Kiisami: Pinerluuteqarsimasunut inissiisarfinni nakkutilliisut juullisiutissaqarlualersut
Kiisami!
Danmarkimi parnaarussalerisut kattuffianni allatsi nunatsinnilu pineqaatissinneqarsimasunut inissiisarfinni nakkutilliisut sinniisuat, René Larsen, taama oqarpoq.
Nunatsinnimi inissiisarfinni nakkutilliisut qaammaterpaalunni utaqqereerlutik akissarsiamik qaffaatissaat kiisami tigusussanngorpaat. Taakkua akissarsiaat qaffanneqassasut, danskit aningaasanut inatsisissaatigut Folketingimi siorna aalajangerneqarpoq.
- Naammaginartunik inuussutigisinnaasaminnillu akissarsiaqartussanngorput, René Larsen KNR-imut oqarpoq.
Tassa imaappoq, nunatta Pinerluttunik Isumaginnittoqarfiani nakkutilliisutut misiliummik atorfillit 46.800 koruunit missaannik akileraannginnermi ukiumut isertitaqarnerulissapput.
Nakkutilliisutut aalajangersimasumik atorfillit 70.000 koruunit 85.000 koruunillu akornanni akileraannginnermi ukiumut isertitaqarnerulissapput - nakkutilliisutut ukiuni qassini atorfeqarsimanersut apeqqutaalluni.
Danmarkimi nunatsinnilu 2020-mi januaarip aallaqqaataata tungaanut akissarsianik naleqqersuussineq:
- Nunatsinni pineqaatissinneqarsimasunut inissiisarfimmi ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusiaqarpoq.
- Danmarkimi parnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusisarpoq. Nikingassut 5.400 koruuniuvoq.
- Nunatsinni nakkutilliisut sapaatit-akunnerannut 40 tiimit sulisarput, Danmarkimilu nakkutilliisut sapaatit-akunnerannut 37 tiimit sulisarlutik.
- Isumaqatigiissut nutaaq 2020-imi januaarip aallaqqaataani atuutilerpoq. Tassa imaappoq, nunatsinni nakkutilliisut Danmarkimi illoqarfiit pingaarnersaanni parnaarussivinni nakkutilliisutulli akissarsiaqassapput.
Tusarfik: Pinerluttunik Isumaginnittoqarfik
Nakkutilliisut juullisiutissaqarlualertut
Nakkutilliisut akissarsiamik qaffaatissaat kingusinnerpaamik decembarimi akissarsiassaannut ilanngunneqassasut, René Larsen oqarpoq.
Akissarsiaasa qaffannissaannut isumaqatigiissut 2020-mi januaarip aallaqqaataani - tassa qaammatit qulit matuma siorna - atuutilermat, nakkutilliisut juullisiutissaqarluarnissaminnut qilanaarutissaqalerput.
AAMMA ATUARUK Nakkutilliisut akissarsiamik qaffaatissaat suli utaqqigaat
Nakkutilliisut ataasiakkaat akissarsiaasa qaffaatissaat naatsorsoqqissaarneqartussaammata, oktobarimi novembarimiluunniit tunniunneqaratik aatsaat decembarimi kingumut tunniunneqassapput.
- Nakkutilliisut ataasiakkaat atorfiniffiisa ukiui assigiinngimmata akissarsiaasa qaffaatissaannik naleqqussaaneq naatsorsueqqissaarnermik ilaqangaatsiarpoq. Juullertinnaguli tunniunneqassasut naatsorsuutigilluinnarparput, René Larsen oqarpoq.
Utaqqineq imminut akilerluartoq
Nakkutilliisulli akissarsiamik qaffanneqarnissaannut sivisuumik utaqqipput.
Politikerit ingammik Folketingimi ilaasortat ukiorpaalunni kimigiisereersullu, nunatta Pinerluttunik Isumaginnittoqarfiani nakkutilliisut akissarsiaasa qaffaatissaat danskit 2020-mut aningaasanut inatsisaannut ilanngunneqarput.
Kisianni Pilerluttunik Isumaginnittoqarfik Danmarkimilu parnaarussalerisut kattuffiat nakkutilliisut akissarsiaasa qaffaatissaasa agguarnissaannut tamatuma kingorna isumaqatigiinniaqqaarput. Siorna maajip qaammataani isumaqatigiissuteqarput.
Isumaqatigiissutaat danskit akileraartarnermut ministereqarfiata sulisoqarnermut piginnaasaqarnermullu aqutsisoqarfianit, tassa Medarbejder- og Kompetencestyrelsenimit, tamatuma kingorna akuerineqaqqaartussaavoq. Nakkutilliisullu akissarsiaasa qaffaatissaat tunniunneqartussanngortut, aqutsisoqarfik aatsaat ukioq manna oktobarip qaammataani nalunaarpoq.
