VIDEO Illuatungiliuttut: Urani pillugu isumaqatigiissut kinguarsaataassaaq

Uran pillugu Nunatta Danmarkilu isumaqatigiissutaat Nunatsinnut kinguarsaataassasoq, partiit illuatungiliuttut isumaqarput. Isumaqatigiissulli pissusissamisuuginnartoq, partiit naalakkersuisuutitaqartut isumaqarput.
februaarip 04-at 2016 13:57

- Taamannak qoqassiiniarsarineq, inuiaqatigiillu aalajangersaanerat, 2009-milu inatsisinngortinneqarnikuusoq, uagullu aatsitassarsiornermi akisussaaffik tigunikuullugu, taamannak arsaarinninniarsarineq Partii Naleqqamit apeqqusersorparput, aammalu naapertuutinngitsutut isigaarput 2009-imi namminersorneq pillugu inatsimmik taasitinneqarnitta kingunerisaanik akisussaaffimmik annertunerusumik tigusinitsinnut isumaqatigiissut naapertuutinngilaq, Partii Naleraq sinnerlugu Inatsisartunut ilaasortaq, Per Rosing-Petersen oqarpoq.

AAMMA ATUARUK Randi: Urani pillugu isumaqatigiissut pingaartorujussuuvoq

Inuit Ataqatigiit isumaqatigiissummut aamma isornartorsiuipput.

Nunatta avammut tunisinnaasai pillugit Danmark pissaanermik angivallaartumik tunineqartoq, Inuit Ataqatigiit siulittaasuat, Sara Olsvig oqarpoq, ilaatigullu isumaqatigiissutigineqartumi Dual use-imik taaguutilik, tassa avammut tunisat sakkuliarineqarsinnaasut pillugit aamma ilaatinneqarmat.

- Danmarkimut akisussaaffimmik tunniussiinnarneq siammasippallaarujussuartoq uagut isumaqarpugut. Apeqquserparpullu aamma namminersorneq pillugu isumaqatigiissummut ilumut naapertuuttuunersoq. Uagullu politikkikkut naliliivugut, namminersorneq pillugu isumaqatigiissummi angusimasatsinnut naleqqiullugu uani kingumut Danmarkimut utertitsisugut. Soorunamilu taanna politikkikkut naammaginanngilaq,  Sara Olsvig oqarpoq.

aamma atuaruk Uranimik avammut nioqquteqarneq Danmarkip akisussaaffigissavaa

Partiilli naalakkersuisuutitaqartut isornartorsiutinut isumaqataanngillat.

Isumannaallisaaneq illersornissamullu tunngasut Danmarkip akisussaaffigigaa Steen Lyngep Atassummeersup ersersinniarpaa.

- Nunatta nunarsuarmioqataanermigut akisussaaffiit naammassisassani taamaalinertigut naammassisinnaagamigit. Immikkut aaqqiinngikkaluarluni, kisianni naalagaaffeqatigiinnerup iluani akisussaaffiit Danmarkimiinneri atorluaannarpagut, Atassummi siulittaasup tullia Steen Lynge oqarpoq, ilanngullugulu oqarluni isumaqatigiissutigineqartut pissusissamisuuginnartut.

AAMMA ATUARUK VIDEO Nunarput Danmarkilu Urani pillugu isumaqatigiipput​

Uranilu pillugu Danmarkimut suleqatigiinnissaq avaqqunneqarsinnaanngitsoq, Siumumit isumaqartoqarpoq.

- Akisussaaffiit tamaasa Nunatsinni tigumminngilagut. Nunat tamalaat akornanni suleqateqartariaqarpugut. Aamma Danmarkimut naalagaaffeqatigiinnerup iluaniikkatta suleqatiginissaa avaqqunneqarsinnaanngilaq. Kisianni Nunatsinni aatsitassat sorliit inuiaqatigiit kalaallinut iluaqutaassanersut uagut akisussaaffigaarput, Siumumi politikkikkut oqaaseqartartoq, Jens-Erik Kirkegaard oqarpoq.

Uranip avammut tunineqarnerani sakkuliornissamut atorneqannginnissaa isumaqatigiissummi isumannaarneqartoq, Demokraatinit oqaatigineqarpoq.

Aamma atuaruk Ilisimatooq: Uranimik tuniniaalinnginnermi suliassarpassuaqarpoq