Illuut A/S-ip allamit aqunneqalernerata tunuliaqutaa
- Anthon Frederiksenip Partii Naleqqameersup § 37 naapertorlugu apeqquteqaataanut akissuteqarluni ineqarnermut, sanaartornermut attaveqarnermullu naalakkersuisoq Knud Kristiansen taama allappoq.
Knud Kristiansenip erseqqissaatigaa Illuut ingerlatseqatigiiffinnut Namminersorlutik Oqartussanit pigineqartunut allanut naleqqiullugu nalinginnaasuunngimmat. Tassami siulersuisunut ilaasortat tassaapput naalakkersuisoqarfinni pisortat pingasut, aammalu qullersaqarfik Ineqarnermut, Sanaartornermut Attaveqarnermullu Naalakkersuisoqarfimmit atukkiussaalluni.
Aammattaaq ingerlatseqatigiiffiup nammineerluni aqutsinermik suliaqartussaannginnini allaanerussutigaa. Siulersuisut qullersaqarfillu akissarsiaqartinneqanngillat, aammalu Illuut A/S pillugu suliat Namminersorlutik Oqartussani ulluinnarni sulinermut sinaakkusiussat iluanni ingerlanneqarsinnaanissaat naatsorsuutigineqarluni.
AAMMA ATUARUK Illuut nutaamik akisussaasortaartoq
Aqutsineq Illuut A/S-imut imaluunniit INI-mut naammaginartumik ingerlanneqarsinnaasimanngitsoq akissuteqaammi aamma atuarneqarsinnaavoq. Inissiat Illuut A/S-imit pigineqartut aaqqissuussaanerminni illuutillit peqatigiiffiinut namminersortunut immikkoortinneqarsimanerat, aammalu aaqqissuussaanerup allaanerusup isumaginissaanut piumasaqaatit INI-mut isumagissallugit pisariunerata INI-mut paasinarsisimanera, tamatumunnga peqqutaavoq. Taamatuttaaq INI-p sulisuisa inissiat nuuffigineqarnerini qimanneqarnerinilu misissuisarnerit ingerlanneqarnissaannik qulakkeerinissaq naammaginartumik naammassisinnaasarsimanngilaat, inissianillu atuileqqinnermut iluarsaassinermullu aningaasartuutit amerlinerat Illuut A/S-imut aningaasaqarnikkut annaasaqarfiusarsimavoq.
Paarlattuanillu INI-mit oqaatigineqarpoq inissianik Illuut A/S-imit pigineqartunik aqutsineq INI-mut iluanaarutaanngitsoq.
Aqutsineq akikinnerulersoq
Taamaammat illuutinik aqutsineq ingerlatseqatigiiffimmut namminersortumut Agerskov Consultingimut, siornatigut aqutsinermik naammaginartumik ingerlatsisimasumut apriilip aallaqqaataani tunniunneqarpoq.
Tamatumalu peqatigisaanik aqutsineq aamma akikinnerulerpoq. Aqutsineq inissiamut ataatsimut 4.400 koruuninik akeqartinneqarpoq, Assersuutitullu INI-p Namminersorlutik Oqartussat inissiaataannik tamakkiisumik aqutsinini inissiamut ataatsimut 4.800 koruuninik akeqartippaa, Knud Kristiansen Anthon Frederiksenimut akissuteqartilluni taama nassuiaavoq.
