Illuatungiliuttut akit qaffakkaluttuinnarnerannut aaqqiissuteqaqqusisut
Nunatsinni ulluinnarni atortussanik pisiniarfinni nioqqutissat akitsoraluttuinnarput.
Naalakkersuisut isertitakinnerusunut soorlu utoqqalinersiutilinnut, ilinniartunut SIK-llu isumaqatigiissutaat naapertorlugit akissarsialinnut oqilisaassillutik illuatungiliuttunit aaqqiissuteqalertoqquneqarput.
Aaqqiisoqartariaqarneranut utaqqeqqissinnaajunnaartugut, Naleraq sinnerlugu Inatsisartut aningasaqarnermut ataatsimiititaliaanni ilaasortaq Jens Napãtôk oqarpoq:
- Utoqqaat inuuniapiloornerat, ilinniartut ilinniarnersiutaasa ukiuni amerlavallaani naleqqussarsimannginnerat, sulisartut SIK-mik isertitaqartut ullutsinnut aningaasat pisissutaasinnaajunnarnerat eqqarsaatigalugit naleqqukkunaarnerat, akit qaffakkiartornerat sioqqulluguli taakkartorsimasagut suli attappagut.
AAMMA ATUARUK Nioqqutissat ilaat akitsorrattut: Qallersuutissat 10 koruuninik akitsortut
Taamaammat Naalakkersuisut coronap ajornartoortitsinerani takornarialerisunut oqilisaassinermisulli aaqqiissuteqarnissartik isumaliutigisariaqaraat, taanna isumaqarpoq:
- Coronap nalaani takornariaqarnikkut immikkut aaqqiisoqarnikuuvoq, takornarialerisunut allanullu milliuunerpassuit atorlugit, Jens Napãtôk oqarpoq.
Assersuutigalugu danskit naalakkersuisuisa nunaminni inunnut nioqqutissat akitsoraluttuinnarnerannit eqqugaanerpaasunut 2023-mi atugassanik 2 milliardit koruuninik illuartitsisoqassasoq siunnersuutigeqqammerpaat.
Naleraq: Aningaasat Namminersorlutik Oqartussat allaffissornerannit aaneqarlik
Nioqqutissat ilaasa akitsornerat ingammik uuliap akitsorneranik peqquteqarpoq: Uuliami akitsoraluttuinnarpoq, ingammik Ruslandip Ukrainemi saassusineratali kingorna. Tamannalu nioqqutissanik nunatsinnut assartuititsinermi akigititamut sunniuteqaqaaq, Royal Arctic Linemmi uuliamut tapiliussarititaa qaffangaatsiarpoq.
Taamaammat akit qaffakkiartuinnarneranni oqilisaassinissami sulisartut saniatigooralugu aalisarnissamut periarfissinnerisigut allaffissornermilu sipaarnikkut aningaasat ilaatigut aaneqarsinnaasut, Jens Napãtôk isumaqarpoq.
Pilersuisumi:
Makkariina siatsisissaq Rema 1000-meersoq, 500 g: Januaarimi 10,95 kr. - maanna 15,95 kr.
Qallersuut Salami Gølimeersoq 250 g: Januaarimi 24,95 kr. - maanna 34,95 kr.
Makkariina siatsisissaq Omameersoq, 500 g: Januaarimi 21,95 kr. - maanna 29,95 kr.
Brugsenimi;
Naasortat naasuusartallit: Januaarimi: 119 kr. - Juulip aallaqqaataani: 189 kr.
Pølsi Frankfurter, pujuugaq aamma nammineq sanaaq, 1 kg: Januaarimi: 79,90 kr. - Juulip aallaqqaataani: 99,90 kr.
Nersussuup neqaa aserortigaq, 1 kg: Januaarimi: 84,90 kr. - Juulip aallaqqaataani: 99,90 kr.
Tusarfiit: Pilersuisoq Brugsenilu
- Allaffeqarfissuaqarpugut Københavnimi, taava kalaallit illuinut, ilinniartut pillugit kiffartuussinerit ingerlaannarput, naak SU Danmarkimut nuukkaluartut. Taamaammat isumaqatigiinniarnerit maannakkut ingerlasussat pissangalluta aamma peqataaffigissavarput. Naleqqamit Jens Napãtôk taama oqarpoq.
Danmarkimimi nioqqutissat pisiariortorneqakkajuttut ilaat siorna juliminngarnit agguaqatigiisillugu 8,7 procentpointimik akitsorrapput. Nunatsinnili aningaasat naleerukkiartornikinnerupput. Naatsorsueqqissaartarfillu kisitsisinik aningaasat naleerukkiartornerannut tunngasunik septembarip ingerlanerani saqqummiissaaq.
Sinaakkutit pioreersut aallaavigalugit aaqqiisoqarsinnaavoq
Demokratineersoq Anna Wangenheim oqarpoq isertitakinnerusunut oqilisaassinermi aningaasaqarnikkut sinaakkutit pioreersut aallaavigalugit aaqqissuussisoqarsinnaasoq:
- Inuuneq inuuniarnerlu nunatsinni akikinnerusariaqarpoq, tamannalu akitsuutinik ilaatigut piiaanermik ilaatigut aallaveqatariaqarpoq. RAL-i aamma akitsuusersuisarpoq, isumaqarpungalu politikkikkut tunngavissaqarpugut oqaloqatigiinnikkut isumaqatiginninniarnikkut pitsaasumik inuiaqatigiinnut kinguneqartussamik nassaarinnissinnaasugut.
Isertitakinnerusunut oqilisaassinermi ilaatigut akileraartarnermut ilanngaatit qaffanneqartariaqartut Anna Wangenheim oqarpoq, nangipporlu:
AAMMA ATUARUK Hans Peter Kristensen nioqqutissat ilaasa akitsornerat pillugu: Qiasunnguummernartarporluunniit
- Taavalu ilaatigut aamma akitsuutit nioqqutissanut, neqinut, sukkulaatinut allanullu, misilillugu ukioq affaq imaluunniit ukioq ataaseq peerneqarnissaat sulissutigineqartariaqartoq. Minnerunngitsumillu nioqqutissanik assartuinermi eqqussuinermilu allaffissornermi passussinermi ilaatigut atorneqartartut isiginiartariaqarpagut piiarlugillu.
Nunatsinni isertitakinnerusut atugaat Inatsisartuni upernaaq oqallissutigaat tigussaasumilli inerniliisoqannginnera pillugu Anna Wangenheim ima oqarpoq:
- Ilungersunarilaarpara soorunami naalakkersuinikkut aatsaat nalunaarusianik annertuunik qulaajaatitseqqaarlutik aatsaat isummerfiginiarmassuk. Isumaqarpunga siusinnerusukkut pisinnaagaluartoq, unalu upernaaq oqallissaarutitut qaqinneqartoq aamma tusaaniarlugu inatsisartuni oqaloqatiginninniarnerit isumaqatiginninniarnerillu siusinnerusukkut pisinnaagaluartut. Taamaattumik oqaloqataassalluta tassani piareersimaqqissaarpugut.
