinni nakkutilliisut Københavnimi parnaarussivimmi nakkutilliisuninngarnit ukiorpassuarni akissarsiakinnerupput, 2019-imili isumaqatigiissut nunatsinni nakkutilliisut Københavnimilu parnaarussivimmi nakkutilliisut akissarsiaannut nalimmassaataavoq.
AAMMA ATUARUK Parnaarussiviit kattuffiat: Nakkutilliisunut isumaqatigiissut pisariaqartinneqarpoq
Tapisiaqarluartitsineq pinerluuteqarsimasunut nunatsinni inissiisarfinni tamani nakkutilliisussaaleqiunnaartitsisoq, Pinerluttunik Isumaginnittoqarfik ilisimatitsivoq.
Nunatsinni nakkutilliisutut atorfiit inuttaqanngitsut juunip naanerani sisamaapput, taakkualu qanittukkut inuttalerneqassangatinneqarput.
- Pinerluuteqarsimasunut nunatsinni nakkutilliisut akissarsiaannik qaffaaneq nakkutilliisooreersut soraarannginnerannut sunniuteqaqataavoq. Aamma nakkutilliisooreersimasut ilaat sulileqqipput, Pinerluttunik Isumaginnittoqarfik KNR-imut aamma allappoq.
Isumaqatiginninniarnerit assortuussutaalertut
Pinerluttunik Isumaginnittoqarfilli unammillernartumiilerpoq. Nunatsinnimi nakkutilliisunut tapisiaqartitsinermut 2023-p tungaannaanut aningaasaliisoqassasoq isumaqatigiissutaavoq.
Nunatsinni nakkutilliisut, politiit, ilinniagartuut atorfilittallu allat danskit naalagaaffiata ataani sulisut akissarsiaat pillugit 2024-p tungaanut atuuttussanik isumaqatiginninniarnerit upernaaq aallartipput.
Danmarkimi nunatsinnilu 2020-mi januaarip aallaqqaataata tungaanut akissarsianik naleqqersuussineq:
-
Pineqaatissinneqarsimasunut nunatsinni inissiisarfimmi ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusiaqarpoq.
-
Danmarkimi parnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusiaqarpoq.
-
Nikingassut 5400 koruuniuvoq.
-
Nunatsinni nakkutilliisut sapaatit akunnerannut 40 tiimit sulisarput. Danmarkimilu nakkutilliisut sapaatit akunnerannut 37 tiimit sulisarlutik.
-
Folketingimi amerlanerussuteqartut 2019-imi akuerisaannik nunatsinni nakkutilliisut tapisiaannik nalimmassaanissamik 2023-p tungaanut atuuttumik isumaqatigiissusiortoqarpoq. Nunatsinni nakkutilliisut taamaalillutik Københavnimi parnaarussivimmi nakkutilliisutulli akissarsiaqalerput.
-
Aningaasat 2023 ilanngullugu akissarsianik qaffaataasut - nunatsinni nakkutilliisunut 38,4 millionit koruunit politiinullu 10,8 millionit koruunit - Atlantikup Avannaamiunut aningaasaliissutineersuupput.
Tusarfik: Pinerluttunik Isumaginnittoqarfik, inatsiseqarnermut ministereqarfik
Isumaqatiginninniarnerilli arlalinnik peqquteqartumik assortuussutaalerput.
KNR-ip paasissutissaatai naapertorlugit nunatsinni nakkutilliisut tapisiaat qaffaativinngortinneqassasut naalagaaffimmi atorfilittat kattuffiata, tassa Centralorganisationernes Fællesudvalgip (CFU) siunnersuutigaa.
Danskilli naalagaaffiata sulisoqarnermut piginnaasaqarnermullu aqutsisoqarfia taamaaliornissamut akerliuvoq.
AAMMA ATUARUK Kiisami: Pinerluuteqarsimasunut inissiisarfinni nakkutilliisut juullisiutissaqarlualersut
Nunatsinnili nakkutilliisut akissarsiaannik qaffaanissaq ileqquussutut isumaqatigiissutaanani politikkikkut 2020-mi isumaqatigiissutaasimanera, naalagaaffiup nunatsinni atorfilittat ilaasa iluarinngilaat.
Taamaammat aningaasat agguarneqartussat maanna isumaqatigiinniutigineqaleruttortut nunatsinni nakkutilliisunut atussanngitsut, CFU-p siunnersuutigaa. Nunatsinni nakkutilliisut tapisiaasa ukiut marluk qaangiuppata atorunnaarfissaanni isumaqatigiinniaq-qinnissamut utaqqisariaqassasut, CFU isumaqarpoq. Maannali tapisiaat 2024-mi atuutilersumik qaffaativinngornissaat ilutigalugu piumasaraa.
KNR-illi paasissutissaatai naapertorlugit danskit naalagaaffiata sulisoqarnermut piginnaasaqarnermullu aqutsisoqarfia taamaaliornissamut aamma akerliuvoq.
Pissutsillu ullumikkutut itsillugit nunatsinni nakkutilliisut 2020 sioqqullugu akissarsiarisartakkamik amerlaqataannik 2024-mi akissarsiaqaqqileriaannaapput.
Aasaaneranili maaanna sulinngiffeqarneq peqqutaalluni tamanna danskit naalagaaffiata sulisoqarnermut piginnaasaqarnermullu aqutsisoqarfianit oqaaseqarfigineqanngilaq.
Siulittaasoq: Pinerluttunik Isumaginnittoqarfik ajalusoorsinnaavoq
Folketingilli akissarsiat pillugit siunnersuisoqarfiata tamanna pillugu suliaq misissortussanngorpaa. Politikererpaaluit siunnersuisoqarfimmi tassani sulipput, taakkualu qanoq isumaqatigiissusiortoqarnissaanik siunnersuuteqassapput.
Danmarkimi parnaarussalerisut kattuffiata siulittaasuata pinerluuteqarsimasunut inissiisarfiit ilaat takornarniarlugit nunatsinneeqqammerpoq. Nunatsinnilu nakkutilliisut tapisiaqarunnaassappata ilarpassui soraarniuteqarnissamut piareersimasut, taanna isumaqarpoq.
- Taamaaliussappata paasinarpoq, siooqqatigaarali. Tassami Pinerluttunik Isumaginnittoqarfik tamarmi nalorninartorsiungaatsialissammat, Bo Yde Sørensen oqarpoq.
Nakkutilliisutummi ilinniarsimasut nunatsinni 2020-p kingorna suliumalertut amerleriarsimapput, Danmarkimilu parnaarussiviit maanna nakkutilliisussaalatseqalutik.
Nunatsinnimi nakkutilliisut soraarassappata, Danmarkimi parnaarussivinni nakkutilliisunik Kalaallit Nunaannut suliartortitsisoqarsinnaanavianngilaq.
- Taamaaliussagunimmi Kalaallit Nunaanni aammalumi Pinerluttunik Isumaginnittoqarfimmi suleqativut nalorninartorsiungaatsialissapput, Bo Yde Sørensen oqarpoq.
Danmarkimi parnaarussalerisut kattuffiat toqqaannartumik isumaqatigiinniaqataanngilaq. Jan Erik Rasmussenili toqqaannartumik isumaqatigiinniaqataavoq, taanna isumaqatigiinniarnermi pisortaavoq pisortallu suliffeqarfiutaanni atorfilittat, nunatsinnilu nakkutilliisut ilanngullutik, kattuffiat sinnerlugu isumaqatigiinniaqataavoq. Bo Yde Sørensenitulli ernumalluni, taanna KNR-imut ilisimatitsivoq.
Nunatsinni atorfilittat danskit naalagaaffiata ataani sulisut akissarsiaat pillugit isumaqatigiinniarnerit aasaq manna sulinngiffeqareermi nanginneqassangatinneqarput.
