Ineqarneq pillugu suliaq qaffaqqippoq: Nakkutilliisut politikikkut akisussaassuseq pillugu kommunalbestyrelsemik assuarliipput
Ulloq februaarip 18-at Kommuneqarfik Sermersuumi kommunalbestyrelsemi amerlanerussutillit ineqarneq pillugu suliami mianernartumi politikikkut akisussaasumik inissiinissaq pillugu siunnersuut kommunalbestyrelsip suliariumanninnginnera inatsisinik unioqqutitsineruvoq.
Namminersorlutik Oqartussat nakkutilliisui taama naliliipput, taakkulu kommunit aalajangiinerisa inatsisinik malinnittuuneri nakkutigisaraat. Suliamummi pulapput kommunalbestyrelsep siunnersuut itigartimmagu.
Suliamut KNR allagaatitinik takunnissinnaatitaanermik pivoq. Tassani takuneqarsinaavoq Nakkutilliisut massakkut kommunalbestyrelse kaammattorsimagaat oqaluuserisassaq taanna kommunalbestyrelsemi ataatsimiinnissamut tullermut ilannguteqqullugu.
Tilsynet (Nakkutilliisut) aamma Tilsynsrådet (Nakkutilliisuutitat) assigiinngissutaat
Nakkutilliisut:
Nakkutilliisut Nunamut Namminermut Naalakkersuisoqarfimmut atapput.
Nakkutilliisut ilaatigut akisussaapput kommunit aalajangigaat inatsisinik malinninnersut nakkutigissallugit.
Nakkutilliisut aamma Nakkutilliisuutitanut allattoqarfiupput.
Nakkutilliisuutitat:
Naalakkersuisut kisimik Nakkutilliisunut suliaq ingerlatissinnaavaat.
Nakkutilliisuutitat ilaasortaqarput siulittaasumik ataatsimik ilaasortanillu sisamanik Inatsisartunit aamma kommuninit toqqakkanik.
Massakkorpiaq ilaasortat tassaapput Inuit Ataqatigiinniit marluk aamma Siumumiit marluk.
Nakkutilliisuutitat nakkutigissavaat kommunalbestyrelsit ingerlatsinerminni kommunit aqunneqarnerat pillugu inatsit aamma oqartussanut eqqartuussisoqarnermut malittarisassat malinneraat.
Tamanna Nakkutilliisunit Kommuneqarfik Sermersuumi kommunalbestyrelsemut februaarip 23-ani allakkani nassiunneqartuni takuneqarsinnaavoq.
"Oqaluuserisassanut ilaasumik itigartitsinermut piumasarineqarpoq suliaq erseqqissumik kommunalbestyrelsip oqartussaaffiisa avatanniittoq. Nakkutilliisut isumaqarput oqaluuserisassaq avataanniinngitsoq," allakkami allassimavoq.
Siunnersuut amerlanerussuteqartunit itigartitsissutigineqarpoq
Kommuneqarfik Sermsuup ineqarnermut periaasia pillugu politikikkut akisussasumik toqqaanissaq pillugu Siumup gruppia siunnersuuteqarpoq.
Kisianni amerlanerussuteqartunit itigartitsissutigineqarpoq taamalu suliarineqarnani.
Kommunep borgmesteriata, Charlotte Ludvigsen (IA), oqarnera naapertorlugu Namminersorlutik Oqartussat Nakkutilliisui kisimik politikikkut akisussaasoq aalajangersinnaavaat.
Taamaammat tamanna kommunalbestyrelsep naliligassarinngikkaa, isumaqarluni februaarip 18-at radioaviisimut oqarpoq.
Ulloq taanna kommunalbestyrelsep immikkut ittumik ataatsimiinnerani aamma borgmesterip tullia siulleq Justus Hansen Demokraatineersoq taama inernillivoq.
- Politikikkut akisussasumik inissiinissaq kommunalbestyrelsetut suliassarinngilarput, Justus Hansen ilaatigut ataatsimiinnermi oqarpoq.
Kisianni Nakkutilliisut paasinninnerat naapertorlugu kommunalbestyrelsep siunnersuutip suliarinissaa itigartitsissutigisinnaanngilaa.
"Kommunalbestyrelse pissusissamisoortumik suliat (politikikkut) isummernerit pillugit suliarisinnaavai, tassunga atatillugu kommunalbestyrelsep suliat (politikikkut) akisussaaffinnik inissiinernut tungasut kommunep suliarisimasaanut suliarinngitsoorsimasaanullu tunngasut," nangittumik kommunalbestyrelsemut ilaasortaasunut allakkani allassimavoq
Pinngitsaaliissummik akiliisitsissuteqartoqarsinnaavoq
Kommunalbestyrelsep Nakkutilliisut kaammattuutaa malinngippagu, suliaq Nakkutilliisuutitanut tunniunneqarsinaavoq.
Novembarimi Nakkutilliisut inerniliipput ukiuni arlalinni kommunip inissianik pissarsinissaminut periaasia kommuninut piginnaatitsissutinut malittarisassanik unioqqutitsinerusoq.
Taamaattumik Nakkutilliisuutitat kommune peeqquaat taamatut periaaseqarneq unitseqqullugu.
Politikikkut akisussaasumik inissiinissamik siunnersuutip kommunalbestyrelsemit itigartitsissutigineqarnera pillugu suliaq Nakkutiliisuutitat ilaasortaanut tunniunneqarnermut killikkaangat, taava taakku kommunalbestyrelsemut ilaasortaasunut pinngitsaaliissummik akiliisitsisinnaapput.
