Ilisimatooq: Kommunep iluarsaassinissani nammineq akisussaaffigaa
Kommuneqarfik Sermersuup suliffeqarfinnut namminersortunut inatsisit unioqqutillugit inissianik attartortitsisimanera siornali isornartorsiorneqarpoq.
Kommuneqarfik Sermersuup ineqarnermut allaffissornikkut suleriusaa pillugu maanna kukkunersiuisarfiup Deloittep nalunaarusiaa saqqummeqqammerpoq, taannattaaq apeqqutinik arlalinnik kommunemut tunngasunik uisitsivoq.
AAMMA ATUARUK Professori inissiat pillugit nalunaarusiaq uissuumminartoq pillugu: Ajornartorsiutaasut malunnartumik amerlapput
Kommunet pillugit ilisimatuup, Danmarkimi Medie- og Journalisthøjskolemi ilinniartitsisuusup, Roger Buchip nalunaarusiaq atuareerlugu kingunerusinnaasut pillugit ima oqaaseqarpoq.
- Aap, isornartorsiorneqaat manna pimoorulluinnarlugu paasisariaqarpoq, aammami taamatut paasineqarpasippoq. Taavalu aamma paasilluarneqartariaqarpoq sukkut pikkorliortoqarsimanersoq, imminullu aperaluni, sunarpiaruna naammattumik suliarisimanngikkipput, aammalu kukkussutaasimasup tamatuma peqqinnginnissaa isumagineqartariaqarpoq, Kommunet aqunneqartarnerinut ilisimatooq Roger Buch oqarpoq.
Namminersorlutik Oqartussat nakkutilliisui Kommuneqarfik Sermersuup ineqarnermut tunngatillugu periuserisartagaanut assigiinngitsunik arlalinnik isornartorsiuivoq. Taakkumi uparuarpaat kommunep maleruaqqusai uniorlugit ininik attartortitsisoqartarsimasoq, soorlu ilaatigut attartornermut isumaqatigiissutinut tunngatillugu aningaasartuutit attartortut ineqanermut akiliutaanniit isertitanit amerlanerusarsimasut.
Taamatullu aaqqiisimaneq kommunep karsianut 2021-mi 17 millioninik naleqarsimavoq, naatsorsuutigineqarportaaq ukioq manna 27 millioner koruuninik naleqarumaartoq.
Taamattumilluuna Namminersorlutik Oqartussat nakkutilliisuisa tamanna unitseqqugaat.
Roger Buchilu nassuiaavoq, kommunep iluarsaassinissani nammineq akisussaaffigisariaqaraa, avataaniimmi allat takkullutik iluarsaassiartornavianngimmata.
Politikkikkut akisussaasunik inissiineq
Taamatuttaaq Namminersorlutik Oqartussat nakkutilliisuisa piffissap ilaani kommunalbestyrelse kaammattorpaa politikkikkut akisussaassuseqartumik pisoqassappat oqaluuserisassaq qaqeqqinneqartariaqartoq.
Kommunalbestyrelsemili amerlanerussuteqartut februaarip 18-iani suliareqquneqartoq itigartitsissutigaat, taamaalimmallu taamatut aalajangerneq inatsisinik unioqqutitsinerunerarlugu nakkutiilliisut naliliipput.
AAMMA ATUARUK Ineqarneq pillugu suliaq qaffaqqippoq: Nakkutilliisut politikikkut akisussaassuseq pillugu kommunalbestyrelsemik assuarliipput
Roger Buchilu naapertorlugu, tamatumunnga akisussaasunut tamanna angisuumik kinguneqarnavianngilaq, taamaallaallu tusagassiutini eqqartorneqaataaginnartussalluni.
- Peersitsinissamut periarfissaqangaanngilaq, tassami politikerit peersikkuminaatsorujussuusinnaasarput, qinersisartuniimmiuku qinigaanermikkut tassani issiasut, taamaattumik soorlu borgmesteri ataatsimiititaliamiluunniit siulittaasoq peersikkuminaatsorujussuusarpoq, Roger Buch oqarpoq.
Taamaattumik qinersisartut tulliani qinersinermi aalajangissavaat qinikkatik qineqqissanerlugit qineqqissannginnerlugilluunniit.
