Charlotte Ludvigsenip borgmesteriugunnaarnissamik aalajangernera suliat ajorluinnartut arlallit kommunillu ineqarnermut susassaqarfiata aqunneqarneranik isornartorsiuisoqarnerata kingorna pivoq.Assi: Christian Sølbeck

Charlotte Ludvigsen suliat ajorluinnartut pissutigalugit borgmesteritut tunuartoq

Kommuneqarfik Sermersuup borgmesteria, Charlotte Ludvigsen atuuffimminit tunuarpoq. Tatigineqanngikkumalu politikkikkut ingerlanniakkagut anguniarnissaannut siuttutut inissisimasinnaanngilanga, Charlotte Ludvigsen oqarpoq.

Charlotte Ludvigsen (IA) Kommuneqarfik Sermersuumi borgmesteritut atuuffimminit tunuarpoq.

- Tatigineqanngikkumalu politikkikkut ingerlanniakkagut anguniarnissaanut kommuunitsinni sluttutut inissisimasinnaanngilanga, Charlotte Ludvigsen tusagassiuutinut nalunaarummi oqarpoq.

Taamaammat borgmesteritut atuuffimminit pisortatigoortumik juunip ulluisa 15-annit atuukkunnaarniarpoq.

Charlotte Ludvigsenip borgmesteriugunnaarnissamik aalajangernera suliat ajorluinnartut arlallit kommunillu ineqarnermut susassaqarfiata aqunneqarneranik isornartorsiuisoqarnerata kingorna pivoq.

AAMMA ATUARUK Professor om opsigtsvækkende boligrapport: Mængden af problemer er markant

Taakku Namminersorlutik Oqartussat Nakkutilliisuisa kukkunersiuisullu nalunaarusiaata kingulliup taakkartorpaat.

Atsiornerit ajornartorsiutaasut

Kommunimi suliat pisariullutillu akornakusoortuusut borgmesterip tusagassiuutinut nalunaarummi allappaa.

Paasissutissat: Ineqarneq pillugu periuserineqartoq malittarisassanik unioqqutitsisoq


Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.


Periaaseq taanna kommunip 2015-imiilli inissianik pissarsiniarluni atortarsimavaa.


Nakkutilliisut nalilerpaat periaaseq taanna kommuninut pisinnaatitsisummik uniuinerusoq.


Borgmesterip, Charlotte Ludvigsenip kommunimi ataatsimiititaliap isumagisimanngisaanik 20 millionit koruuninik atornissaq akuerinikuusimagaa siorna novembarimi saqqummersinneqarpoq.


Aningaasat atukkat kommunip inissiaatileqatigiiffiata Iserip inissianik 2025-mi pisisinnaanissaanut atorneqartussaapput.


20 millionit koruuninullu allanut tunngasumik suliamik politikkikkut aamma akuerineqanngitsunik ullumi saqqummertoqaqqippoq. Tamatumuuna asfaltiliorfimmik Munck Gruppenimit 2020-mi pisineruvoq, isumaqatigiissut taanna borgmesterip kommunalbestyrelsip suliamik isumaginninnginneratigut atsiorsimavaa.

Borgmesterip suliat marluk tassa aningaasanik atornissamut isumaqatigiissut aamma pisinissamik isumaqatigiissut tamarmik immikkut 20 millionit koruuninik aningaasartaqartut ilaatigut atsiorsimavai. Suliallu taakku marluk kommunimi politikerinit oqaluuserineqarsimannginnerat ajornartorsiutaavoq.

Charlotte Ludvigsen Qanoruumit apersorneqarnermini ima oqarpoq:

- Soorunalimi tunuarniutinnut peqqutaanerpaavoq, ukua atsiorsimasakka massakkut marlunngortut. Misigisimavunga tassani tatigineqarnera innarlerneqartoq. Aamma issiavinni issianiaannarlunga issianiarsarinianngilanga, innuttaasunit tatigineqanngikkuma.

Itisiliivorlu:

- Aningaasaqarnermut inuussutissarsiornermullu ataatsimiititaliamut akuersititseqqaarsimannginneq, kommunalbestyrelsimut akuersititseqqaarsimannginnerit, soorunami taakkua peqqutaanerpaapput. Uanga tatiginassutsikkut innarlerneqarnera. Taamaattumik aamma misigisimavunga, politikkikkut anguniakkagut pingaarutillit angusinnaassagutsigit taava borgmesteritut tunuaruma pitsaanerussasoq, Borgmesteri Qanoruumut oqarpoq.

Charlotte Ludvigsenip Asii Chemnitz Narup taarserlugu 2019-imi juunimi borgmesterinngorpoq.

Taanna kommunimut siorna apriilimi qinersinermi 1512-init taaguunneqarpoq.

Kukkunersiuisut nalunaarusiaat isornartorsiuisoq

Kukkunersiuisut nalunaarusiaata kommunip inissiaqarnermut aqutsinerani ajornartorsiuteqangaatsiartoq qaammammi matumani siusinnerusukkut saqqummiuppaa.

Aalborg Universitetimi aningaasaqarnermik aqutsinermi professori, Per Nikolaj Bukh nalunaarusiamik aatsaat taama ilungersunartigisumik isornartorsiutigisumillu takusimanngisaannarluni oqarpoq.

Iserfimmut aningaasanik atorneq politikkikkut akuerineqarsimanngitsoq pillugu 2020-mi novembarimi suliaq nalunaarusiami aamma isornartorsiorneqarpoq. Suliaq taanna borgmesterip ullumikkut tunuarneranut pissutaasumi siulliuvoq.

AAMMA ATUARUK Kommunalforsker: Det er kommunens ansvar at rydde op i boligsagen

Taassuma isumaqatigiissut politikkikkut suliarineqarsimanngitsoq qanoq ilungersunartiginersoq aperineqarami ilaatigut ima oqarpoq.

- Oqartoqarsinnaavoq inortuilaarsimagaanni kingornalu politikerinukarluni akueritikkaanni taava tamanna arlaatigut iluarsiivigineqartoq oqartoqarsinnaavoq.

- Kisianni tulleriiaarineq suli kukkuneruvoq. Politikerimmi isumaqatigiissuteqartoqareersimappat naaggaarsinnaassanngillat, isumaqatigiissullu utertinneqarsinnaanngikkuni aamma akuerineqarnissaa naatsorsuutigalugu piarereeruni taava tamanna naaggaarneqarsinnaanngilaq, Per Nikolaj Bukh maajimi oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl