Illutungiliuttut borgmesterip tunuarnera pillugu: Tupaallannartuunngilaq naapertuilluarneruvorli
Charlotte Ludvigsen Kommmuneqarfik Sermersuumi borgmesteritut tunuarniarluni ippassaq nalunaarpoq.
Taama aalajangertoqarpoq, kommunalbestyrelse ataatsimiititaliallu avaqqullugit akuersisoqartarsimanerata kingorna
Borgmesterillu IA-meersup tunuarniuteqarnera pissusissamisoortuuvoq.
Taama isumaqarpoq kommunalbestyrelsemi Siumup gruppeannisiulittaasoq, Inga Dora
Guðmundsdóttir Markussen.
- Naapertuilluartutut isigisariaqarpoq, massakkut borgmesterip tunuarniuteqarnera, kisianni ataqqivarput taamatut kinguneqartitsinera, politikkikkut massakkut takusinnaavarput, kinguneqartoq akisussaaffimmik tigusisoqartoq, tamanna nasaarfigaarput taamaaliorneranut, Inga Dora Gudmunddóttir Markussen taama oqarpoq.
Kommunemi tukattoqartoq
Demokraatit gruppeanni siulittaasup Justus Hansenip borgmesterip tunuarniuteqarnera tapersersorpaa :
Paasissutissat: Ineqarneq pillugu periuserineqartoq malittarisassanik unioqqutitsisoq
Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.
Periaaseq taanna kommunip 2015-imiilli inissianik pissarsiniarluni atortarsimavaa.
Nakkutilliisut nalilerpaat periaaseq taanna kommuninut pisinnaatitsisummik uniuinerusoq.
Borgmesterip, Charlotte Ludvigsenip kommunimi ataatsimiititaliap isumagisimanngisaanik 20 millionit koruuninik atornissaq akuerinikuusimagaa siorna novembarimi saqqummersinneqarpoq.
Aningaasat atukkat kommunip inissiaatileqatigiiffiata Iserip inissianik 2025-mi pisisinnaanissaanut atorneqartussaapput.
20 millionit koruuninullu allanut tunngasumik suliamik politikkikkut aamma akuerineqanngitsunik ullumi saqqummertoqaqqippoq. Tamatumuuna asfaltiliorfimmik Munck Gruppenimit 2020-mi pisineruvoq, isumaqatigiissut taanna borgmesterip kommunalbestyrelsip suliamik isumaginninnginneratigut atsiorsimavaa.
- IA kommunalbestyrelsemi suleqatigiunnaarnissaa sioqqullugu tunuarnissaa piumasarinikuuarput, pisimasut soorunalimi uggornartorujussuupput taakkuali tusaatissatut tiguagut Justus Hansen oqarpoq.
- Finn Karlsen IA-p kommunalbestyrelsemi suleqatigisaata Naleqqap gruppeani siullitaasoq tamanna pillugu ima oqarpoq:
- Taama pisoqarsimanera gruppitsinni akuerisinnaangilarput, borgmesterillu nammineerluni tunuarniuteqarnera akueraarput, Finn Karlsen oqarpoq.
Pisimasut allat qaffakaapput
Charlotte Ludvigsen ulloq taanna tunuarniuteqarnini nalunaarutigimmagu saqqummiunneqarpoq, asfaltiliorfik 20 million kr-nik akeqartoq Munk Gruppimik pisiarineqarsimasoq taannnali kommunalbestyrelsemi inaarutaasumik akuerineqarsimanngitsoq.
Taama nutaamik saqqummertoqarnera Inga Dora Guðmundsdóttir Markussenimut tupaallaataanngilaq:
- Ajoraluartumik oqaatigisariaqarpara tupaallaatiginngilarput, pissutigalugu suli qaloorisoqarmat, suli assaasoqarmat, aamma suli nerriviup qaanut ilineqartussaasut, takussutissaqartoq atsiortoqarsimaneranik taamaattumik tupaallaatiginngilarput ajoraluartumik, Inga Dora Gudmundsdóttir taama oqarpoq.
Nutaamik taama saqqummertoqarnera Justus Hansenip Demkraatineersupa amma tupaallaatiginngilaa.
- Tupaallaatiginngilara tamanna naatsoorsuutigineqarsinnaagunarmat, ajorluinnartunimmi allanik saqqummmeroqarnissaa naatsorsuutigineqarmat. Uggornarpoq maannalu annertuumik torersaasoqartussanngorpoq, Justus Hansen demokraatineersoq oqarpoq.
Borgmesterip paarlatsissaanik piukkassanik oqartoqarusunngilaq
Demokraatit Siumukkullu kina borgmesterissatut piukkunnerlugu oqaatigiumanngilaat.
- IA-p nammineerluni aalajangissavaa kina borgmesterinngussanersoq. Borgmesterinngortussap suleqatiginissaanut piareersimavugut, suleqatigiilerlutalu, Justus Hansen taama oqarpoq.
Kina borgmesterinngussanersoq Inuit Ataqatigiit iluminni aalajangissagaat, Inge Dóra Guðmundsdóttir Markussen oqarpoq, gruppetsinni oqaluuserinikuunngilarput taanna oqarpoq.
AAMMA ATUARUK Professori inissiat pillugit nalunaarusiaq uissuumminartoq pillugu: Ajornartorsiutaasut malunnartumik amerlapput
Inuit Ataqatigiit aamma Naleraq kommunalbestyrelsemi suleqatigiipput ingerlaassasullu Finn Karlsenip KNR-imut oqaatigaa.
- Suleqatigiinnerput ajunngitsupilussuuvoq, aamma suleqatigiinneq nutaaq qinersivimmi nutaami aallartippoq, ukua pisimasut tamarmik qinersiviup siuliani tamamik pisimasuupput, taamaammat ullumikkut suleqatigiinnerput, isumaqatigiissutigullu pitsaasuupput, suleqatigiilluarlutalu ingerlavugut, Finn Karlsen Naleraq taama oqarpoq.
Charlotte Ludvigsen borgmesterinngorpoq 2019-mi junimi Asii Chemnitz Narup taaserlugu.
Kommunalbestyrelsemut siorna qinersisoqarmat Charlotte Ludvigsen 1512-nik qinerneqarpoq, kommunalbestyrelsemilu inissani 19-usuni IA qulingiluanik issiatitaqalerluni.
Kommuneqarfik Sermersuumi kommmunalbestyrelsemi ilaasortat imatut inissisimapput, Siumut arfinilinnik ilaasortaatitaqarpoq, Demokraatit aamma Naleraq tamarmik marlunnik ilaasortitaataqarlutik,sinneri qulingiluat IA.
Charlotte Ludvigsen juunip ulluisa 15-ata tungaanut borgmesteriussaaq.
